Read Simte THUPHUANDOH 17 Bible Online

THUPHUANDOH 17 - Simte bible

THUPHUANDOH 17

¹Huleh belhbu sagih tawi angel sagihte laha khat a hungdoh a, ahung kihoupih a, ka kawmah, Hilamah hung in; tui tampi tunga tou nohchizuahnu loupitah tung vaihawmna ka hung musah diing;

²Lei a kumpipate’n amahnu a kingaihpih va, huleh a mingaihhaatna uain in leitung a teengte dawnkhamsah in a um uhi, a chih a.

³Huleh ama’n kei chu hagau in gamdai ah ahung pomangta a; huleh numei khat, Pathian soisiatna mina dim, lutang sagih leh ki sawm nei gamsa sandup tunga tou ka mu a.

⁴Huleh hu numei chu puan sandup leh sandaang in a kichei a, sana leh suang mantam leh tuikep suang in a kijem a, a mingaihhaatna kihdah um leh bolhhohna a dim sana nou chu a khut in a tawi hi.

⁵Huleh a tal ah min khat thuguuh kiphual, Babylon loupi, nohchizuahte leh leitunga kihdahhuaite nu, chih a kigial hi.

⁶Huleh hu numei chu misiangthoute sisan leh, Jesu martarte sisan dawnkham in ka mu a; huleh amahnu ka muh tahin limdang leh thumah ka sa mahmah hi.

⁷Huleh angel in ka kawmah, Bang diinga thumah sa na hiai? hu numei leh a tuanna, lutang sagih leh ki sawm nei gamsa thuguuh ka hung hilh diing hi.

⁸Hu na gamsa muh chu a umta a, huleh a um sih a, huleh kokhuuh tobei apat ahung pawtkhe diing a, manthaina ah a pailuut diing hi; huleh khovel siam chih apata hinna lehkhabu a, a min uh kigial lou leitung a teengte’n hu gamsa um lou leh, umta leh, hung um diing chu a muh chiangun limdang a sa diing uhi.

⁹Hi ah pilna lungsim a um hi. Lutang sagihte chu numeinu touna taang sagihte ahi uhi.

¹⁰Huleh kumpipa sagih a um a; ngaa chu a puuhta a, khat a um a, huleh khat chu ahung tung nai tadih sih; ahung hun chiangin tomtakhat sung a um diing hi.

¹¹Huleh hu gamsa umta a, huleh um lou chu, amah ngei chu giatna ahi a, huleh sagihte laha ahi, huleh manthaina ah a chiah hi.

¹²Huleh hu ki sawm na muhte chu kumpipa sawmte, lalgam mu nai tadihloute ahi uhi; hizongleh amahun gamsa toh pungkal khat sung kumpipate banga thuneihna a nei uhi.

¹³Hite’n chu lungsim munkhat a pua va, huleh gamsa kawmah a thuneihna uleh a haatna uh a pe diing uhi.

¹⁴Hite’n chu Belaamnou a kidoupih diing va, Belaamnou in amahuh a zou diing hi; ajiahchu amah hi lalpate Lalpa leh kumpipate Kumpipa ahi; huleh amah toh umte chu kouhte, teelte, huleh ginumte ahi uhi, a chi a.

¹⁵Huleh ama’n ka kawmah, Nohchizuahnu touna, na tui muhte chu mite leh, mipite leh, namte leh haamte ahi uhi.

¹⁶Huleh gamsa tunga ki sawm na muh haw, hite’n chu nohchizuahnu a haw diing va, ta vai leh saguah in a bawl diing va, a sa a ne diing uh, huleh meiin a haalmang diing uhi.

¹⁷Ajiahchu Pathian thute suhtaangtung a, a um masiah amah deihzawng a bawl theihna diing uleh, a lalgam uh gamsa kawma a piah theihna diing uh Pathian in a lungtang vah a koihta hi.

¹⁸Huleh hu na numei muh chu hu khopi loupi, leitung a kumpipate tunga vaihawmtu chu ahi, a chi a.