Read Simte PETER I 3 Bible Online

PETER I 3 - Simte bible

PETER I 3

¹Huchimahbangin, nanguh jite, na pasalte uh kawm chiatah kituluut un, huchi'n koiaha in thu gingta sih mahleh, thu lou a, jite gamtatdan a zohin a um thei diing hi;

²Laudan siam kawm a na gamtatdan siangthou uh a et chiangun.

³Na kicheina u’chu polam kicheina sampheehte leh sana khi ohte, ahihlouhleh puansilh a kicheite hilou in;

⁴Lungtang a mihing thuguuh, lungsim thunuaigolh leh nunnem puansilh sethei lou hi heh, huchu Pathian mitmuh in a manpha mahmah hi.

⁵Ajiahchu hutobangmah in malai a numei siangthou, Pathian gingtate zong, amahuh pasalte thuthu a um in ana kichei uhi;

⁶Sara ngei in Abraham chu lalpa chia kou a a thu a man bangin: silhoih bawl a, heemlauna mawngmawng lau lou a na um laisiah uh Sara tate na hi uhi.

⁷Huchimahbangin, nanguh pasalte, na haamteina uh daal a, a umlouhna diingin, hinna hehpihna tangkhawm diing na hih jiahun, numei chu beel keehbaih zaw bang a ngai in, na jite u’chu paahtawi kawmin, heetna dungjuiin amahuh toh umkhawm un.

⁸A tawppen in, khat leh khat kilainattuah in, lungsim mun khat pua unla, hehpih siam unla, lungnem un;

⁹Giitlouhna giitlouhna a thuh louin, taina zong taina a thuh lou in, hizongleh vangpiahna tang diing a kouh na hi uh chih he in vangpiah zaw un.

¹⁰Bang jiahin ahiai i chih leh, hinna deih leh, ni hoihte muh ut in gilou apat a lei veeng henla, a muuh zong heemthu soilou diingin veeng hen.

¹¹Gilou tawpsan henla, silhoih bawl hen; kilemna hawl henla, delh jel hen.

¹²Ajiahchu Lalpa mit chu midihtatte tungah a tu a, huleh a bil zong a haamteina lam vah a kidoh hi; hizongleh Lalpa meel chu silgilou bawlte tungah a um veu hi.

¹³Huleh silhoih bawltute na hih uleh koi ahiai nanguh poi hung khoih diing?

¹⁴Hizongleh dihtatna jiaha na thuaah uleh na hampha uhi; ahung vauna uh lau sih unla, lung zong lungkham sih un.

¹⁵Hizongleh na lungtang vah Lalpa Pathian chu hihsiangthou unla; huleh nanguha um kinepna jiah hung dong photmahte thunuaigolh tah leh laudansiam a dawng diingin bangchih laipouhin kipeih zing un.

¹⁶Khrist a na gamtatdan hoih uh dihloutah a hung demte, silgilou bawl banga ahung soisiatna va a zum theihna diingun sialepha heetna hoihtah nei un.

¹⁷Bang jiahin ahiai i chih leh Pathian lemsah ahih inchu, silgilou bawl jiaha thuaah sangin silhoih bawl jiaha thuaah a hoihzaw hi.

¹⁸Ajiahchu Pathian kawma ahung pui theihna diingin Khrist in zong sualnate jiahin khatvei a thuaahta a, midih in midihlou luang in, tahsa in suhlup in a um a, hizongleh Hagau a suhhing in a um hi.

¹⁹Hu Hagau in a va chiah a, suangkul a um hagaute kawmah thu a va soi hi;

²⁰Hute’n nidanglai a Noah damlai a kuang bawl sung teng Pathian thuaahzohna in a ngaah laiin a thumang sih va, hu kuang ah mi tawmtakhat, huchu, mi giat tuia hutdam in a um uhi.

²¹Hu lim etsahna in baptisma in zong tuin (tahsa nitna koihmang hilou in, Pathian lama sialepha heetna hoih suhlungkimna hizaw in) Jesu Khrist thohkiitna in ahung hundam hi.

²²Amah chu vaan ah a chiahta a, angelte leh thuneihnate leh silbawltheihnate a thunuai a koih in Pathian jiatlamah a umta hi.