Read Simte THUPHUANDOH 8 Bible Online

THUPHUANDOH 8 - Simte bible

THUPHUANDOH 8

¹Huleh ama’n chiamchihna sagihna a phel zohin pung makhai dibang sung vaan chu a sip kiikeei a.

²Huin angel sagih Pathian ma a ding ka mu a; a kawmvah pengkuul sagih piah ahi uhi.

³Huleh angel dangkhat a hung a, gimtui haalna sana bawm tawi in maitaam bulah a ding a; huleh a kawmah chu Laltouphah ma a sana maitaam tung a misiangthoute haamteina toh a latkhawm diingin gimtui tampi piah ahi.

⁴Huleh gimtui khuu chu misiangthoute haamteina toh kiton in angel khut apatin Pathian ma-ah a jamtouta hi.

⁵Huleh angel in gimtui haalna bawm a la a, maitaam meiin a thundim a, leitung ah a paaikheta hi; huin awte, vaangingte, kawlphete leh, ziillingte ahung umta hi.

⁶Huin hu angel sagih pengkuul sagih neite chu muut diingin a kisa uh.

⁷Angel khatna in a muut a, gial leh mei sisan toh kihal ahung umta a, hute chu leitung a paihkhiah in a um a; singkung mun thum a khen mun khat a kaangtum a, huleh hampa hing zousiah a kaangtumta hi.

⁸Huleh angel nihna in a muut a, mei a kaang taang lianpi hileh kilawm tui khang lian a paihluut in a um a; huleh tui khang lian mun thum a khen mun khat sisan ahung suaahta hi.

⁹Huleh tui khang lian a um hinna nei ganhingte chu mun thum a khen mun khat a sita a; huleh kuang te chu mun thum a khen mun khat suhsiat ahita hi.

¹⁰Huleh angel thumna in a muut a, aahsi liantah khat, meisel banga kuang vaan apatin ahung kesuh a, luidungte mun thum a khen mun khat leh tuikhuuhte tungah a tu a;

¹¹Hu aahsi min chu Gamsaai ahi; huleh tui mun thum a khen mun khat chu gamsaai ahung suaahta a; huleh hu tuite in mi tampi a sita hi, suhkhaat a hihtaah jiahin.

¹²Huin angel lina in a muut a, ni mun thum a khen mun khat, ha mun thum a khen mun khat, aahsi mun thum a khen mun khat suhsiat in a umta a; huchia hute mun thum a khen mun khat suhsiat ahihmah bangin suun chu mun thum a khen mun khat a vaah sih a, jan zong huchi mahin.

¹³Huin ka et leh, angel khat vaanlaizawl a leeng a, aw ngaihtaha, angel thum in pengkuul a muut diing, hu pengkuul gin hung um nalai diingte jiahin lei a umte a tunggih hi, a tunggih hi, a tunggih hi, a chih ka ja hi.