Read Simte THUPHUANDOH 3 Bible Online

THUPHUANDOH 3 - Simte bible

THUPHUANDOH 3

¹Huleh Sardis khua a kouhtuam angel kawmah hichi'n gial in; Pathian Hagau sagih leh, aahsi sagih neipa’n hi thute a soi hi; Na natohte ka he hi, hing min na pua a, hizongleh si na hi.

²Kiveeng inla, sil um nalai, si dehdehte chu suhaat in; ajiahchu na natoh Pathian mitmuh ah bukimin ka mu sih hi.

³Hujiahin na muhdan leh na jahdan ngaihtuah inla, tukip in, huleh kisiih in. Huchia na kiveen louh inchu guta bangin na kawmah ka hung diing a, huleh bangchih hun a na kawm ka hung tun diing na he sih diing hi.

⁴Ahiinlah, Sardis khua ah a puante uh subuah lou min tawmtakhat na nei hi; huleh amahuh chu kei toh puan vaam silh in a leeng diing uh; huchitaah ahih jiahun.

⁵A gualzoupa chu huchimahin puan vaam silhsah ahi diing a; huleh a min chu hinna lehkhabu apat ka nawtmang sih diing, hizongleh ka Pa ma leh, a angelte ma ah a min ka gum diing hi.

⁶Bil nei taphot in kouhtuamte kawma Hagau thusoi chu ja heh, chi'n.

⁷Huleh Philedelphia khua a kouhtuam angel kawmah hichi'n gial in; Amah siangthou leh dih, amah David chabi neipa, a hon chianga koima’n a khaah theih louh, huleh a khaah chiang a koima’n a hon theih louhpa’n hi thute a soi hi;

⁸Na natohte ka he hi; ngai in, na ma-ah koimah khaah theih louh kot kihong ka koih hi; ajiahchu thahaatna neutakhat na nei a, ka thu na kol zing a, huleh ka min na kiheetmohbawl sih hi.

⁹Ngai in, Setan kikhopna inn a mi, Judami hiloupia ka hi chia zuau soite; ngai in, hute chu ka hung pia a, amahuh chu hungin na keengbulah ka hung besah diing a, nang ka hung lungsiat chih ka hesah diing hi.

¹⁰Ka kuhkalna thu na kol zing jiahin leitung a um mite etkhiahna diinga khovel pumpi a hung tung diing heemna hun a kipanin ke'n zong ka hung veengbit diing hi.

¹¹Ngai in, kintahin ka hung hi; koimah in na lallukhuh ahung laahsah louhna diingin na sil neihsa chu koldet in.

¹²A gualzoupa chu ka Pathian biahinn ah khuam in ka pangsah diing a, a pawtdoh nawn sih diing; huleh a tungah ka Pathian min leh, ka Pathian khopi Jerusalem thah, Ka Pathian akipana vaan a kuana hung kumsuh min ka gial diing a, a tungah ka min thah ka gial diing hi.

¹³Bil nei taphot in kouhtuamte kawma Hagau thusoi chu ja heh, chi'n.

¹⁴Huleh Laodisia khua a kouhtuam angel kawmah hichi'n gial in; Amen, heetpihtu ginum, leh dihtah, Pathian silsiam bulin hi thute a soi hi;

¹⁵Na natohte ka he hi; lum la lum lou, vot la vot lou a na um chu; na lum aha, na vot aha ka deih ahi.

¹⁶Huchia lumpelhpulh a, lum la lum lou, vot la vot lou a na um jiahin ka kam apatin ka hung sekhe diing hi.

¹⁷Ajiahchu nangma’n, Ka hausa a, ka neih a pungta, bangmah ka tasam sih, na chi a; mi lungsiatum, genthei, tagah, mittaw huleh saguah na hih lam na he sih hi.

¹⁸Na hung hauhsat theihna diingin sana mei a haalchiim leh, na saguah zumhuaina a kilat louhna diing a na silh diing puanvaam leh, na muhtheihna diing a na mit na nuh diing mitna lou ka kawma apat lei diingin ka hung deihsah hi.

¹⁹Ka lungsiat taphot chu ka tai a ka thunun hi, hujiahin phatuamngai inla, kisiih in.

²⁰Ngai in, kotkhaah bul a diingin ka kiu hi; mi koipouh in ka aw a jah a, kot a hon inchu a kawmah ka luut diing a, amah toh nitaah an ka ne diing a, huleh ama’n zong kei toh a ne diing hi.

²¹A gualzoupa chu ka kawmah ka laltouphah ah ka tousah diing, kei zong ka gualzoh a, ka Pa toh a laltouphaha ka tou mahbangin.

²²Bil nei taphot in kouhtuamte kawma Hagau thusoi chu ja heh, chi'n.