Read Simte THUPHUANDOH 2 Bible Online

THUPHUANDOH 2 - Simte bible

THUPHUANDOH 2

¹Ephesa khua a kouhtuam angel kawmah hichi'n gial in; A khut jiatlam a aahsi sagih tawipa, sana thaumeitunna sagih laia vaah lehlehpa’n hi thute a soi hi;

²Na natohte, na tohgimnate, na kuhkaldan, huleh migilou haw na thuaahtheih louhdan, huleh hiloupi a sawlleh ka hi uh chi haw na etkhiah a mi zu an a hihdan uh na matdoh leh;

³Na thuaahzoh a, na kuhkal a, huleh ka min jiaha na tohgimdan leh na chauh louhdan ka he hi.

⁴Hizongleh demna khat ka hung nei hi, na lungsiatna masapen na nuutsiat taah jiahin.

⁵Hujiahin na puuhna laitah he inla, kisiih in; huleh natoh masapente bawl kiit in; ahihlouh inchu kintahin na kawmah ka hung diing a, na thaumeitunna chu a mun a kipanin ka suan diing hi, na kisiih louhleh.

⁶Ahihvangin hi thu ah na hoih hi, Nikolaitan pawlte natoh na huat ah, huchu ke’n zong ka hua hi.

⁷Bil nei taphot in kouhtuamte kawma Hagau thusoi chu ja heh; A gualzoupa kawmah Pathian paradis lailunga um hinna singa neeh diing ka pe diing hi, chi'n.

⁸Huleh Smarna khua a kouhtuam angel kawmah hichi'n gial in; Amasapen leh a nunungpen, si a hing kiitpa in hi thute a soi hi;

⁹Na natohte leh, gimthuaahte leh, na zawndan (hizongleh na hausa hi) ka he hi, huleh Judami hiloupi a ka hi uh chi, Setan kikhopna inn hingal, hute Pathian soisiatna ka he hi.

¹⁰Na hung sil thuaah diingte lau sin; ngai in, etkhiah a na um theihna diingun diabol in na lahva khenkhat chu suangkul aha hung khum diing a, ni sawm sung gimthuaahna na nei diing uh; sih tanphain ginum in, huchi'n hinna lallukhuh ka hung pe diing hi.

¹¹Bil nei taphot in kouhtuamte kawma Hagau thusoi chu ja heh. A gualzoupa chu sih nihna suhnat in a um sih diing hi, chi'n.

¹²Huleh Pergamos khua a kouhtuam angel kawmah hichi'n gial in; Amah namsaau taattuah hiamtah neipa’n hi thute a soi hi.

¹³Na natoh leh na umna mun, Setan touna ngei chu ka he hi; huleh ka min na pomkip a, ka martar ginum, Antipa, Setan teenna na lahva thah a, a um laiin zong na hung ginna na phatsan sih hi.

¹⁴Hizongleh demna sil themkhat ka hung nei hi, ajiahchu Balaam thuhilhna juite huah na umpih a, ama’n chu Israel tate ma a puuhna siam diing leh, milim biahna sa ne diing leh, aangkawmna sual bawl diingin Balak a thuhilh hi.

¹⁵Huchimahbangin Nikolaitan pawlte thuhilhna jui mi khenkhat zong na nei a, huchu ka hua hi.

¹⁶Kisiih in, huchilou inchu kintahin na kawmah ka hung diing a, ka kama pawt namsaau in amahuh ka dou diing hi.

¹⁷Bil nei taphot in kouhtuamte kawma Hagau thusoi chu ja heh. A gualzoupa kawmah manna phualguuh a neeh diing ka pe diing a, suang kaang khat, hu suang tung a minthah, a tangtu loungal midang koima’n a heet louh kigial ka pe diing hi, chi'n.

¹⁸Huleh Thyatira khua a kouhtuam angel kawmah hichi'n gial in; Pathian Tapa, mei kuang bangmai mit nei a, sumeng tobang keeng neipa’n hi thute a soi hi;

¹⁹Na natohte, na itnate, na natohsahte, na ginnate huleh na kuhkalnate ka he hi; huleh na silbawl masapen sangin a nunungpen a tamzaw hi.

²⁰Ahihvangin demna sil themkhat ka hung nei hi; hu numei Jezebel na ngaihtheih jiahin, ama’n amah le amah zawlnei ka hi kichi'n ka suaahte aangkawmna sual bawl diing leh, milim biahna sa ne diingin a hilh a, a heemgawp hi.

²¹Amahnu chu a aangkawmna apat kisiih diingin hun ka pia a; hizongleh a kisiih sih hi.

²²Ngai in, amahnu chu lupna ah ka paai diing a, huleh a aangkawmpih haw chu gimthuaahna loupiah ka puiluut diing hi, a silbawl uh a kisiih louh uleh.

²³Huleh a tate chu sihna in ka that diing a; huleh kouhtuam zousiah in kei chu lungsimgil leh lungtang hawlpa ka hi chih a he diing uh; huleh na bawnun na natoh dungjuiun ka hung pe chiat diing hi.

²⁴Hizongleh nang leh Thyatira khua a um, hi kihilhna nei lou leh, a soi uh banga Setan thugilte he lou midang zousiah kawmah ka soi ahi: tunggihna dang mawngmawng na tungvah ka koih sih diing hi.

²⁵Hizongleh hu na neihsa u’chu ka hung masiah tukip un.

²⁶Huleh a gualzoupa leh a tawpdong a ka nate kempa chu, a kawmah namte tunga thuneihna ka pe diing hi;

²⁷Huleh ke’n zong ka Pa a kipana ka muh bang ngei in ama’n a tungvah beel kheengtu beel a halhal a, a keeh bangin siih chiangin vai a hawm diing hi.

²⁸Huleh amah chu jingsol aahsi ka pe diing hi.

²⁹Bil nei taphot in kouhtuamte kawma Hagau thusoi chu ja heh.