Read Simte THUPHUANDOH 12 Bible Online

THUPHUANDOH 12 - Simte bible

THUPHUANDOH 12

¹Huleh vaan ah sillimdang loupitah ahung kilang a; numei khat, ni a kithuam, a keeng nuaia hapi um, huleh a lutung a aahsi sawmlenih tuang lallukhuh khuh ahung um a.

²Amahnu chu naupaai ahi a, nausuaah diing a natna thuaah in a kap a.

³Huin sillimdang vaan ah ahung kilang kiit a; ngai in, dragon san lianpi, lutang sagih leh ki sawm nei, a lutung a lallukhuh sagih khuh ahung um a.

⁴A mei in vaan a aahsi mun thum a khen mun khat a kai a, lei ah a paaikheta a; huleh a nau a suaah phaatphaat ana valhzoupah diingin dragon chu numei nausuaah diing nu ma ah a ding hi.

⁵Huleh amahnu in chu ta pasal, nam zousiah tunga siihchiang a vaihawmtu diing khat ahung neikheta a; huleh a ta chu Pathian leh a laltouphah kawmah laahtouh in a umta hi.

⁶Huleh numeinu chu ni saang khat leh ni za nih leh ni sawmguup a khoi theihna diingun, gamdai ah, Pathian in a bawlsah munah a taimangta hi.

⁷Huin vaan ah kidouna a um a; Mikael leh a angelte’n dragon a dou va; huleh dragon leh a angelte’n zong a dou uh.

⁸Huleh a zou sih va, a mun u’zong vaan a muh in a um nawmta sih hi.

⁹Huleh dragon lian chu paihdoh in a umta a, hu guulpi teeh, Diabol leh Setan kichi, khovel pumpi heemtu chu; amah chu leitung ah paihkhiah in a umta a, a angelte zong amah toh paihkhiah in a um uhi.

¹⁰Huleh vaan ah aw ngaihtahin, Tuin chu i Pathian uh hutdamna leh, thahaatna leh, lalgam leh, a Khrist thuneihna ahung tungta hi; ajiahchu i unaute uh heehtu chu paihkhiah in a umta hi, ama’n a suun a jan in i Pathian ma ah amahuh a heeh hi.

¹¹Huleh amahun Belaamnou sisan jiah leh, a heetpihna thu uh jiahin amah chu a zouta va; huleh sih tanphain a hinna uh a it sih uhi.

¹²Hujiahin nanguh vaan leh a sunga teengte kipaah un. Leitung leh tui khang liana teengte tung a gih hi; ajiahchu hun tomtakhat a neita chih a heet jiahin Diabol chu lungthah mahmahin na kawmvah ahung suhta ahi.

¹³Huleh dragon in leitung a paihkhiah ahi chih a kiheet tahin hu numei ta pasal neinu chu a gawtta a.

¹⁴Hu numei chu gamdai ah, hu guul muhphaahlouh a hun khat leh, hunte leh, hun kimkhat chawm a, a umna diing muna a leenluut theihna diingin mupi liantah haa nih piah ahi.

¹⁵Huleh guul inchu numeinu tui a tohmangsah theihna diingin a nungah lui lianpi bangmai in a kam apat tui a phihdoh a.

¹⁶Huleh leiin numeinu a panpih a, leiin a kam a kaah a, hu guul in a kam apat a phihdoh tuilian chu a valh beita hi.

¹⁷Huleh dragon chu numeinu tungah a lungthah a, a chihaah umsun Pathian thupiah juite leh, Jesu Khrist heetpihna thu pomtute dou diingin a kuanta hi.