Read Simte HEBRAITE 9 Bible Online

HEBRAITE 9 - Simte bible

HEBRAITE 9

¹Huchiangleh thuhun masapen in zong Pathian natohna daante leh hi khovela mun siangthou chu ana nei ngei hi.

²Ajiahchu biahbuuh a kibawl a, a masapen chu khawn vaah koihna leh, dohkaan leh, tanghou siah umna mun siangthou kichi chu ahi.

³Huleh puanjah nihna banah, Mun siangthoupen, kichi biahbuuh chu a um hi.

⁴Huah chu gimtui haalna sana bawm leh, thuhun sing kuang sanatui a luankhum, a sunga manna umna sana beel leh, Aaron chiang sel khu leh, thuhun suang peehte umna a um hi;

⁵Huleh a tungah chu khotuahna touphah liah in loupina cherubte a um uh; hute tungthu chu tuin a kimkeei in i soi thei sih diing uhi.

⁶Huleh hi silte hitobang a guatzoh ahih chiangin, siampute’n Pathian nna tongin biahbuuh pindan masapen ah a luut veu uhi.

⁷Hizongleh pindan nihna ah chu siampu lal chauh kum chinin khatvei, amah khelhna leh mite khelhna a diinga a lat diing sisan tawi in a luut veu hi;

⁸Hi in chu, Hagau Siangthou in, biahbuuh pindan masapen a um laisiah mun siangthoupen a luutna lampi a kilang nailou ahi, chih ahung hesah hi.

⁹Huchu tulai hun tehkaahna ahi, huah chu, sialepha heetna lam thu a a betu hoih bukimsah thei lou silpiahte leh kithoihnate a laan veu uhi.

¹⁰Hute chu neehte, dawnte, kisuhsiangna tuamtuamte, leh tahsalam daante giap ahi a, siamphat kiit hun toh kal a zat diing a bawl ahi.

¹¹Hizongleh Khrist chu sil hoih hung um diingte siampu lal diinga hung in, biahbuuh loupizaw leh bukim zaw, khuta sahlouh ah, huchu hi silsiam lah a ahi sih chihna ahi;

¹²Keelte leh bawngnoute sisan a hilou in, amah ngei sisan a eite diing a kumtuang a tatkhiahna muin mun siangthou ah setden diingin khatvei chauh a luutta hi.

¹³Ajiahchu bawngtalte leh keelte sisan leh bawngla vut vaam mi niin tung a thehin bawn tahsa siang khop a a suhsiangthou inchu;

¹⁴Khrist, kumtuang Hagau jala soiselbei a Pathian kawma kilaan sisanin Pathian hing nna tong diingin, silbawl sisa apatin na sialepha heetna uh bangchituhin a susiangthouta diai?

¹⁵Huleh hikhu jiahin amah chu thuhun thah palai ahi, thuhun masa nuai a tatsualnate lah apat a tatkhiahna diing a a sih taah jiahin, kouhte’n kumtuang a gouluah diing thuchiam chu a tang thei diing uhi.

¹⁶Ajiahchu thusiah umna photah a siahtu sihna zong a um ngeingei diing ahi.

¹⁷Bang jiahin ahiai i chih leh mite a sih nungun thusiah in thu a nei chauh hi; a siahtu damsung siah vang thu mawngmawng a nei sih hi.

¹⁸Huchi'n thuhun masa zong sisan lou in suhkip ahi sih hi.

¹⁹Ajiahchu Mosi in daanthu dungjui a thupiah photmah mite kawma a soi zohin, bawngnou leh keel sisan, tui toh, sawnsan toh, hussop toh a la a, huleh lehkhabu leh mipite zousiah chu a theh a,

²⁰Hichu Pathian in na kawmva ahung piah thuhun sisan chu ahi, chi'n.

²¹Hubanah zong ama’n biahbuuh leh, natohna vanzat zousiah chu sisan a theh hi.

²²Huleh daanthu in sil zousiah chihphial sisan a suhsiangthou in a um a; sisan suah louin ngaihdamna a um sih hi.

²³Hujiahin vaan a sil umte batpihte chu hihaw a suhsiang a, a um ngei diing ahi; hizongleh vaan sil tahzet haw chu hite sang a kithoihna hoihzawte a suhsiangthou a a um diing ahi.

²⁴Bang jiahin ahiai i chih leh Khrist chu a tahzet etsahna, khuta bawl mun siangthou ah a luut sih a; tuin Pathian ma-ah i luang va kilang diingin vaan ngeiah a luut zawta hi.

²⁵Siampu lal, kum china amah sisan hilou tawikawm a munsiangthou a a luut veu bangin, amah chu amah le amah kilaan diingin a luut sih hi.

²⁶Huchi hilouleh leilung siam chiil apat tampi vei a thuaahta diing hi; hizongleh tu huntawp ah amah chu sualna suhbeina diing a amah kipetawm diingin khatvei ahung kilangta hi.

²⁷Huleh mihingte diing a khatvei sih diing, hizongleh huzoh chianga vaihawmna um diing guatsa ahi;

²⁸Huchimahbangin Khrist zong mi tampite sualna pomang diing a khatvei lat in a um a; huleh amah na ngaahtute kawmah sualna tellouin hutdamna mu diingin a nihveina ahung kilang kiit diing hi.