Read Simte PETER II 2 Bible Online

PETER II 2 - Simte bible

PETER II 2

¹Hizongleh mite laha zawlnei tahloute zong ana um veu mah bangin, na lahva zong houtu tahloute ahung um diing uh a, amahun chu, amahuh leipa Lalpa hilhial kiheetmohbawl in, siamlouh tangsah thei gintuamnate a guuh in ahung luutpih diing va, amahuh tungah thakhat a siatna a tungsah diing uhi.

²Huchi'n mi tampiin a huuhna lam sil uh ahung chiing diing va; amahuh jiahin lam dih chu soisiat ahi diing hi.

³Huleh huaihamna jiahin zuauthu in sumkolveina diingin nanguh ahung nei diing uh: nidanglai a, a tungva vaihawmna chu a khawl sih a, a siamlouhtanna uh zong a ihmu sih hi.

⁴Ajiahchu, angelte’n sil a suhsual laiun Pathian in a hawi sih a, gawtmun ah a pai a, vaihawmsaha um diingin kokhuuh mial ah a khum zaw hi;

⁵Huchi'n amah ngaihsahlou khovel ah tuijiin tungsah in, nidanglai khovel chu a hawi sih a; hizongleh dihtatna thusoipa Noah midang sagih toh a hundamta hi;

⁶Sodom leh Gommorrah khopite chu vut suaahsah a mohtangsah in a paaikhia a, Pathian ngaihsahlou hung um diingte etsahna diingin a bawlta hi.

⁷Huleh migiloute umdan thanghuaitah jiah a lungsim na mahmah Lot midih chu a hunkheta hi.

⁸(Ajiahchu hu midihpa chu a kawmva a um laiin, a mit in a mu a, a bil in a ja a, daan lou banga a silbawlte un a lungsim dihtat chu a suna mahmah hi).

⁹Lalpa’n amah ngaihsah mite chu heemna apat hutkhiahdan leh midihtatloute chu vaihawm ni a diing a gawt di’a siitdan a he hi.

¹⁰Utna thanghuai lam a sadan banga um leh, vaihawmna simmoh mite ngeel houh vaihawm ni a diinga gawt di'a siitdan a he hi; ngolhaan leh chihhah ahi va, thupina a soisiat un zong a lau sih uhi.

¹¹Angel haat leh silbawltheite’n bawn, Lalpa ma ah a tungthu uh soisah in a soise ngam sih uhi.

¹²Hizongleh hi ganhing ngaihtuahna nei lou mat a hihmang diingte bangin a heetsiam louh uh silte a soisia va; huchi'n amahuh siatna ah a beimang veh diing uhi;

¹³Huleh suun lai a ankuang lui buai nuamsa mi ahih jiahun dihtatlouhna man a mu diing uhi. Na kawmva ankuang a lui un, amahuh kihema ankuang lui ahih jiahun, thanghuaina soisiatna ahi uhi.

¹⁴Aangkawmna mit a dim, sual tawpsan thei loute a nei uh a; mi kiploute a heempuuh va; eenhaat lungsim a pua va; haamse thuaah tate ahi uhi:

¹⁵Lampi dih a taisan va, a vaahmang va, dihtatlouhna loh ngainapa Bosor tapa Balaam lampi a juita uhi;

¹⁶Hizongleh amah chu a giitlouhna jiahin taihilh in a um a: sabiltung haamthei lou mihing haam a hung haam in, zawlnei ngolna chu a khapta hi.

¹⁷Hute chu tuitohdoh tui um lou, huih muut leeng lehleh meilum ahi uh; amahuh diingin chu mial huaisetah kumtuang a diing siit ahi.

¹⁸Ajiahchu thuloi lou chiaahjen a soi in, gilou a umte apat a suaahta zoute chu tahsa utna ah huuhna in a heempuuh veu uhi.

¹⁹Amahuh chu siatna suaah hipum in mite suaahtaatna thu a chiam veu uhi: mi zoh a a umna humah in amah chu suaah in a siam veu hi.

²⁰Ajiahchu Lalpa leh Hundampa Jesu Khrist heetna jiah a, khovel thanghuainate a nuutsiatsan nung va, humaha a taan kiit va, zoh a a um uleh, a umdan nunung u’chu a chiil a sangin a sezaw hi.

²¹Ajiahchu dihtatna lampi heet nunga, thupiah siangthou a kawmva kepsaha um chu nungngatsan sangin dihtatna lampi he lou ana hileh uh amahuh diingin a hoihzaw diing hi.

²²Ui amah luaah maha kiihkiit a, vohpi kisilsiangsa buannawi a kisil diinga kiih, chih thupil dihtah bangmahin amahuh tungah ahung um zawta hi.