Read Sinhala Revised Old Version හිතෝපදේශ 23 Bible Online

හිතෝපදේශ 23 - Sinhala Revised Old Version bible

හිතෝපදේශ 23

¹ඔබ ආණ්ඩුකාරයෙකු සමඟ කෑමට හිඳින කල, ඔබ ඉදිරිපිට තිබෙන දේ හොඳට කල්පනාකර,

²ඔබ ගිජු කෙනෙක් නම්, ඔබේ උගුරට පිහියක් තබාගන්න.

³ඔහුගේ රසවත් කෑමවලට ආශා නොවෙන්න, ඒවා රැවටිලි කෑමය.

⁴පොහොසත් වෙන්ට නොවෙහෙසෙන්න; ඒ අදහස අත්අරින්න.

⁵නැතිවීයන දේට ඔබේ ඇස් යොමු කරන්නෙහිද? වස්තුව පියාපත් සාදාගෙන රාජාලියෙකු මෙන් අහස දෙසට ඉගිලී යන්නේමය.

⁶අප්‍රසන්න බැල්මක් ඇත්තාගේ කෑම නොකන්න, ඔහුගේ රස කෑමවලට ආශා නොවන්න.

⁷මක්නිසාද තමාගේ සිතෙන් ගණන්ගන්නා ලෙසම ඔහු වන්නේය. කන්න බොන්නැයි ඔහු ඔබට කියයි; නුමුත් ඔහුගේ සිත ඔබ සමඟ නැත.

⁸ඔබ කෑ දෙය ඔබ වමාරන්නෙහිය, ඔබේ ප්‍රසන්න වචනද නැතිවන්නේය.

⁹අඥානයා ඉදිරියේ කථා නොකරන්න; මක්නිසාද ඔහු ඔබේ වචනවල සාරකම සුළුකරන්නේය.

¹⁰පුරාණ මායිම වෙනස් නොකරන්න; පියා නැත්තන්ගේ බිම්වලට ඇතුල්නොවන්න.

¹¹මක්නිසාද ඔවුන්ගේ මිදුම්කාරයා බලවත්ය; උන්වහන්සේ ඔබට විරුද්ධව ඔවුන්ගේ විත්තිය කියනවා ඇත.

¹²ඔබේ සිත ඉගැන්වීමටද ඔබේ කන් දැනගැනීමේ වචනවලටද යොමුකරන්න

¹³දරුවාගෙන් දඬුවම නොවලක්වන්න; ඉපලෙන් ඔබ ඔහුට තළන්නෙහි නම් ඔහු නගින්නේ නැත.

¹⁴ඉපලෙන් ඔහුට තළන්න; එයින් ඔබ ඔහුගේ ප්‍රාණය ෂෙයෝලෙන්[15] ගළවන්නෙහිය.

¹⁵මාගේ පුත්‍රය, ඔබේ සිත ප්‍රඥාවන්ත නම් මාගේ සිතත් ප්‍රීතිමත් වන්නේය.

¹⁶එසේය, ඔබේ තොල් හරි දේවල් පවසන විට මාගේ හෘදය පිනායන්නේය.

¹⁷ඔබේ සිත පව්කාරයන්ට ඊර්ෂ්‍යා නොකොට, හැම කල්හිම ස්වාමීන්වහන්සේ කෙරෙහි භය ඇතුව තිබේවා.

¹⁸මක්නිසාද සැබවින් විපාකයක් ලැබෙන්ට තිබේ; ඔබේ බලාපොරොත්තුවද සිඳදමනු නොලැබේ.

¹⁹මාගේ පුත්‍රය, අසා ප්‍රඥාවන්ත වී, ඔබේ සිත හරි මාර්ගයෙහි ගෙනයන්න.

²⁰මුද්‍රිකපානයෙහි ලොල්වූවන්ටවත් මස් කෑමෙහි ගිජුවූවන්ටවත් එක් නොවන්න.

²¹මක්නිසාද බේබද්දාත් කෑදරයාත් දිළිඳුවන්නේය; නිදිමතද වැරහැලි ඇදීමට පමුණුවන්නේය.

²²ඔබ ජනිතකළ ඔබේ පියාගේ බස් අසන්න; ඔබේ මෑණියන් මහලුවූ කල ඈ සුළු නොකරන්න.

²³සත්‍යයද ප්‍රඥාවද ඉගනගැන්මද නුවණද මිලේට ගන්න, ඒවා නොවිකුණා තබාගන්න.

²⁴ධර්මිෂ්ඨයාගේ පියා ඉතා ප්‍රීතිමත්වන්නේය; බුද්ධිමත් දරුවෙකු ජනිතකරන්නාද ඔහු නිසා ප්‍රීතිවන්නේය.

²⁵ඔබේ පියාද මවුද සතුටුවෙත්වා, එසේය, ඔබ වැදූ තැනැත්තී ප්‍රීතිමත්වේවා.

²⁶මාගේ පුත්‍රය, ඔබේ සිත මට දෙන්න, ඔබේ ඇස් මාගේ මාර්ග ගැන ප්‍රීතිවේවා.

²⁷මක්නිසාද වේශ්‍යාවක් වනාහි ගැඹුරු අගළක්ය; අන් ස්ත්‍රියද පටු වළක්ය.

²⁸එසේය, ඈ කොල්ලකාරයෙකු මෙන් රැකසිට, මනුෂ්‍යයන් අතරේ අවිශ්වාසයන් වැඩිකරන්නීය.

²⁹දුක ඇත්තේ කාටද? කාලකණ්ණිකම කාටද? තරඟ කාටද? මැසිවිලි කාටද? නිෂ්කාරණ තුවාළ කාටද? රතු ඇස් ඇත්තේ කාටද?

³⁰මුද්‍රිකපානය ළඟ පමාවෙන්නන්ටය; මිශ්‍රකළ මිදියුස සොයා යන්නන්ටය.

³¹මුද්‍රිකපානය රතුව පෙනෙන විටත්, පාත්‍රයෙහි දිලිහෙන විටත්, සිනිදුලෙස වැක්කෙරෙන විටත්, ඒ දෙස නොබලන්න.

³²අන්තිමේදී එය සර්පයෙකු මෙන් හපාකා, පොළඟෙකු මෙන් දෂ්ටකරයි.

³³ඔබේ ඇසට අද්භූත[16] දේවල් පෙනෙන්නේය, ඔබේ සිත හිතුවක්කාර දේවල් කථාකරන්නේය.

³⁴ඔබ මුහුද මැද නිදාගන්නෙකු මෙන්ද කුඹගසක මුදුනේ නිදන කෙනෙකු මෙන්ද වන්නෙහිය.

³⁵ඔව්හු මට පහරදුන්නෝය, නුමුත් මට රිදුණේ නැත; ඔව්හු මට ගැසුවෝය, නුමුත් ඒක මට දැනුණේ නැත; මට කොයි වේලේ ඇහැ ඇරේද? නැවත එය තවත් සොයන්නෙමියි ඔබ කියන්නෙහිය.