Read Simte PETER II 3 Bible Online

PETER II 3 - Simte bible

PETER II 3

¹Deihtahte, tu a na kawmva ka gelh, hi lehkhathot a nihna ahi: hute geel ah heetzingna thu daanin na lungsim chiimtahte uh ka tohthou ahi:

²Zawlnei siangthoute’n ana soi masat uh thute, huleh keiuh Lalpa leh Hundampa sawllehte thupiah na heetzingna diingun:

³Hikhu he masa un, ni nununglam ah, simmoh haatte, amahuh utna ngei banga gamta ahung um diing va,

⁴Ahung kiitna thuchiam khoiah ahiai? silsiam chiil akipat sil bangkim pilepute ihmut ni a kipanin a um ngeingei bangin a um jel, a chi diing uhi.

⁵Ajiahchu hite haw a kiheetmohbawl jel uh, Pathian thuin nidanglaiin vaante ahung um a, lei zong tui apat leh tui lahah ana um hi.

⁶Huah chu hu lai a khovel um chu tui in a tuum a, a beimangta hi.

⁷Hizongleh tua um vaante leh lei chu hu thu jiah mahin Pathian ngaihsah lou mite vaihawmna leh manthatna ni a diinga siitin, mei a gawt diing a kholkhawm ahita hi.

⁸Hizongleh, deihtahte, hi sil khat he lou in um sih un, Lalpa ngaih in ni khat chu kum saangkhat bang ahi a, huleh kum saangkhat zong ni khat bang ahi.

⁹Mi khenkhat in zekai a sah bangun, Lalpa chu a thuchiam lamah a zekai sih hi: hizongleh koimah beimang deih louin, mi zousiah kisiih diing deih in eimah lamah a thuaahzou ahi zaw hi.

¹⁰Hizongleh Lalpa ni chu jan a guta bangmahin ahung tung diing hi; hu ni chiangin, vaante chu nasataha ging in a mang diing a, huleh silbulte chu mei a haaitui ahi diing, lei zong a sunga natoh umte toh haalmang in a um diing hi.

¹¹Hu silte zousiah chu huchia beimang diing ahi chih he in, umdan siangthou leh Pathian ngaihsahna lam photah mi bangchi hi diing na hi viai mah?

¹²Pathian ni hung tung diing kinem leh kilawp in; hu niin vaante chu hung kaang in a mang diing a, huleh silbulte zong mei a haaitui in a umta diing hi.

¹³Hizongleh a thuchiam dungjuiin a sunga dihtatna umna, vaan thah leh lei thah i kineppih ahi.

¹⁴Hujiahin deihtahte, hu silte kineppih na hi uh chih he in, niin baang lou leh dembei a, hamuangtah a ana um a muh na hih heetna diingun thanop suahun.

¹⁵Huleh i Lalpa thuaahzohna chu hutdamna in sim un; i unaupa deihtah Paul in a kawma piah pilna dungjui a na kawmva a gelh bangin;

¹⁶A lehkhathot zousiah ah hi silte tungtaang a soi phial hi; huah chu thu heetsiam hahsate a um a, hute chu mipillou leh mikiploute’n Pathian lehkhathu dang a ngaihkawi bang va ngaikawi in amahuh siatna diingin a zang veu uhi.

¹⁷Huchi'n deihtahte, nangun hu thute na heetlawh jiahun pilvaang un, huchilouin zaw migiloute khelhna a puimang a um in na kipna vapatin na puuhkha diing uhi.

¹⁸Hizongleh i Lalpa leh Hundampa uh Jesu Khrist hehpihna leh heetna ah hung khang lian un. Amah kawmah tu leh kumtuang in loupina um hen. Amen.