Read Simte JOHN II 1 Bible Online

JOHN II 1 - Simte bible

JOHN II 1

¹Upa in, numei teel leh a tate, thutah a ka lungsiatte kawmah; huleh keimah chauh hilouin thutah he zousiah in zong ahi.

²Ei u’a um, huleh kumtuang a zong i kawma um diing thutah jiahin.

³Pa Pathian akipan leh Lalpa Jesu Khrist, Pa Tapa akipan hehpihna leh khotuahna leh hamuanna chu thutah leh lungsiatna in na kawmvah um hen.

⁴Pa kawm akipan a thupiah i muh banga na tate khenkhat thutah a um ka muh jiahin ka kipaah mahmah hi.

⁵Huchi'n, numeipha, thupiah thah gial bang chu hilouin, a chiil a kipana i neih uh gial zawin, khat leh khat kilungsiattuah diingin ka hung ngen hi.

⁶Huleh hikhu ahi lungsiatna, a thupiahte banga i um chu. Thupiah chu hikhu ahi, A chiil a kipana na jah bang va humah ah na um diing uh ahi.

⁷Bang jiahin ahiai i chih leh, Jesu Khrist tahsa in ahung chih gum lou heemtu tampi khovel ah a umdohta hi. Hutobang mi chu heemtu leh Khrist doudaaltu ahi.

⁸I tohkhiahsate mangsah lou a, kipaahman a kim a i muhtheih zawh na diingun kiveeng un.

⁹Mi koipouh daan bohsia leh, Khrist thuhilhna daan a um zing louin Pathian a nei sih hi, Khrist thuhilhna daan a um zing mi’n chu Pa leh Tapa a nih in a neikhawm hi.

¹⁰Mi koipouh hi kihilhna thu keng lou a na kawmva hung a um leh na inn vah tungsah sih unla, kampha in zong ha sih un.

¹¹Ajiahchu kampha a hatu chu amah giitlouhna kikoppih ahi.

¹²Na kawmva thu tampi hung gelh diing ka neih vangin lehkhapuan leh lehkhatui in ka gial nuam sih diing hi; hizongleh hung a, i kipaahna uh a kim theihna diingin kimaaituah a hung soi ka kinem hi.

¹³Teel a um na unaunu tate’n chibai ahung buuh uhi. Amen.