Read Simte THUPHUANDOH 5 Bible Online

THUPHUANDOH 5 - Simte bible

THUPHUANDOH 5

¹Huleh amah laltouphah tunga toupa jiatlamah, a sunglam leh a polama kigial, chiamchihna sagiha kichiamchih lehkhabu khat ka mu a,

²Huleh angel haat khat aw ngaihtaha kikou a, Koi ahiai lehkhabu chu hong a, hua chiamchihna umte pheltaah, chi ka mu a.

³Huleh vaan ah hiin, leiah hileh, hulou in lei nuaiah hitaleh, hu lehkhabu hong thei leh a tung en thei mi koimah a umta sih hi.

⁴Huleh hu lehkhabu hong diing leh sim diing aha, ahihlouhleh a tung en taah mi koimah a kimuh louh jiahin hahkah in ka kap hi.

⁵Huin upate laha khat in ka kawmah, Kap sin; ngai in, Judah nam Humpibahnei, David zungjam in hu lehkhabu chu hong diing leh, hua chiamchihna sagihte phel diingin a zouta hi, a chi a.

⁶Huleh ka et leh, ngai in, laltouphah leh silhing lite lai ah leh, upate laiah thahsa hileh kilawm Belaamnou, ki sagih leh mit sagih nei, ding ka muta a, hute chu Pathian Hagau sagih, leitung pumpi a sawlkhiahte ahi uhi.

⁷Huleh amah chu a hung a; laltouphah tunga toupa khut jiatlam apatin lehkhabu chu a lata hi.

⁸Huleh lehkhabu chu a laah tahin silhing lite leh, upa sawmnih leh lite chu Belaamnou ma-ah a bohkhup va, tengtang leh gimnamtui a dim sana belhbu a tawi chiat va, huchu misiangthoute haamteina ahi.

⁹Huleh amahun la thah khat a sa va, Nang chu lehkhabu la a, hua chiam chihnate phel taah na hi; ajiahchu thah in na um a, chi chin, haam chin, michin leh nam chin apat mite na sisanin Pathian a diingin na hung tanta a;

¹⁰Huleh i Pathian uh kawmah lalte leh siamputein na hung siamta hi; huleh leitung ah lal in i tou diing uhi, chi'n.

¹¹Huin ka et leh, laltouphah leh silhingte leh upate kimvelah angel tampi aw ka ja a; a tamdan u’chu saang sawm mun saang sawm leh, a saang tampi ahi uh;

¹²Thah a um Belaamnou chu thuneihnate, hauhsatnate, pilnate, thahaatnate, paahtawinate, loupinate leh vangpiahnate tangtaah ahi, chia aw ngaihtaha kikou in.

¹³Huleh vaan a um, lei a um, lei nuaia um leh tui khang lian sunga um chintengin, Laltouphah tunga toupa leh Belaamnou kawmah, vangpiahnate, paahtawinate, loupinate, thuneihnate kumtuang kumtuang in um zingta heh, a chih uh ka ja hi.

¹⁴Huin silhing lite’n, Amen, a chi va. Huleh upa sawmnih leh lite’n bohkhup in amah kumtuang kumtuang a hing zingpa chu a beta uhi.