Read Sinhala Revised Old Version යෝබ් 26 Bible Online

යෝබ් 26 - Sinhala Revised Old Version bible

යෝබ් 26

¹එවිට යෝබ් උත්තරදෙමින් කියනුයේ:

²ඔබ ශක්තිය නැත්තාට උපකාරකළ හැටි! බලය නැති හස්තය මුදාදුන් හැටි!

³නුවණ නැත්තාට දැනුමැතිකම් දී, සැබෑ දැනගැන්ම බොහෝසෙයින් ප්‍රකාශකළ හැටි!

⁴ඔබ කාට වචන කීවෙහිද? ඔබෙන් නික්ම ආවේ කාගේ ආත්මයද? [12]

⁵ජලය හා එහි වැසියන්ට යටින් නැසීගිය අය වෙවුලති.

⁶ෂෙයෝල[13] උන්වහන්සේ ඉදිරිපිට ඇරී තිබේ, අබද්දොනටද[14] වැස්මක් නැත.

⁷උන්වහන්සේ ගුවන්තලය මතුයෙහි උතුරු ප්‍රදේශය දිගහරිනසේක, පොළොවද අවකාශයෙහි එල්ලා තබනසේක.

⁸උන්වහන්සේ තමන්ගේ ඝන වලාකුල්වල වතුර බැඳ තබනසේක; වලාකුළද ඒ යටින් නොපැළෙයි.

⁹උන්වහන්සේ තමන් වලාකුළ අතුරා, සිංහාසනය නොපෙනෙන ලෙස වසනසේක.

¹⁰එළිය අඳුරට මාරුවෙන මායිම දක්වා උන්වහන්සේ ජල මතුයෙහි චක්‍රයක් ඇඳ තිබේ.

¹¹උන්වහන්සේගේ තරවටුවට අහසේ කණු වෙවුලා ත්‍රස්තවෙති.

¹²උන්වහන්සේ තමන්ගේ බලයෙන් මුහුද නිශ්චලකරනසේක;[15] තමන්වහන්සේගේ නුවණින් රාහබ්ට[16] ඇන දමනසේක.

¹³උන්වහන්සේගේ ආත්මය කරණකොටගෙන අහස අලංකාරව තිබේ; උන්වහන්සේගේ අත ශීඝ්‍ර සර්පයා තුවාලකළසේක.

¹⁴මේ වනාහි උන්වහන්සේගේ මාර්ගවල අල්පමාත්‍රයක් පමණකි. එයින් අපට ඇසෙන්නේ කෙතරම් හීන් ශබ්දයක්ද! එසේනම් උන්වහන්සේගේ පරාක්‍රමයේ ගර්ජනාව තේරෙන්නේ කාටදැයි කීවේය.