Read Simte JOHN I 3 Bible Online

JOHN I 3 - Simte bible

JOHN I 3

¹Ngai un, bangchilawma lungsiatna Pa in eiuh hung pia a ta’imah, Pathian tate chih a i um jiang uh! hujiahin khovel in ahung he lou uh ahi, amah a heet louh jiahun.

²Deihtahte, tuin Pathian tate i hi a, huleh bangtobangin ahiai i um diing chihchu a kilang nai tadih sih hi; hizongleh amah ahung kilat chiangin amah bangin i um diing uh chihchu i he uhi; amah chu a um bangbang a mu diing i hih jiahin.

³Huleh michin amah a hi kinepna nei photmah chu amah a sianthou bangin a kisusiangthou veu hi.

⁴Mi koipouh sual bawl in daan zong a botsia hi; ajiahchu sual chu daan bohsiatna ahi.

⁵Huleh amah chu i sualnate uh lamang diing a hung kilang ahi chih na he uhi; amah ah chu sual himhim a um sih hi.

⁶Mi koipouh amah a um zing in chu sual a bawl ngei sih; koipouh sual bawl in amah a mu sih a, he zong a he sih hi.

⁷Tate haw, kuamah heem in um sih un; dihtatna bawltu chu midihtat ahi, amah a dihtat bangmah in.

⁸Sual bawl mi chu diabol a kuan ahi, ajiahchu diabol in a chiil apatin sual a bawl zing hi. Ajiahchu Pathian Tapa hung kilatnasan chu diabol silbawlte suse diingin ahi.

⁹Mi koipouh Pathian a piangin sual a bawl ngei sih; ajiahchu a chi amahah a um hi; huleh Pathian a piang ahihjiahin sual a bawl thei sih hi.

¹⁰Hikhu ah Pathian tate leh diabol tate a kihethei hi; mi koipouh dihtatna bawl lou chu Pathian a kuan ahi sih hi, huleh a unau lungsiat lou zong Pathian a kuan ahi sih hi.

¹¹Ajiahchu, a chiil apat a thuhaah na jah u’chu hikhu ahi, khat leh khat i kilungsiat diing uh ahi, chih.

¹²Giloupa a kuan, a unaupa that, Kaina banga umlou in bang jiahin ahiai a thah mai? Amah silbawlte a hoih louh a, a unaupa a dihtat jiahin ahi.

¹³Ka unaute, khovel in nanguh ahung muhdah leh limdang sa sih un.

¹⁴Unaute i lungsiat jiahin sihna apat hinna ah i luutta hi chi'n i he uhi. Mi koipouh a unau lungsiat lou chu sihna ah a um zing ahi.

¹⁵Hizongleh ke'n chu na kawmvah ka soi ahi, Koipouh numei enlahtah a en in a lungsimah amahnu toh a aangkawm zouta ahi.

¹⁶Hikhu ah Pathian lungsiatna i hethei uhi, ama’n eiuh diinga a hinna a piahkhiah jiahin; huleh eiun zong unaute diinga i hinna i piah ve diing uh ahi.

¹⁷Hizongleh mi koipouh in khovel sil hau henla, a unau tasam in mu in, amah chu lainat het sih leh, bangchi'n Pathian lungsiatna amah ah a um diai?

¹⁸Ka tate haw, thu chauh in i lungsiat sih diing a, kam chauh in zong i lungsiat sih diing uh; hizongleh silbawl leh thutah in hizaw hen.

¹⁹Hikhu ah thutah a kuan i hi uh chih i he a, huleh amah ma ah i lungtang uh i muangsah thei diing uhi.

²⁰Ajiahchu i lungtang un siamlouh ahung tansah leh, Pathian chu i lungtang sangin a loupizaw a, sil zousiah a he hi.

²¹Deihtahte, i lungtang in siamlouh ahung tansah louh leh Pathian lamah i haang ahi.

²²Huleh a thupiahte i juih a, a mitmuh a sil kipaahhuaite i bawl jiahin i nget photmah amah apat i mu hi.

²³Huleh a thupiah chu hikhu ahi. Eihaw’n a Tapa Jesu Khrist min i gintaat a, huleh thu ahung piah banga khat leh khat i kilungsiat diing uh ahi, chih.

²⁴Huleh mi koipouh a thupiah jui chu Amah ah a um a, Amah zong amah ah a um hi. Huleh hikhu ah amah chu eiuh ah a um zing chih i he uh, Hagau ahung piah ah.