Read Simte THUPHUANDOH 22 Bible Online

THUPHUANDOH 22 - Simte bible

THUPHUANDOH 22

¹Huin ama’n hinna tui lui chiimtah, Khristal suang banga val, Pathian leh Belaamnou laltouphah apata hung pawtkhia ahung ensah a.

²Hu khopi kotzing lailung leh a luipang tuaah ah gah chi tuamtuam sawmlenih nei, huleh ha china gah, hinna singkung a um a; huleh hu sing nah chu namte suhdamna diing ahi.

³Huleh hu ah haamsia mawngmawng a um nawn sih diing a; hizongleh Pathian leh Belaamnou laltouphah a um zawta diing hi; huleh a suaahte’n ana a tohsah diing uhi.

⁴Huleh amahun a meel a mu diing va; a min chu a tal vah a tuang diing hi;

⁵Huleh huah jan a um nawn sih diing a; thaumei vaah leh ni vaah zong a ngai nawn sih diing uh; ajiahchu Lalpa Pathian in amahuh a taan vaah diing a; huleh amahun kumtuang kumtuang in vai a hawm diing uhi.

⁶Huleh ama’n ka kawmah, hi thute hi a ginum in a dih ahi, huleh zawlnei siangthou Lalpa Pathian in sil kibawlpah diingte chu a suaahte musah diingin a angel a sawlta hi.

⁷Ngai in, kintahin ka hungpah ngei diing hi; hi lehkhabu a soilawhna thute jui photmah chu a hampha hi, a chi a.

⁸Huleh kei John in hi silte ka mu a, ka ja hi. Huleh ka jaha ka muh tahin hi silte hung musahtu angel keeng bulah be diingin ka puuhta a.

⁹Huin ama’n ka kawmah En in, hibang bawl hial sin; kei chu nang leh, na unau zawlneite leh, hi lehkhabua thu kisoite juihaw suaah tanpih ka hi; Pathian bia in, a chi a.

¹⁰Huleh ama’n ka kawmah, hi lehkhabua soilawhna thute khaahkhum sin; ajiahchu ahun tung diing ahita hi.

¹¹Mi dihlou chu dihlou in um nalai heh, mi bolhhoh chu bolhhoh in um nalai heh; huleh mi dihtat chu dihtat in um nalai heh, mi siangthou chu siangthou in um nalai heh.

¹²Ngai in, kintahin ka hung hi; huleh michin a silbawl bang jel a piah diing ka kipaahman ka kawmah a um hi.

¹³Kei Alpha leh Omega, a patna leh a tawpna, a masapen leh a nunungpen ka hi.

¹⁴Hinna singkunga tan a neih theihna diing uleh, kota khopi sunga a luut theihna diing va a puansilhte uh sawpsiangte chu a hampha uhi.

¹⁵Ajiahchu polamah uite, bumhaatte, tohuuhte, tualthatte, milem bete, huleh koipouh zuau ngaina leh bawlte a um uhi.

¹⁶Kei Jesu in kouhtuamte diinga hi thute na kawma hung hesah diingin ka angel ka hung sawl hi. Kei David zungpi leh a haah, huleh jingsol aahsi taang chu ka hi, a chi a.

¹⁷Huleh Hagau leh mou in, Hung in, a chi uhi. Huleh a ja taphot in, Hung in, chi heh. Huleh koipouh a dangtaah chu hung heh. Huleh a ut taphot in hinna tui a thawnin la heh.

¹⁸Ajiahchu koipouh hi lehkhabu a soilawhna thute ja taphot kawmah ka hesah hi, Mi koipouh in hi thute a behlap inchu, Pathian in hi, lehkhabu a kigial gawtnate a tungah a behlap diing hi.

¹⁹Huleh mi koipouh in hi soilawhna lehkhabu thute apat a laahmang inchu hinna singkung leh, khopi siangthou leh, hi lehkhabua kigial silte apat a tan diing chu Pathian in a laahmangsah diing hi.

²⁰Hi thute hesahtu in, Ka hungpah ngei diing hi, a chi hi. Amen. Huchi hi heh, hungta in, Lalpa Jesu.

²¹I Lalpa Jesu Khrist hehpihna chu na bawnva kawmah umta hen. Amen.