Read Sinhala New Revised Version 2018 ගණන් කථාව 33 Bible Online

ගණන් කථාව 33 - Sinhala New Revised Version 2018 bible

ගණන් කථාව 33

¹මෝසෙස්ගේ හා ආරොන්ගේ නායකත්වය යටතේ මිසර දේශයෙන් නික්මුණු ඉශ්රායෙල් ජනයාගේ සහ ඔවුන්ගේ හමුදාවන්ගේ ගමන් විස්තර මේවා ය.

²සමිඳාණන් වහන්සේ අණ දුන් පරිදි, මෝසෙස් ඔවුන් පිටත් වූ ස්ථාන අනුව ගමන් විස්තර සටහන් කෙළේ ය. පිටත් වූ ස්ථාන අනුව ඒවායේ විස්තර මෙසේ ය.

³ඉශ්රායෙල් ජනතාව පළමු වන මාසයේ පසළොස් වන දින, පාස්කු දිනට පසු දින, මිසර වැසියන් බල බලා සිටිය දී මහා උදාර ලීලාවෙන් රාමෙසෙස් නම් නුවරින් පිටත් වූ හ.

⁴එකල මිසර වාසීහු සමිඳාණන් වහන්සේ මැරූ ඔවුන්ගේ කුලුඳුලන් වළලමින් සිටියහ. මෙලෙස උන් වහන්සේ ඔවුන්ගේ දෙවි දේවතාවන්ට ද දඬුවම් කළ සේක.

⁵ඉශ්රායෙල් ජනයා රාමෙසෙස් නුවරින් නික්ම සුක්කොත්හි ද,

⁶සුක්කොත් නුවරින් නික්ම පාළුකරයේ අද්දර වූ ඒතාම්හි ද,

⁷ඒතාම් නුවරින් නික්ම බාල්-ශෙපොන් ඉදිරිපිට වූ පී-හාහිරොත් බලා හැරී ගොස් මිග්දෝල් ඉදිරිපිට ද,

⁸පී-හාහිරොත් නම් නුවරින් නික්ම, මුහුද මැදින් පාළුකරයට ගොස්, ඒතාම් නම් පාළුකරයේ තුන් දිනක් ගමන් කොට මාරාහි ද කඳවුරු බැන්දහ.

⁹මාරා නම් ස්ථානයෙන් ද නික්ම, ඒලිම්ට පැමිණියහ. මෙහි දිය උල්පත් දොළහක් ද තල්ගස් හැත්තෑවක් ද තිබිණි. එහි ද ඔව්හු කඳවුරු බැඳ

¹⁰ඉන් නික්ම රතු මුහුදුබඩ ද,

¹¹එතැනින් නික්ම සීන් නම් පාළුකරයේ ද,

¹²එතැනින් නික්ම දොප්කාහි ද,

¹³එතැනින් නික්ම අලුෂ්හි ද කඳවුරු බැන්දහ.

¹⁴එතැනින් නික්ම සෙනඟට බීම සඳහා ජලය නොතිබුණු රෙපිඩිම්හි ද,

¹⁵එතැනින් නික්ම සීනයි පාළුකරයේ ද කඳවුරු බැන්දහ.

¹⁶එතැනින් නික්ම කිබ්රොත්-හත්තාවාහි ද,

¹⁷එතැනින් නික්ම හශේරොත්හි ද,

¹⁸එතැනින් නික්ම රිත්මාහි ද,

¹⁹එතැනින් නික්ම රිම්මොන්-පෙරෙශ්හි ද,

²⁰එතැනින් නික්ම ලිබ්නාහි ද,

²¹එතැනින් නික්ම රිස්සාහි ද,

²²එතැනින් නික්ම කෙහේලාතාහි ද,

²³එතැනින් නික්ම ෂෙපෙර් කන්දෙහි ද,

²⁴එතැනින් නික්ම හරාදාහි ද,

²⁵එතැනින් නික්ම මක්හෙලොත්හි ද,

²⁶එතැනින් නික්ම තාහත්හි ද,

²⁷එතැනින් නික්ම තෙරාහි ද,

²⁸එතැනින් නික්ම මිත්කාහි ද,

²⁹එතැනින් නික්ම හෂ්මොන්හි ද,

³⁰එතැනින් නික්ම මොසේරොත්හි ද,

³¹එතැනින් නික්ම බෙනෙ-ජාකාන්හි ද,

³²එතැනින් නික්ම හෝර්-හග්ගිද්ගාද්හි ද,

³³එතැනින් නික්ම ජොට්බාතාහි ද,

³⁴එතැනින් නික්ම අබ්රොනාහි ද,

³⁵එතැනින් නික්ම එශිමෙයාන්-ගෙබෙර්හි ද,

³⁶එතැනින් නික්ම ශීන් පාළුකරයෙහි එනම් කාදෙෂ්හි ද,

³⁷එතැනින් නික්ම ඒදොම් දේශ සීමාවේ පිහිටි හෝර් කන්දෙහි ද කඳවුරු බැඳගත්හ.

