Read Simte THUPHUANDOH 7 Bible Online

THUPHUANDOH 7 - Simte bible

THUPHUANDOH 7

¹Huleh hi silte nungin, ke’n angel li, leitung ah hileh, tui khang lian tungah hileh, sing tung bangmaha zong a nun louh na diing a leitung huih lite tutaang a, lei ning li a diing chu ka mu a.

²Huleh angel dang, suahlam apat a hung kuan, Pathian hing chiamchihna nei khat ka mu a; huleh amah chu, a kawmva leitung leh tui khang lian suhsiatna diing kipia angel lite kawmah aw ngaihtahin a kikou a,

³I Pathian suaahte a tal va i chiamchih zoh masiah leitung hileh, tui khang lian hileh, singte hileh suse sih un, chi’n.

⁴Huleh chiamchiha umte phaahzah chu ka ja a; Israel tate nam zousiah apat nuai khat leh siing li leh saang li chiamchih ahi uh.

⁵Judah nam apat siing khat leh saang nih; Reuben nam apat siing khat leh saang nih; Gad nam apat siing khat leh saang nih;

⁶Aser nam apat siing khat leh saang nih; Naphtalim nam apat siing khat leh saang nih; Manasseh nam apat siing khat leh saang nih;

⁷Simeon nam apat siing khat leh saang nih; Levi nam apat siing khat leh saang nih; Issachar nam apat siing khat leh saang nih;

⁸Zebulon nam apat siing khat leh saang nih; Joseph nam apat siing khat leh saang nih; huleh Benjamin nam apat siing khat leh saang nih chiamchihin a um uhi,

⁹Hi nunga ka et leh, ngai in, mipi nasatah, koimah simseeng louh, nam chin, phung chin, mi chin leh haam chin apat puan ngou silh a, huleh tuumnah tawi a laltouphah leh Belaamnou ma a diing chu ka muta a.

¹⁰Huleh amahuh chu aw ngaihtahin a kikou va, Hutdamna chu laltouphah tunga tou i Pathian uleh Belaamnou a ahi, chi’n.

¹¹Huleh angel zousiah chu laltouphah kim vel leh upate leh silhing lite kimvelaha ding va, huleh laltouphah ma-ah khupboh a puuh in,

¹²Amen: Vangpiahnate, loupinate, pilnate, kipaahthusoinate, paahtawinate, thuneihnate leh silbawltheihnate chu i Pathian kawmah kumtuang kumtuang in um zingta heh. Amen chih Pathian a bia uhi.

¹³Huleh upate laha khat in ahung houpih a, ka kawmah, Hi puan ngou a kithuamte koite ahiviai? huleh khoi apat a hung ahi viai? a chi a.

¹⁴Ke’n a kawmah, Pu, nangma’n na he hi, ka chi a. Ama’n ka kawmah, Hite chu gimthuaahna nasatah apat hung pawtdohte ahi va, huleh a puan uh Belaamnou sisana sawp in a ngousahta uhi.

¹⁵Hujiahin amahuh chu Pathian laltouphah ma a um in suun leh janin a biahinn ah a nna a tong uhi; huleh amah laltouphah tunga toupa chu a lahvah a teeng diing hi.

¹⁶A gil uh a kial nawn sih diing a, a dangtaah kiit nawn sih diing uhi; huleh nisa in amahuh a kaang nawn sih diing a, a satna in zong a sugim nawn sih diing hi.

¹⁷Ajiahchu Belaamnou, laltouphah laia um khu in amahuh a vaah diing a, tuihing lui luanna ah amahuh a pui diing a; huleh Pathian in a mit va kipat mittui zousiah a siaah siang diing hi, a chi hi.