Read Simte JOHN III 1 Bible Online

JOHN III 1 - Simte bible

JOHN III 1

¹Upa deih mahmah Gaia, thutah a ka lungsiat kawmah.

²Deihtah, sildang zousiah sangin, na hagau khantouh jel banga na khantouh diing leh damtaha na um diing deihin ka ngen hi,

³Ajiahchu unaute a hung a, thutah a na umdan banga nangmaha thutah um ahung heetsah tahun ka kipaah mahmah hi.

⁴Ka tate thutahah a um uh chih ka jah sanga kipaahna lianzaw ka nei sih hi.

⁵Deihtah, unaute tung leh mikhualte tunga na bawl photmah ginumtahin na bawl veu hi.

⁶Hute’n chu na lungsiatna kouhtuam ma ah a phuangta uhi; a khualzinna va Pathianmi bangtah a na makaih jel leh na bawl hoih diing hi.

⁷A min jiaha Jentelte kawma bangmah la lou a chiahdoh ahihjiahun.

⁸Hujiahin thutah a kipanpihtuahte i hihtheihna diingin hutobang mi chu i ngaih diing ahi.

⁹Kouhtuam kawmah ka gial a; hizongleh a lahva tungtuan utpa Diotrephi in keiuh ahung ngai sih hi.

¹⁰Huchihjiahin, ka hung lechu, a silbawlte ka hedohsah diing hi; ka tungva thu gilou soi a, a kamtam dan, huleh huzong hun sa louin, amah ngei in unaute a hua a, huleh a deih, nuamte zong a khap a, kouhtuam apat a nohdoh hi.

¹¹Deihtah, sil gilou jui sinla, sil hoih jui zaw in. Sil hoih bawlmi chu Pathian a kuan ahi; ahihvangin sil gilou bawlmi’n chu Pathian a mu sih hi.

¹²Demetria in mi zousiah apat leh, thutah apat ngei in pahtaat a loh hi; ahi, kei un zong ka heetpih uhi, huleh ka heetpihna u’chu a dih ahi chih na he uhi.

¹³Gelh diing tampi ka nei a, hizongleh lehkhapuan leh lehkhatui in na kawmah ka gial sih diing hi;

¹⁴Himahleh sawtlou kalin ka hung mu diing a, kimaaituah in thu i soi diing chih ka kinem hi.

¹⁵Hamuanna na tungah um hen. I lawmte'n chibai ahung buuh uhi. I lawmte minloh chiatin chibai hung na buuhsah in.