Read Sinhala Revised Old Version යෝබ් 8 Bible Online

යෝබ් 8 - Sinhala Revised Old Version bible

යෝබ් 8

¹එකල ෂූහිය බිල්දද් උත්තර දෙමින් කියනුයේ:

²ඔබ මේවා පවසන්නෙත් ඔබේ මුඛයේ වචන බලවත් හුළඟක්ව තිබෙන්නෙත් කොපමණ කල්ද?

³දෙවියන්වහන්සේ විනිශ්චය පෙරළනසේක්ද? නොහොත් සර්වපරාක්‍රමයාණෝ යුක්තිය පෙරළනසේක්ද?

⁴ඔබේ දරුවන් උන්වහන්සේට විරුද්ධව පව්කරන්ටත්, උන්වහන්සේ ඔවුන්ගේ අපරාධයේ බලයට ඔවුන් පාවාදෙන්ටත් යෙදුණේ නම්,

⁵ඔබ දෙවියන්වහන්සේ ඕනෑකමින් සොයා, සර්වපරාක්‍රමයාණන්ට කන්නලව් කරන්නෙහි නම්,

⁶ඔබ පිරිසිදුව අවංකව සිටින්නෙහි නම්, සැබෑවටම දැන් ඔබ උදෙසා උන්වහන්සේ පිබිද, ඔබේ ධර්මිෂ්ඨකමේ නිවාසය සමාදානයෙන් වර්ධනයකරනසේක.

⁷ඔබේ පටන්ගැන්ම කුඩා නුමුත් ඔබේ අන්තිමය බොහෝසෙයින් වැඩිවන්නේය.

⁸එසේය, ප්‍රථම පරම්පරාවෙන් අසන්න, ඔවුන්ගේ පියවරුන් විභාගකළ දේට සිත යොමුකරන්න.

⁹(මක්නිසාද අපි නම් ඊයේ දවසේ අයවල්ය, කිසිවක් නොදනිමුව, මක්නිසාද පොළොවෙහි අපේ දවස් සෙවණැල්ලක්ය.)

¹⁰ඔව්හු ඔබට උගන්වා ඔබට කියාදී, තමුන්ගේ සිතින් නික්මෙන වචන නොකියන්නෝද?

¹¹මඩ නැති තැන පන් වැවේද? වතුර නැතුව මහ පන් වැඩේද?

¹²ඒවා කපා නොදමා අමුව තිබෙද්දීම සියලු පලා ජාතිවලට පළමුවෙන් මැලවෙන්නේය.

¹³දෙවියන්වහන්සේ සිහිනැතිකරන සියල්ලන්ගේ මාවත් එසේමය; අභක්තිකයාගේ බලාපොරොත්තුවද නැතිවන්නේය.

¹⁴ඔහුගේ විශ්වාසය සිදී යන්නේය, ඔහුගේ රක්ෂාස්ථානයද මකුළු දැලක්ය.

¹⁵ඔහු තමාගේ ගෙට හේත්තුවුණාම ඒක නොතිබී යයි; ඔහු එය තදින් ඇල්ලුවාම ඒක නොපවතියි.

¹⁶ඔහු සූර්යයා ඉදිරියෙහි සශ්‍රීකවී, ඔහුගේ රිකිළි ඔහුගේ වත්තේ සෑම තැනම විහිදී යන්නේය.

¹⁷ඔහුගේ මුල් ගල් ගොඩ උඩ එතෙන්නේය. ඔහු ගල් ඉඩමට පැමිණෙන්නේය.

¹⁸ඔහු තමාගේ ස්ථානයෙන් නාස්තිවී ගියාම: මම ඔබ නුදුටිමියි කියා, ඒක ඔහු එපාකරන්නේය.

¹⁹ඔහුගේ මාර්ගයේ ප්‍රීතිය නම් මේය, ඒ බිමෙන් වෙන අය නැගී එන්නෝය.

²⁰දෙවියන්වහන්සේ සම්පූර්ණ මනුෂ්‍යයෙක් පහකර දමන්නේවත් නපුර කරන්නන්ට ආධාර වෙන්නේවත් නැත.

²¹උන්වහන්සේ ඔබේ මුඛය සිනාවෙනුත් ඔබේ තොල් ප්‍රීති ඝෝෂාවෙනුත් පුරවනසේක.

²²ඔබට වෛරවෙන්නෝ ලජ්ජාවෙන් අඳවනු ලබන්නෝය; දුෂ්ටයන්ගේ කූඩාරම නැතිවන්නේයයි කීවේය.