Read Sinhala Revised Old Version සාලමොන්ගේ ගීතිකා 4 Bible Online

සාලමොන්ගේ ගීතිකා 4 - Sinhala Revised Old Version bible

සාලමොන්ගේ ගීතිකා 4

¹බලව, මාගේ සොඳුර, ඔබ රුව ඇත්තීය; එසේය ඔබ රුව ඇත්තීය; ඔබේ මුහුණු වැස්මට ඇතුළෙන් තිබෙන ඔබේ ඇස් පරෙවියන් වැනිය. ඔබේ වරලස ගිලයද් කඳු බෑවුමෙහි ලැග ඉන්න එළු රැළක් මෙන්ය.

²ඔබේ දත් වනාහි තනිවූ එකෙක්වත් නැතුව, සෑමදෙනම නිඹුලුන් ඇත්තාවූ, ලොම් කපා නාවනු ලැබ නැගීඑන්නාවූ බැටළු රැළකට සමානය.

³ඔබේ තොල් රතු නූලක් මෙන්ය, ඔබේ මුඛය ශෝභමානය. ඔබේ මුහුණු වැස්මට ඇතුළෙන් තිබෙන ඔබේ කම්මුල් දෙළුම් පළුවක් මෙන්ය.

⁴ඔබේ බෙල්ල බලවතුන්ගේ වැසුම් වන පලිස් දහසක් එල්ලා තිබෙන්නාවූ, ආයුධ තැබීමට ගොඩනැගූ දාවිත්ගේ කොත මෙන්ය.

⁵ඔබේ දෙතන මහනෙල් අතරේ ගොදුරු කන මුවදෙනකුගේ නිඹුල් පැටවුන් දෙදෙනෙකු මෙන්ය.

⁶දවාල සිසිල්වී සෙවණැලි පහව යනතුරු මම ගන්ධරස කන්දටත් තුවරලා හෙලටත් යන්නෙමි.

⁷මාගේ සොඳුරිය, ඔබ මුළුමනින්ම රුව ඇත්තීය; කැලලක් නැත්තීය.

⁸මාගේ මනමාලිය, ලෙබනොන්හි සිට, එසේය, ලෙබනොන්හි සිට මා සමඟ එන්න. අමානායේ මුදුනෙත් සෙනීර් සහ හෙර්මොන් මුදුනෙත් සිංහයන්ගේ ගුහාවලත් අඳුන්දිවියන්ගේ කඳුවලත් සිට බලන්න.

⁹මාගේ සහෝදරිය, මාගේ මනමාලිය, ඔබ මාගේ සිත අල්ලාගත්තෙහිය; ඔබේ එක ඇසකින්, ඔබේ බෙල්ලේ එක මාලාවකින්, මාගේ සිත අල්ලාගත්තෙහිය.

¹⁰මාගේ සහෝදරිය, මාගේ මනමාලිය, ඔබේ ප්‍රේමය කොපමණ මිහිරිද! ඔබේ ප්‍රේමය මුද්‍රිකපානයටත්, ඔබේ විලවුන්වල සුවඳ සියලු සුවඳ ද්‍රව්‍යවලටත් වඩා කොපමණ හොඳද!

¹¹මාගේ මනමාලිය, ඔබේ තොල්වලින් මීවදය මෙන් පැණි වැගිරෙයි. ඔබේ දිව යට මීපැණිත් කිරිත් තිබේ; ඔබේ වස්ත්‍රවල සුගන්ධය ලෙබනොන්හි සුවඳ මෙන්ය.

¹²මාගේ සහෝදරී, මාගේ මනමාලී, වැටකින් වටකළ උයනක්ය, වසා තිබෙන ළිඳක්ය, මුද්‍රාකර තිබෙන උල්පතක්ය.

¹³ඔබේ පැලෑටි පංක්තිය වනාහි දෙළුම් ගසුත් අනර්ඝ ඵල ගසුත් සපු සහ ජටාමාංසත්

¹⁴ජටාමාංස හා කුංකුමත් වදකහ සහ කුරුඳුත් සෑම තුවරලා ගසුත් ගන්ධරස හා අගිල්ද සෑම ප්‍රධාන සුවඳ ද්‍රව්‍යද දරන ගසුත් යන මේවාය.

¹⁵ඔබ උයන් උල්පතකුත් ජීවමාන දිය ඇති ළිඳකුත් ලෙබනොන් සිට ගලායන ඔයවලුත්ය.

¹⁶එම්බා, උතුරු හුළඟ, පිබිදෙන්න; දකුණු හුළඟ, එන්න; මාගේ උයනේ සුවඳ විහිද යන පිණිස ඊට හමාඑන්න. මාගේ ප්‍රේමවන්තයා තමාගේ උයනට ඇවිත් තමාගේ අනර්ඝ ඵල කෑවාවේ.