³⁸ඉශ්රායෙල් ජනයා මිසර දේශයෙන් නික්ම ගිය හතළිස් වන අවුරුද්දේ පස් වන මාසයේ පළමු වන දින සමිඳාණන් වහන්සේගේ අණ පරිදි පූජක ආරොන් හෝර් නම් කන්දට නැංග පසු, එහි දී මියගියේ ය.

³⁹ඔහු එහි මියයන විට ඔහුගේ වයස අවුරුදු එකසිය විසිතුනකි.

⁴⁰කානාන් දේශයේ දකුණු දිශාවේ විසූ කානානිය අරාද් නම් රජු හට ඉශ්රායෙල් ජනයා සැපත් වන බව සැළ විය.

⁴¹ඔව්හු හෝර් කන්දෙන් නික්ම සල්මොනාහි ද,

⁴²එතැනින් නික්ම පූනොන්හි ද,

⁴³එතැනින් නික්ම ඔබොතෙහි ද,

⁴⁴එතැනින් නික්ම මෝවබ් දේශ සීමාවේ පිහිටි ඉයේ-ආබාරිම්හි ද,

⁴⁵එතැනින් නික්ම දීබොන්-ගාද්හි ද,

⁴⁶එතැනින් නික්ම අල්මොන්-දිබ්ලාතයිම්හි ද,

⁴⁷එතැනින් නික්ම නෙබෝ ඉදිරිපිට අබාරිම් කඳු වැටියේ ද,

⁴⁸එතැනින් නික්ම ජොර්දාන් ගං තෙර වූ ජෙරිකෝ නුවර මෝවබ් මිටියාවතේ ද කඳවුරු බැඳගත්හ.

⁴⁹මෙලෙස ඉශ්රායෙල් ජනයා ජොර්දාන් ගං තෙර බෙත්-ජෙෂිමොත් පටන් ආබෙල්-ෂිත්තිම් දක්වා මෝවබ් මිටියාවතෙහි කඳවුරු බැඳගත්හ.

⁵⁰ජොර්දාන් ගං තෙර පිහිටි ජෙරිකෝ නුවර අසල මෝවබ් මිටියාවතේ දී සමිඳාණන් වහන්සේ මෝසෙස්ට කතා කොට මෙසේ වදාළ සේක:

⁵¹“ඉශ්රායෙල් ජනයා අමතා මෙය කියන්න; ‘නුඹලා ජොර්දාන් ගඟෙන් එතෙර වී, කානාන් දේශයට සැපත් වූ විට

⁵²නුඹලාට ඉදිරියෙන් එහි සිටින දේශවාසී සියල්ලන් පලවා හැරිය යුතු ය. ඔවුන් ගලින් නෙළූ, ලෝහයෙන් වාත්තු කළ පිළිම නසා වනසා, ගිරිකුළු දේවාල නටබුන් කළ යුතු ය.

⁵³නුඹලා දේශය උරුම කොටගෙන එහි පදිංචි විය යුතු ය. මන්ද, ස්වාමීන් වන මා එය නුඹලාට දුන් බැවිනි.

⁵⁴තවද දාදු දමා, දේශය නුඹලාගේ පෙළපත් අතර උරුම කොට බෙදාගත යුතු ය. වැඩියෙන් ඉන්න අයට වැඩියෙන් ද, අඩුවෙන් ඉන්න අයට අඩුවෙන් ද උරුමය දිය යුතු ය. දාදුව අනුව යමෙකුට වැටෙන ස්ථානය ඔහුට උරුම වනු ඇත. නුඹලාගේ පිය පෙළපත්හි ගෝත්‍ර අනුව නුඹලා දේශය උරුම කොට ගත යුතු වේ.

⁵⁵නුඹලා දේශවාසී සියල්ලන් පලවා නොහැරියොත්, එහි ඉතිරි වන අය නුඹලාගේ ඇහැට උලක් ද ඇලයට කටුවක් ද වැනි මහා කරදරයක් වී නුඹලා වසන දේශයේ දී ඔවුන් නුඹලාට හිරිහැර කරනු ඇත.

⁵⁶ඇරත්, නුඹලා මා කී ලෙස නොකරන්නහු නම්, මම ඔවුන්ට දෙන්නට යන දඬුවම් නුඹලාට දෙන්නෙමි.’ “