Read Simte JAKOB 4 Bible Online

JAKOB 4 - Simte bible

JAKOB 4

¹Na lahva kidounate leh kisualnate khoia kipana hung kuan ahiai? na sapum hiangte va kidou veu, na tahsa utnate va kipana hung pawt hilou ahi maw?

²Na lunggulh va, na nei tuan sih uhi; tual na that va, na deihgoh va, na nei zou tuan sih uh; na kidou va, gaal na bawl uh, na nei diah sih uh, na nget louh jiahun.

³Na ngen va, na nget dih louh jiahun na mu sih uh, na nopsahna diing va zat na tup jiahun.

⁴Nanguh aangkawmpate leh aangkawmnute, khovel lawm hihna chu Pathian toh kimeelmaatna ahi chih he lou na hi uh maw? hujiahin koipouh khovel lawm hih ut chu Pathian meelma ahi.

⁵Hagau eimaha teengin thangse khopin ahung deih hi chih, Pathian lehkhathu in a mawh soi hi diing a gingta na hi u'maw?

⁶Hihmalahin hehpihna tamsem ahung pia hi. Hujiahin Pathian lehkhathu in, Pathian in mi kisatheite a doudaal a, kingaingiamte kawmah hehpihna a pe veu hi, a chi hi.

⁷Hujiahin Pathian kawmah kituluut un. Diabol chu doudaal un, huchi'n ahung taimangsan diing hi.

⁸Pathian naih un, huchi'n ama’n ahung naih diing hi. Misualte, na khut uh silsiang un; lungsim mumal neiloute na lungtang uh susiangthou un.

⁹Hahsa sa unla, lungdong unla, kap un; na nuihna uh lungdonna suaah henla, na nuamna uh dahna suaah heh.

¹⁰Pathian mitmuh in kingaingiam un, huchi'n ama’n ahung tawisang diing hi.

¹¹Unaute, khat leh khat kisoisetuah sih un. Mi a unau soisia a, huleh a unau soisel chu daan soisia a, daan vaihawmkhum ahi; hizongleh daan na soisel inchu, daan juitu na hi sih a, vaihawmtu na hi zaw ahi.

¹²Daan petu khat a um a, ama’n chu a hundam thei a, a suseveh thei hi; mi dang soiseltu nang koi na hiai?

¹³Tuin ngai un, nanguh, Tuni aha, jingchiang aha in, hu khopi ah i chiah diing a, hu mun ah kumkhat i va taam diing a, leiin i zuah diing va, i pung diing uh chitute:

¹⁴Ahiinlah jing chianga bang ahung um diing na he sih uhi. Na hinna uh bang ahiai? Hichu meilum tomtakhat hung kilang a, mangkiitpah bang giap ahi.

¹⁵Hu sangin, Lalpa’n pha a sah leh i hing diing a, hikhu aha, hukhu aha, i bawl diing, na chi diing uh ahi.

¹⁶Hizongleh tuin na kiuahsahnate vah nuam na sa uh; huchibang nopsahna zousiah chu sual ahi.

¹⁷Hujiahin, mi sil hoih bawl diing he a, bawl tuan lou chu, amaha diingin sual ahi.