Read Simte JAKOB 3 Bible Online

JAKOB 3 - Simte bible

JAKOB 3

¹Ka unaute, mohtanna lianzaw tang diing i hi uh chih he in, mi tampi houtu in hung pang sih un.

²Ajiahchu sil tampi ah i bawnun i gilou uhi. Mi koipouh thusoi lama a giitlouh louh leh, hu mi chu piching ahi a, a sapum veeng thei mi zong ahi.

³Ngai un, i thu a juihna diingun sakolte kam ah siihbah i bah va; huleh a sapum uh a pumin i kaihei thei hi.

⁴Ngai un, jahaatte zong a lian mahmah na va, huih haattah muutleengin a um va, hizongleh a heehtu in a heehna neutakhat in a utna lamlamah a kiheisah hi.

⁵Huchimahbangin lei zong sapum hiang neutakhat ahi a, nasatahin a kiuangsah veu hi. Ngai dua, mei neutakhat in sil kaang nasa thei hina e!

⁶Huleh lei chu mei ahi a, i sapum hiangte lah a tatsiatna lompi chu lei ahi; huchi'n leiin sapum a bawnin a subolhhoh a pianpih hinkhua lampi chiah kualvelna chu a kaangsaha; huleh amah chu gawtmun mei in a kaang veu hi.

⁷Ajiahchu sa namkim, va namkim, guul namkim, tuilianpi a ganhing namkim khawijual theih ahi a, mite’n a khawijual thei uhi.

⁸Hizongleh lei chu koima’n a khawijual thei sih uhi; gilou um kinken thei lou, sihna gu a dim ahi.

⁹Hukhuin Pathian leh Pa ngei chu i phat va; huleh humahin Pathian batpih a siam mihingte i haamsiat jel uhi.

¹⁰Kamsung khatmah a kipatin phatna leh haamsiatna a pawtkhe veu hi. Ka unaute, hi silte chu huchibang diing hilou ahi.

¹¹Tuikhuuh in naah khat ah tui tuui leh tuui loua pawtkhesah ngei eimah?

¹²Ka unaute, theipi kungah olive a gah thei eimah? grep gui ah zong theipi a gah thei eimah? huchimahbangin chikhuuhin tuial leh tuitam a pawtkhesah thei sih hi.

¹³Na lahva koi ahiai pila thu hethei um? thunuaigolhtah leh piltahin a silbawlte chu umdan hoih in ensah heh.

¹⁴Hizongleh na lungtang va thangsiatna nasatah leh kinialna na neih uleh, uang sih unla, thudih zuausan sih un.

¹⁵Hutobang pilna chu tunglam a kipan ahi sih a, khovel leh, sapum utna leh, dawi a hung kipan ahi.

¹⁶Ajiahchu thangsiatna leh kinialna umna photah, buaina leh sualna chinteng a um veu hi.

¹⁷Hizongleh tunglam a hung kipan pilna chu a masapenin a siangthou phot a, huzohchiangin kilep a ut a, a nunnem a, a hounuam a, khotuahna leh gah hoih in a dim a, khentuam a nei sih a, a lepchiah sih hi.

¹⁸Huleh dihtatna gah chu kilepna bawlte apat a kilepna a tuh ahi.