Read Sinhala Revised Old Version සාලමොන්ගේ ගීතිකා 6 Bible Online

සාලමොන්ගේ ගීතිකා 6 - Sinhala Revised Old Version bible

සාලමොන්ගේ ගීතිකා 6

¹ස්ත්‍රීන්ගෙන් ඉතා රුව ඇත්තිය, ඔබේ ප්‍රේමවන්තයා කොතැනට ගියේද? ඔබේ ප්‍රේමවන්තයා කොයි දෙසට හැරීගියේද? අපි ඔබ සමඟ ඔහු සොයන්නෙමුව.

²මාගේ ප්‍රේමවන්තයා උයන්වල රැළ කවන පිණිසත් මහනෙල් නෙලාගන්න පිණිසත් තමාගේ උයනෙහි සුවඳ ගස් පාත්තිවලට ගියේය.

³මම මාගේ ප්‍රේමවන්තයාගේය, මාගේ ප්‍රේමවන්තයා මාගේය. ඔහු මානෙල් අතරේ තමාගේ රැළ කවයි.

⁴මාගේ සොඳුර, ඔබ තිර්සා මෙන් අලංකාරය. යෙරුසලම මෙන් ශෝභනය, කොඩි ගත් සේනාවක් මෙන් බලසම්පන්නව සිටින්නීය.

⁵ඔබේ ඇස් මා වෙතින් හරවාගන්න, මක්නිසාද ඒවා මා වසඟකරයි. ඔබේ වරලස ගිලියද්හි ලැග ඉන්න එළු රැළක් මෙන්ය.

⁶ඔබේ දත් තනිවූ එකෙක්වත් නැතුව සෑමදෙනම නිඹුලුන් ඇත්තාවූ, නාවනු ලැබ නැගී එන්නාවූ බැටළුදෙනුන් රැළක් මෙන්ය.

⁷ඔබේ මුහුණු වැස්මට ඇතුළෙන් තිබෙන ඔබේ කම්මුල් දෙළුම් පළුවක් මෙන්ය.

⁸බිසෝවරුන් සැටක්ද උපභාර්යාවන් අසූවක්ද ගණන් නැති කන්‍යාවෝද සිටිති.

⁹මාගේ පරෙවිදෙන, මාගේ නිර්මල තැනැත්තිය, අසමාන තැනැත්තීය. ඈ ඇගේ මවුගේ එකම දරුවාය; ඈ වැදූ ඇත්තීගේ ප්‍රිය තැනැත්තීය. දූවරු ඈ දැක ඈ වාසනාවන්තීයයි කීවෝය; එසේය, බිසෝවරු උපභාර්යාවෝද දැක ඇය වර්ණනාකළහ.

¹⁰අරුණාලෝකය මෙන් නැගීඑන්නාවූ, සඳ මෙන් රුව ඇත්තාවූ, ඉර මෙන් දිළෙන්නාවූ, කොඩි ගත් සේනාවක් මෙන් බලසම්පන්නවූ මෑ කවුද?

¹¹මම මිටියාවත් ගස් කොළන් බලන්ටත්, මිදිවැල් දළු දැමුවේද? දෙළුම්ගස්වල මල් පිපුණේදැයි බලන්ටත්, කොට්ටම්බා උයනට බැස ගියෙමි.

¹²මට දැනෙන්ට පළමුවෙන් මාගේ ආත්මය මාගේ වංශාධිපති සෙනඟගේ රථ අතරේ මා තැබීය.

¹³ෂූලම්මීය, හැරී එන්න, හැරී එන්න; අප ඔබ බලන පිණිස හැරී එන්න, හැරී එන්න. මහනායිම්හි[1] නැටුම මෙන් ඔබ සැම ෂූලම්මීය බලන්ට කැමතිවන්නේ මක්නිසාද?