Read Simte HEBRAITE 7 Bible Online

HEBRAITE 7 - Simte bible

HEBRAITE 7

¹Bang jiahin ahiai i chih leh, hi Melkisedek, Salem kumpipa, Pathian tungnungpen siampu, kumpipate va that zou a hung pai kiit Abraham na dawnpa in, amah chu a vangpiah a;

²A kawmah Abraham in a neih zousiah sawm a khat a pia hi; a min umzia chu, a masapen in, dihtatna Kumpipa, hu baan ah Salem Kumpipa chihna ahi a, huchu lemna Kumpipa chihna ahi.

³Amah chu pa nei lou, nu nei lou, khanggui nei lou, um patni nei lou, hintawp ni zong nei lou; hizongleh Pathian Tapa bang a siam, tawpni nei lou a siampu a um zing ahi.

⁴Tuin chi haahtu Abraham ngei in gaal laah thuampuate sawm a khat a piahnapa, hipa loupidan ngaihtuah dihvua.

⁵Huleh Levi haahte laha siampu natohna mu photmahin daan thu dungjuiin mite lah apat sawmakhat laah diing thu a mu ngei uhi, chih chu, a unaute lah apat ahi, Abraham khaal a pawt himahleh uh.

⁶Hizongleh amahuh a kipana a khanggui suitel a umloupa’n chu Abraham apat sawmakhat a la a, thuchiamte neipa chu a vangpiahta hi.

⁷Huleh a neuzaw chu a lianzaw in vang a pia hi chih nialguallouh ahi.

⁸Huleh hi-ah chu mihing si jelte’n sawmakhat a tang uh; hizongleh huah chu amah a hing zing hi, chia a tanchin heetsah a umpa in a tang hi.

⁹Huleh Levi, sawmakhat tangtu in zong Abraham ah sawmakhat a pia hi, ka chi thei hi.

¹⁰Ajiahchu Melkisedek in a va lamtuah laiin, amah chu a pa khaal ah a um nalai hi.

¹¹Hujiahin Levite siampu hihna a bukimna muhtheih hitaleh, (ajiahchu hi nuaiah mite’n daanthu ana mu uhi) Aaron umdan bang a chih hilou a, Melkisedek umdan bang a siampu dang ahung um a ngaihna bang ahiai?

¹²Ajiahchu siampu hihna ahung kihentaah jiahin, daanthu zong a kihen ahung kiphamohta hi.

¹³Bang jiahin ahiai i chih leh a tungtaang a hi thute kisoinapa chu namtuam a mi ahi a, hu nam laha mi chu kuamah maitaam a na tong a um ngei sih uh.

¹⁴Ajiahchu i Lalpa u’chu Juda nam apat hung piang ahi chih chiantahin a lang hi; hu nam thu ah chu Mosi’n siampu lam thu bangmah a soi sih hi.

¹⁵Huleh Melkisedek umdan banga siampu dang ahung um jiahin, ka thusoi uh a kichian sem hi.

¹⁶Amah chu tahsa thupiah daanthu bang a siam hilou in, hintawp nei lou silbawltheihna bang a siam ahi zaw hi.

¹⁷Ajiahchu, ama’n, Nang chu Melkisedek umdan bang a kumtuang a siampu na hi, chi'n a hesah hi.

¹⁸Bang jiahin ahiai i chih leh thupiah um masa chu haatlouhna leh phattuamna bei jiahin paihin a umta hi.

¹⁹Ajiahchu daanthu in bangmah a subukim sih a, hizongleh kinepna hoihzaw chu ahung poluut hi; hukhuin eihaw’n Pathian i naih uh ahi.

²⁰Huleh kihaahsialna lou a hilou ahihjiahin amah chu siampu a siam ahita hi.

²¹Ajiahchu hu siampute chu kihaahsialna lou a siampu a siam ahi va; hizongleh amah chu, a kawm a, Lalpa a kihaahsial a, a lunghei kiit sih diing, Nang chu Melkisedek umdan bang a kumtuang a siampu na hi, chi a soitu kihaahsialna a siam ahi.

²²Huchimahbangin Jesu chu thuhun hoihzaw sukiptu a siam ahung hita hi.

²³Huleh amahuh chu sihna jiaha pandensah theih louh ahih jiahun, siampu chu ana tam ngei uhi;

²⁴Hizongleh hi pa’n chu, kumtuang a um zing ahihjiahin siampu hihna hen theih louh a nei hi.

²⁵Huchi'n amah a Pathian kawm a hungte chu, amahuh diing a ngetsah diing a, a hin zing jiahin, a tawpkhawh tanin a hundam thei hi.

²⁶Ajiahchu huchibang siampu lal, misiangthou, nun se lou, buah baang lou, misualte laha kituamkoih, huleh vaante sanga saangzaw a siam chu eihaw a diingin a kilawm mawng ahi.

²⁷Ama’n chu hu siampu lalte banga, nichin amah sualna jiaha kithoihna laan masa zet a, huzoh chianga mite sualna jiaha a lat a ngai sih hi; bang jiahin ahiai i chih leh ama’n hichu amah leh amah a kilat in setden diingin khatvei in ana zouta hi.

²⁸Ajiahchu daanin mihing haatlouhna neite siampu in a siam veu hi; hizongleh kihaahsial thu, daan nung a hung um in chu, Tapa, kumtuang a diing a suhkimsa chu a guat zawta hi.