Read Simte THUPHUANDOH 11 Bible Online

THUPHUANDOH 11 - Simte bible

THUPHUANDOH 11

¹Huin sialluang chiang tobang khat ahung kipia a; huleh angel chu a ding a, ka kawmah, Thou inla, Pathian biahinn leh, maitaam leh, a sunga betute teh in.

²Hizongleh biahinn polam chu nusia inla, teh sin; ajiahchu hichu Jentelte kawma piah ahita hi; huleh khopi siangthou chu amahun ha sawmli leh ha nih a tuandeen diing uhi.

³Huleh ka heetpihtu nihte kawmah silbawltheihna ka pe diing a, amahun saiip puan silh in ni saang khat leh za nih leh sawmguup sung thu a soi diing uhi, a chi a.

⁴Hite chu olive sing nihte leh, leitung Pathian ma a ding thaumeitunna nihte ahi uh.

⁵Mi koipouh in amah uh a suhnat leh a kam vapata mei hung pawtdoh in a meelmate uh a kaanggam a; huleh mi koipouh in amahuh a suhnat leh huchibangmah a thah in a um diing hi.

⁶Hite’n chu a thusoi hun sung va guahzut louhna diingin vaan khaah theihna thahaatna a nei va; huleh tui sisan suaahsah theihna leh, a ut thuthu va leitung gawtna chinteng a gawt theihna thahaatna a nei uhi.

⁷Huleh a heetpihna thusoi uh a zoh chiangun kokhuuh tobei apata hung pawtdoh gamsa in amahuh a dou diing a, a zou diing, huleh a that diing hi.

⁸Huleh a luang u’chu hagaulama Sodom leh Aigupta kichi, i Lalpa u’zong kilhbeha a umna khopi loupitah kotzing ah a lum diing hi.

⁹Huleh mipite leh, phung chin leh, haam chin leh, nam china mite’n ni thum leh a kim a luang uh a en diing va, a luang u’chu vui diing a phal sih diing uhi.

¹⁰Huleh leitung a teengte chu amahuh tungah a nuam diing va, kipaahna a bawl diing va, huleh silpiahte a kithottuah diing uh; ajiahchu hi zawlnei nihte’n leitung a teengte a bawl gim mahmah uhi.

¹¹Huleh ni thum leh a kim zouin Pathian akipan hinna hagau a sungvah a luut a, a keeng un a dingta uh; huleh amahuh mute tungah launa nasatah a tungta hi.

¹²Huin amahun vaan akipana aw ngaihtahin, Hi lamah hungtou un, a kawmva a chih a ja va. Huleh amahuh chu meilum lahah vaan ah a kaltouta va; a meelmate un amahuh a mu uhi.

¹³Huleh hu laitahin zil nasatahin a kiliing a, khopi mun sawma khen munkhat a chimta a, huleh hu ziilling ah mi saang sagih thah in a umta hi; a mawh teng chu a lau mahmah va, vaan Pathian kawmah loupina a peta uhi.

¹⁴Tunggihna nihna a beita a; ngai in, tunggihna thumna chu hung tungpah diing ahi,

¹⁵Huleh angel sagihna in a muut a; vaan ah aw ngaihtah a ging a, khovel lalgamte chu i Lalpa uleh a Khrist lalgam ahung hita; amah chu kumtuang kumtuang in lal in a tou diing hi, chi'n.

¹⁶Huin Pathian ma a, a laltouphah va tou upa sawmnih leh li te chu a khupboh in a puuh va, Pathian a bia va,

¹⁷Nang ka hung phat uhi, Aw Lalpa Pathian Bangkimbawlthei, um zing leh, umta leh, hung um diing; ajiahchu nangma’n na silbawltheihna loupitah na lata a, huleh lal in na touta hi.

¹⁸Namte chu a thangtawm va, huleh nang lungthahna chu ahung tungta, huleh misite vaihawmsahna diing leh, na suaah zawlneite leh, misiangthoute leh, na min laute, mi lian leh mi neute kawma kipaahman piahna hun leh; leitung susetute na suhsiatna diing hun chu ahung tungta hi, chi'n.

¹⁹Huin vaan ah Pathian biahinn a kihongta a, a biahinn sunga a thuhun bawm ahung kimu a; huleh kawlphe bang, awging bang, vaanging bang, ziilling bang, huleh gialkia nasatah bang ahung umta hi.