Read Simte PETER I 4 Bible Online

PETER I 4 - Simte bible

PETER I 4

¹Huchi'n eiuh diinga Khrist in tahsa a hung thuaahsahta ahihjiahin nanguh zong huchibang lungsim in kithuam un; ajiahchu koipouh tahsa a thuaahsa in chu sual a tawpsanta hi;

²Ahun umna laiteng tahsa a mihing utna lam banga hingta lou a, Pathian deihzawng a a hinzawh na diingin.

³Ajiahchu huuhnate, utnate, uain hainate zumun nopnate, ankuang luinate, huleh milem biahna kihdahhuaite a i umlai a, Jentelte deihzawng bawlna i tumalai hinkhuate uh a hunta hi;

⁴Hu ah chu amahuh nopbawl luatna banga na bawlve louh uh thumah a sa va, nanguh ahung soise veu uhi.

⁵Hute’n mihing leh misite vaihawm diing a kipeihsapa kawmah a tanchin uh a soi diing uhi:

⁶Bang jiahin ahiai i chih leh, tahsa a um mihingte banga vaihawmsaha a um va, hagau a Pathian banga a hin theihna diingun hikhu jiahin a kawmvah tanchinpha soi in a um ahi.

⁷Hizongleh sil zousiah tawpna diing chu a naita hi; hujiahin lungsim dihtah pua unla, haamtei kawmin pilvaang un.

⁸Huleh sil bangkim tungah phatuamngaitahin kilungsiattuah chiat un; ajiahchu kilungsiatna in sualna tampi a khuhkhum hi.

⁹Phunchiah louin khat leh khat kizintuntuah un.

¹⁰Mi chinin silpiah na muh bang jelun Pathian hehpihna chi tuamtuam kemtu hoihtahte bangin, hutein na kitohsahtuah chiat un.

¹¹Mi koipouh in thu a soi leh Pathian kam a thupawt bangin soi heh; mi koipouh in thu na a toh leh Pathian in haatna a piah bang jelin tong heh, Jesu Khrist jala Pathian chu sil bangkima paahtawia a um theihna diingin, Amah kawmah kumtuang kumtuang in paahtawina leh lalna umta hen. Amen.

¹²Deihtahte, nanguh ze-et diinga na tungva ze-etna hung tung chu sil limdang bang aha hung tung bangin ngaihtuah sih un;

¹³Hizongleh Khrist thuaahnate kikoppih na hih jiahun kipaah un; huchi'n a loupina ahung kilat chiangin nanguh zong naahpitaha nuamin na kipaah thei diing uh.

¹⁴Khrist min jiah a tai na hih uleh na hampha uhi; ajiahchu loupina Hagau leh, Pathian Hagau na tungvah a um hi; amahuh lam thu ah amah chu soisiat ahi a, hizongleh nanguh lam thu ah chu paahtawi in a um ahi.

¹⁵Hizongleh na lahvah koimah in tualthat bangin aha, guta bangin aha, silgilou bawl bangin aha, ahihlouhleh midangte silbawl soisahmi ahihjiah bangin aha thuaah sih heh.

¹⁶Ahihvangin koipouh in Khristian ahihjiaha a thuaah leh zum sih heh; hizongleh hi tungtaang jiahin Pathian paahtawi zaw heh.

¹⁷Ajiahchu Pathian innkuante lahah vaihawmna apat hun ahung tungta hi; huleh eiuh apat ahih inchu Pathian tanchinpha gingta loute tawpna chu bang ahita diai?

¹⁸Huleh midihtat bawn hutdam ahih haamhaam inchu Pathian ngaihsahloute leh mi sualte khoiah a kilangta diai?

¹⁹Huchihjiahin koipouh Pathian lemsah dungjui a thuaahte’n silhoih bawl in a hagau uh Siamtu ginumtah kawma bangin a kawmah kolsah u’hen.