Read Simte JOHN I 2 Bible Online

JOHN I 2 - Simte bible

JOHN I 2

¹Ka tate haw, na sual louhna diingun hi thute na kawmvah ka gial ahi. Huleh mi koi aha a sual taah leh, Pa kawma hung soipihtu, Jesu Khrist midihtat i nei uhi.

²Amah chu i sualnate diing a thuphatawina ahi; eiuh sualna chauh hilou in, khovel pumpi sual thuphatawina zong ahi.

³Huleh a thupiahte i juih a ahihleh, hikhu in amah i he chih i he uhi.

⁴Amah ka he chi ngal a, a thupiahte jui lou chu mizuau ahi, huleh thutah amah ah a um sih hi.

⁵Hizongleh a thu jui photmah chu, amah ah Pathian lungsiatna a bukim tahzet ahi; hikhuin amah ah i um chih i he hi.

⁶Amah ah ka um zing chitu chu amah um bangin a umve diing ahi.

⁷Unaute, thupiah thah na kawmvah ka hung gial ahi sih a, thupiah lui, a chiil apat a na neih uh ka hung gial zaw ahi, Thupiah lui chu a chiil apat a na jah uh thu chu ahi.

⁸Huchiangleh thupiah thah na kawmvah ka hung gial ahi, huchu amah leh nanguh ah dihtahin a um hi; ajiahchu mial a beita a, tuin vaah dihtah ahung vaahta hi,

⁹Mi, vaah ah ka um chi a a unau mudah chu tutanin mial ah a um nalai ahi.

¹⁰A unau lungsiattu chu vaah ah a um zing a, amah ah kipalpuuh theihna mawngmawng a um sih hi.

¹¹Hizongleh a unau mudah chu mialah a um a, huleh mialah a leeng ahi; mialin a mit a suhtawt jiahin a chiahna lam zong a he sih hi.

¹²Tate haw, a min jiaha na sualnate uh ngaihdam ahih taah jiahin na kawmvah ka gial ahi.

¹³Pate haw, a chiil apat a um, amah na heet jiahun na kawmvah ka gial ahi. Tangvalte haw, giloupa chu na zoh taah jiahun na kawmvah ka gial ahi. Tate haw, Pa chu na heet taah jiahun na kawmvah ka gial ahi.

¹⁴Pate haw, a chiil apat a um, amah na heet taah jiahun na kawmvah ka gial ahi. Tangvalte haw, na haat va, Pathian thu nanguh a a um zing a, huleh giloupa chu na zoh taah jiahun na kawmvah ka gial ahi.

¹⁵Khovel lungsiat sih unla, khovel a sil umte zong lungsiat sih un. Mi koipouh in khovel a lungsiat inchu Pa lungsiatna amah ah a um sih hi.

¹⁶Ajiahchu khovel a sil um zousiah, tahsa utnate, mit utnate, huleh damsung kisahtheihnate chu Pathian a kipan ahi sih a, khovel a kipan ahi zaw hi.

¹⁷Khovel chu a utna toh a bei zing ahi; hizongleh Pathian deihzawng bawl mi chu kumtuang in a um zing hi.

¹⁸Tate haw, hun nunung ahita hi; Khrist doudaalpa ahung diing chih na jah bangun, tuin zong Khrist doudaal tampi a umta hi; hikhu jiahin hun nunung ahita chih i he hi.

¹⁹Amahuh chu i lah vapat a pawtdoh va, hizongleh ei u’laha mi ahi sih uhi; ajiahchu ei u’lah a mi na hitaleh uh i kawmva um zing diing hi va; hizongleh a bawnun ei u’lah a mi ahi sih uh chih kilatna diingin a pawtdoh uh ahi.

²⁰Hizongleh nangun chu Mi Siangthoupa apat thaunuh na tang va, sil zousiah na he uhi.

²¹Thutah na heet louh jiahun na kawmvah ka gial ahi sih a, na heet jiah uleh thutah a zuau mawngmawng a pawt louh jiahin ka gial ahi zaw hi.

²²Jesu chu Khrist ahi chih awilou loungal koi ahiai mizuau? Pa leh Tapa awilou mi chu Khrist doudaal ahi.

²³Mi koipouh Tapa awilou inchu Pa a nei sih a; hizongleh Tapa pom photmah inchu Pa zong a nei hi.

²⁴Hujiahin a chiil apat a na jah u’chu nanguh ah umsah zing un. Hu a chiil apat a na jah uh nanguh a a um zing inchu, nanguh zong Tapa ah leh Pa ah na um zing diing uhi.

²⁵Huleh hikhu ahi silchiam ama’n piah diing a ahung chiam chu, kumtuang hinna ngei.

²⁶Nanguh hung puimang tumte tung thu a hite ka hung gelh ahi.

²⁷Hizongleh amah apat a thaunuhna na tan uh nanguh ah a um zing a, koimah hung hilh na kiphamoh sih uhi; hizongleh hu thaunuhna mahin sil zousiah nanguh ahung hilh bangin, thutah ahi a, zuau ahi sih a, huin nanguh ahung hilh bang ngei in, amah ah na um diing uhi.

²⁸Huchi'n tate haw, amah ah um zing un; amah hung kilat chiang a kimuanna i neih theihna diing leh, ahung chiang a a ma a i zum louhna diingun.

²⁹Amah chu midihtat ahi chih na heet uleh, michin dihtatna bawl photmah chu amaha piang ahi chih na he uhi.