Read Simte THUPHUANDOH 21 Bible Online

THUPHUANDOH 21 - Simte bible

THUPHUANDOH 21

¹Huin ke’n vaan thah leh lei thah ka mu a; ajiahchu vaan masa leh lei masa chu a paimangta a; tui khang lian zong a um nawn sih hi.

²Huleh kei John in khopi siangthou, Jerusalem thah chu, mou a pasal a diing a kichei banga bawlzohsa a Pathian a kuana vaan apata hung kumsuh chu ka mu hi.

³Huleh vaan akipan aw ngaihtah khat in, Ngai in, Pathian biahbuuh chu mihingte lahah a umta hi, amah chu a lahvah a teeng diing a, amahuh chu a mite ahi diing va, Pathian amah ngei a kawmvah a um diing a, huleh a Pathian uh ahi diing hi.

⁴Huleh Pathian in a mit vapat mittui zousiah a siaah siangsah diing hi; huleh sihna a um nawn sih diing a, lungkhamna leh, kahna leh, natna zong a um nawn sih diing hi; ajiahchu sil masate teng a paimangta hi, a chih ka ja hi.

⁵Huleh laltouphah tunga toupa’n, Ngai in, sil zousiah ka siam thah hi, a chi a. Huleh ama’n ka kawmah, Gial in; ajiahchu hi thute hi a dih in a ginum ahi, a chi a.

⁶Huleh ama’n ka kawmah, bawl zoh ahita. Kei Alpha leh Omega, abul leh atawp ka hi. Dangtaah photmah kawmah hinna tui luikhuuh a, a thawn in ka pe diing hi.

⁷A gualzoutu in chu sil zousiah a luah diing a; huleh a Pathian ka hi diing a, amah zong ka ta ahi diing hi.

⁸Hizongleh meidawite leh, gingtaloute leh, kihdahumte leh, tualthatte leh, tohuuhte leh, bumhaatte leh, milimbete leh, zuau haatte zousiah tan diing chu mei leh kaat a kaang diil ahi a; huchu sih nihna ahi.

⁹Huleh gawtna sagih nunungpen a dim belhbu sagih tawi angel sagihte laha khat ka kawmah a hung a, ahung houpih a, Hilamah hung in, mou, Belaamnou ji chu ka hung ensah diing hi, a chih a.

¹⁰Huin ama’n hagau in taang saang liantah tungah ahung puita a, huleh hu khopi loupitah, Jerusalem siangthou, Pathian a kuana vaan apata hung kumsuh chu ahung ensah a.

¹¹Pathian loupina a nei a; a vaah chu suang mantampen bang, jasper suang bang ahi a, Khristal suang tobang a val ahi.

¹²Huleh kulhbaang nasatah leh saangtah a nei a, kot sawmlenih a nei a, huleh hu kotte ah chu angel sawmlenih a um hi, huleh hu kotte tungah min kigial a um a, hute chu Israel nam sawmlenihte min ahi.

¹³Suahlam ah kot thum; maallam ah kot thum; simlam ah kot thum; huleh tumlam ah kot thum a um hi.

¹⁴Huleh khopi kulbaang in innbulphuh sawmlenih a nei a, huleh hute tungah Belaamnou sawlleh sawmlenihte min a tuang hi.

¹⁵Huleh amah kei hung houpihpa’n, hu khopi leh, a kotte leh, a kulhbaang tehna diingin tehna sana chiang a tawi a.

¹⁶Huleh a khopi chu ning li kibang nei in a um a, a dunglam chu a vailam chia ahi a; huleh ama’n hu chiangin khopi chu a teh a, farlong siing khat leh saang nih; A dunglam leh a vailam leh a saanlam a kibang hi.

¹⁷Huleh ama’n kulhbaang chu a teh a, mihing tehna a tehin, (huchu angel tehna ahi a) tong zakhat leh tong sawmli leh tong li ahi.

¹⁸Huleh a kulhbaang chu jasper suang a kibawl ahi a; a khopi chu sana sianga kibawl limlang bang mai ahi;

¹⁹Huleh khopi kulhbaang innbulphuh chu suang mantam chi chintenga jep ahi. Huleh a innbulphuh masapen chu jasper suang ahi a; a nihna chu sapphire suang ahi a; a thumna chu kalsidoni suang ahi a; a lina chu emerald suang ahi a;

²⁰A ngaana chu sardonix suang ahi a; a guupna chu sardia suang ahi a; a sagihna chu krisolit suang ahi a; a giatna chu beril suang ahi a; a kuaahna chu topaz suang ahi a; a sawmna chu krisopra sa suang ahi a; a sawmlekhatna chu jasinth suang ahi a; a sawmlenihna chu amethist suang ahi.

²¹Huleh a kot sawmlenihte chu tuikep suang sawmlenih ahi a; a kot chin chu tuikep suang khata bawl ahi; huleh khopi kotzing chu sana a bawl, limlang etpailet theih bang ahi.

²²Huleh huah chu biahinn mawngmawng ka mu sih hi; ajiahchu Lalpa Pathian Bangkimbawlthei leh Belaamnou chu a biahinn ahi mai uhi.

²³Huleh hu khopi inchu a taanvaah diingin ni a ngai sih a, ha zong a ngai sih hi; ajiahchu Pathian loupina in hichu a taanvaah a, huleh Belaamnou chu a thaumei ahi mai hi.

²⁴Huleh hutdama um namte chu hu vaah ah a leeng diing va, leitung a kumpipate’n a loupina uleh a zahumna uh a poluut diing uhi.

²⁵Huleh a kotte chu suun in a kikhaah ngei het sih diing; ajiahchu hu munah jan a um sih diing hi.

²⁶Huleh amahun hu sungah namte loupina leh zahumna ahung poluut diing uhi.

²⁷Huleh hu sung a’chu bangchihmahin silbolhhoh leh, kihdahhuai bawl leh, zuau bawl himhim a luut sih diing a; hizongleh Belaamnou hinna lehkhabu a min tuangte chauh a luut diing uhi.