Read Simte JAKOB 1 Bible Online

JAKOB 1 - Simte bible

JAKOB 1

¹Jakob, Pathian leh Lalpa Jesu Khrist suaah in, nam sawmlenih kithehdalhte chibai a buuh hi.

²Ka unaute, ze-etna chituamtuam na tuaah chiangun nuamna ngenin ngai un;

³Na ginna uh etkhiahna in kuhkalna a siam chih he in.

⁴Hizongleh, bangmah tasamlou a, na pum va na bukim theihna diingun kuhkalna in tong bukim heh.

⁵Na lahva koipouh in pilna a taahsap leh, mi zousiah kawma tailou leh it loua petu Pathian kawmah ngen heh; huchi'n a kawmah piah ahi diing hi.

⁶Hizongleh, ginglel hetlou in ginna nei in ngen heh. Ajiahchu ginglel mi chu tui khang lian kinawh, huih muut leeng lehleh bang ahi.

⁷Hujiahin, huchibang min chu Lalpa apat bangmah muh kigingta sih heh.

⁸Lungsim bulbaal nei lou mi chu a silbawl zousiah ah a kip sih hi.

⁹Daikawmkal a um unau chu paahtawi a, a um jiahin kipaah heh;

¹⁰Hizongleh mihausa chu suhneu a a um jiahin kipaah heh; ajiahchu hampa paah banga mang diing ahi hi.

¹¹Ajiahchu, niin a satna toh ahung suaah chiangin, hampa chu a haaivul a, huleh a umdan hoih chu a mangta hi; huchimahbangin mihausa zong a paina ah a vuai diing hi.

¹²Ze-etna thuaah teitei mi chu a hampha hi, bang jiahin ahiai i chih leh etkhiah a a um zoh chiangin Lalpa’n amah lungsiattute kawma piah a chiam, hinna lallukhuh chu a mu diing hi.

¹³Mi koimah in heem a a um chiangin, Pathian heem ka hi chi sih heh; ajiahchu Pathian chu giitlouh a heem gual ahi sih a, ama’n zong koimah a heem ngei sih hi.

¹⁴Hizongleh michin amah utna a puimang leh hiip a, a um chiangin heem in a um ahi zaw hi.

¹⁵Huleh utna in nou a paai chiangin, sual ahung hingkhia a, huleh sualin ahung pichin chiangin sihna ahung hingkhia hi.

¹⁶Ka unau deihtahte, heemin um sih un.

¹⁷Silpiah hoih leh silpiah bukim photmah chu tunglam a kipan ahi a, vaahte Pa kawm apat hungsuh ahi, amah ah chu lamdanna leh kiheina liim mawngmawng a um sih hi.

¹⁸A silsiamte laha a gah masa lawikhat i hihtheihna diingun, a utthu a thutah a ahung hin i hi uhi.

¹⁹Huchihjiahin, ka unau deihtahte, michin ngaihkhiah lamah kilawp henla, thusoi lamah kilawp sih henla, lungthah baih sih heh.

²⁰Ajiahchu mihing lungthahna in Pathian dihtatna a siam sih hi.

²¹Huchihjiahin bolhhoh zousiah leh giitlouhna dimlet chu koihmang unla, na hinna uh hundam thei thu kipsa chu thunuailuuttahin pom un.

²²Hizongleh nanguh leh nanguh kihem in, thu ngaikhetu chauh hilou in, thu juitute hi zaw un.

²³Ajiahchu koipouh thu ngaikhia chauh ahih a, a juitu ahih louh inchu, amah chu mi limlang a, a pianpih maai kien bang giap ahi.

²⁴Ajiahchu a kien a, huleh a chiah mang a, bangchibang mi ahih a kimanghilhpah hi.

²⁵Hizongleh koipouh zalenna daan bukim en a, hu a um zing a, mangngilhhaat thungaikhia hilou a, thu tongtu hizaw chu, hu mi chu a natoh ah vangpiah in a um diing hi.

²⁶Na lahva mi koipouh sahkhomitah bang a um a, a lei veeng hoih loua, amah lungtang kihem zaw chu, hu mi sahkho biah chu a thawn ahi.

²⁷Pathian leh Pa mitmuh a sahkho biah siangthou leh buahbaang lou chu, nubei pabeite leh meithaite a gimthuaah lai va veh leh, khovel a niin baang lou a kikoih zing ahi.