Read Sinhala Revised Old Version හිතෝපදේශ 5 Bible Online

හිතෝපදේශ 5 - Sinhala Revised Old Version bible

හිතෝපදේශ 5

¹මාගේ පුත්‍රය, සිහිනුවණ රක්ෂා කරගැනීම පිණිසද දැනගැන්ම ඔබේ තොල්වල පවතින පිණිසද

²මාගේ ප්‍රඥාවට ඇහුම්කන්දී, මාගේ ඥානයට ඔබේ කන නමන්න.

³මක්නිසාද අන්[3] ස්ත්‍රියෙකුගේ තොල්වලින් මීපැණි වෑස්සෙන්නේය, ඇගේ මුඛය තෙල්වලටත් වඩා සිනිඳුය.

⁴එහෙත් ඇගේ අන්තිමය කොසඹ මෙන් තික්තව, දෙමුවහත් කඩුවක් මෙන් තියුණුව තිබේ.

⁵ඇගේ පාද මරණයට බසින්නේය; ඇගේ අඩි ෂෙයෝලටම[4] පැමිණෙන්නේය.

⁶ඈට ජීවනයේ මාවත නොපෙනෙන ලෙස ඇගේ පාරවල් ඇදව තිබේ, ඈ ඒ බව නොදන්නීය.

⁷එබැවින් මාගේ පුත්‍රයෙනි, මට ඇහුම්කන්දී, මාගේ මුඛයේ කීම්වලින් ඉවත් නොවී සිටින්න.

⁸ඔබේ ශෝභනකම අනුන්ටත් ඔබේ අවුරුදු කෲර අයටත් නොදෙන පිණිසද,

⁹ඔබේ සම්පතින් අන්‍යයන් තෘප්තියට නොපැමිණෙන පිණිසද, ඔබේ වීර්යයේ ඵල අන්‍ය ගෙදරකට නොලැබෙන පිණිසද,

¹⁰අන්තිමේදී ඔබේ මාංසයද ශරීරයද ක්ෂයවන කල ඔබ කෙඳිරිගා:

¹¹අහෝ, මා ගුරුකමට වෛරවී, මාගේ සිත අවවාදය සුළුකළ හැටි!

¹²මාගේ ගුරුවරුන්ගේ හඬට කීකරුනොවී, මාගේ ඉගැන්නුම්කාරයන්ට මාගේ කන නොනමා සිටිය හැටි! කියාත්,

¹³මම සභාව සහ සම්මුතිය මැදදී හැම නපුරු ක්‍රියාවලම වාගේ පැවතුණෙමියි කියාත් නොකියන පිණිසද,

¹⁴ඔබේ මාර්ගය ඇය වෙතින් ඉවත්කරන්න. ඇගේ ගෙයි දොරකඩට ළං නොවන්න.

¹⁵ඔබේම පොකුණෙන් වතුරද ඔබේම ළිඳෙන් උනන වතුරද බොන්න.

¹⁶ඔබේ උල්පත් පිටතටත් ජල ගංගා වීථිවලටත් විසිරයා යුතුද?

¹⁷ඒවා ඔබ සමඟ අන්‍යයන්ට නොව ඔබට පමණක්ම වේවා.

¹⁸ඔබේ උල්පතට ආශීර්වාද ලැබේවා; ඔබේ යෞවන වයසේ භාර්යාව කෙරෙහිම ප්‍රීතිවෙන්න.

¹⁹ප්‍රේමවත් මුවදෙනකු සහ ප්‍රියකරු වැලිමුවදෙනකු මෙන් ඇගේ පියයුරුවලින් සෑමවිටම සතුටුවී, ඇගේ ආදරයෙන් නිතරම ප්‍රීතිමත්වෙන්න.

²⁰එසේය, මාගේ පුත්‍රය, ඔබ මක්නිසා අන්‍ය ස්ත්‍රියෙකු කෙරෙහි ප්‍රීතිමත්ව, අන්‍ය තැනැත්තියෙකුගේ ළය වැළඳගන්නෙහිද?

²¹මක්නිසාද මනුෂ්‍යයාගේ මාර්ග ස්වාමීන්වහන්සේගේ ඇස් ඉදිරියෙහිය, ඔහුගේ සියලු මාවත් උන්වහන්සේ කල්පනාකර බලනසේක.

²²දුෂ්ටයා තමාගේ අපරාධවලින්ම අසුවන්නේය, තමාගේ පාප නමැති ලනුවලින් බඳිනු ලබන්නේය.

²³ඔහු ඉගැන්වීම නැතිකම නිසා නසින්නේය; ඔහු තමාගේ මෝඩකමේ මහත්කම නිසා මුළාවයන්නේය.