Read Sinhala Revised Old Version සාලමොන්ගේ ගීතිකා 1 Bible Online

සාලමොන්ගේ ගීතිකා 1 - Sinhala Revised Old Version bible

සාලමොන්ගේ ගීතිකා 1

¹සාලමොන්ගේ උතුම් ගීතිකාවය.

²ඔහු තමාගේ මුඛයේ සිඹීම්වලින් මා සිඹීවා. මක්නිසාද ඔබේ ප්‍රේමය මුද්‍රිකපානයට වඩා හොඳය.

³ඔබේ විලවුන් මිහිරි සුවඳින් යුක්තය; ඔබේ නාමය වැගිරෙවු විලවුන් මෙන්ය; එබැවින් කන්‍යාවෝ ඔබට ප්‍රේමකෙරෙති.

⁴මා ඇදගන්න; අපි ඔබ අනුව දුවන්නෙමුව. රජ තමාගේ ඇතුල් ගෙවලට මා පැමිණෙවුවේය. අපි ඔබ කෙරෙහි ප්‍රීති සන්තෝෂවන්නෙමුව, මුද්‍රිකපානයට වඩා ඔබේ ප්‍රේමය සඳහන්කරන්නෙමුව. ඔවුන් ඔබට ප්‍රේමකරනවා හරිය.

⁵යෙරුසලමේ දූවරුනි, මම කේදාර්හි කූඩාරම් මෙන් කළු නුමුත්, සාලමොන්ගේ තිර මෙන් ශෝභනව සිටිමි.

⁶අව්ව මා පිට වැටීමෙන් මා කළුවී සිටින නිසා, මා දෙස බලානොසිටින්න; මාගේ මවුගේ පුත්‍රයෝ මට කෝපවී, මිදිවතු බලාගන්ට මට නියමකළෝය; මාගේම මිදිවත්ත මම බලා නොගතිමි.

⁷මාගේ ආත්මය ප්‍රේමකරන තැනැත්ත, ඔබේ රැළට කවන්නේ කොහේද? ඉරමුදුන් වේලේ උන් ලග්ගවන්නේ කොහේද කියා මට දන්වන්න. ඔබේ යහළුවන්ගේ රැළවල් ළඟ මුහුණ වසාගත්තියෙකු මෙන් සිටින්ට ඕනෑ මන්ද?

⁸ස්ත්‍රීන්ගෙන් ඉතා රුව ඇත්තිය, ඔබ නොදන්නෙහි නම්, රැළේ අඩිපාරේම ගොස්, එඬේරුන්ගේ කූඩාරම් ළඟ ඔබේ එළු පැටවුන්ට කවන්න.

⁹මාගේ සොඳුර, ඵාරාවෝගේ රථවල අශ්වධේනුවකට ඔබ සමානකෙළෙමි.

¹⁰ඔබේ කම්මුල් හිසකේ ගෙතීම්වලින්ද ඔබේ බෙල්ල මැණික් මාලාවලින්ද ශෝභනව තිබේ.

¹¹රිදී පොහොට්ටු ඇති රන් මාලා ඔබට සාදා දෙන්නෙමුව.

¹²රජ තමාගේ මේසය ළඟ හිඳිද්දී මාගේ ජටාමාංශ තෙලේ සුවඳ විහිදුණේය.

¹³මාගේ ප්‍රේමවන්තයා මට මාගේ පියයුරු අතරේ තිබෙන සුවඳලාටු පොදියක් හා සමානය.

¹⁴මාගේ ප්‍රේමවන්තයා මට එන්ගෙදියේ උයන්වල වැවුණ සපුමල් පොකුරක් වැනිය.

¹⁵බලව, මාගේ සොඳුර, ඔබ රුව ඇත්තීය; එසේය, ඔබ රුව ඇත්තීය; ඔබේ ඇස් පරෙවියන් හා සමානය.

¹⁶බලව, මාගේ ප්‍රේමවන්තය, ඔබ රුව ඇත්තෙහිය, එසේය, ප්‍රියකරුය. අපේ යහනද නිල්පාටය.

¹⁷අපේ ගෙයි බාල්ක කිහිරි ගස්ය, අපේ පරාළ දේවදාර ගස්ය.