Read Sinhala Revised Old Version යෙසායා 43 Bible Online

යෙසායා 43 - Sinhala Revised Old Version bible

යෙසායා 43

¹එම්බා යාකොබ්, ඔබ මැවුවාවූද එම්බා ඉශ්‍රායෙල්, ඔබව සෑදුවාවූද ස්වාමීන්වහන්සේ මෙසේ කියනසේක: භය නොවෙන්න, මක්නිසාද මම ඔබ මුදාගතිමි; ඔබේ නම කියා හඬ ගැසීමි, ඔබ මාගේය.

²ඔබ ජල මැදින් යන විට මම ඔබ සමඟ සිටින්නෙමි; ඔබ ගංගා මැදින් යන විට ඒවා ඔබට උඩින් ගලායන්නේ නැත. ඔබ ගිනි මැදින් යන විට නොදැවෙන්නෙහිය; ගිනිදැල්ල ඔබ කෙරෙහි නොඇවිළෙන්නේය.

³මක්නිසාද මම ඔබේ දෙවිවූ ස්වාමීන්වහන්සේය, ඔබේ ගැළවුම්කාරයා වන ඉශ්‍රායෙල්ගේ ශුද්ධ තැනන්වහන්සේය; ඔබේ මිදීමේ මිලය පිණිස මිසරයද ඔබ වෙනුවට කූෂ් සහ සෙබාද දුනිමි.

⁴ඔබ මා ඉදිරියේ අනර්ඝව ගරුකටයුතුවූ බැවින්ද, මා ඔබට ප්‍රේමකළ බැවින්ද, ඔබ වෙනුවට මිනිසුන්ද ඔබේ ජීවිතය වෙනුවට ජනයන්ද දෙන්නෙමි.

⁵භයනොවෙන්න; මක්නිසාද මම ඔබ සමඟ සිටිමි. ඔබේ වංශය නැගෙනහිරින් ගෙනෙන්නෙමි, බස්නාහිරින්ද ඔබ රැස්කරන්නෙමි;

⁶මම උතුරු දිසාවට කථාකොට: දෙන්නැයි කියාත්, දකුණු දිසාවට: නවත්වා නොගන්නැයි කියාත්, දුර සිට මාගේ පුත්‍රයන්ද පොළොවේ කෙළවරින් මාගේ දූවරුන්ද,

⁷එනම් මාගේ නාමය දරන්නාවූ මාගේ ගෞරවය පිණිස මා විසින් මවා තනා සෑදුවාවූ සියල්ලන් ගෙනෙන්නැයි කියාත් කියන්නෙමි.

⁸ඇස් ඇති අන්ධ සෙනඟද කන් ඇති බිහිරන්ද පිටතට ගෙනෙන්න.

⁹සියලු ජාතීහු එකට රැස්වෙත්වා, ජනයෝද එකතුවෙත්වා. ඔවුන්ගෙන් කවුරු මෙය දන්වා පළමු දේවල් අපට ප්‍රකාශකරනවා ඇද්ද? ඔව්හු තමුන්ගේ සාක්ෂිකාරයන් ගෙනැවිත් තමුන් ධර්මිෂ්ඨ බව පෙන්වත්වා. නැත්නම් ඔව්හු අසා: ඒක සැබෑයයි කියත්වා.

¹⁰මම ඒ තැනන්වහන්සේ බව ඔබ සැම දැනගන මා විශ්වාසකර තේරුම්ගන්න පිණිස, ඔබ සැම මාගේ සාක්ෂිකාරයෝව, මා විසින් තෝරාගත් මාගේ මෙහෙකරුවාව සිටින්නහුයයි ස්වාමීන්වහන්සේ කියනසේක. මා සිටින්ට පළමුවෙන් කිසි දෙවිකෙනෙක් සාදනු ලැබුවේ නැත, මට පසුව සිටින්නෙත් නැත.

¹¹මම, මමම, ස්වාමීන්වහන්සේය; මා ඇර වෙන ගැළවුම්කාරයෙක් නැත.

¹²මමම දැන්වීමි, මමම ගැළවීමි, මමම ප්‍රකාශකෙළෙමි, අන් දෙවිකෙනෙක් ඔබ සැම අතරේ සිටියේ නැත. එබැවින් ඔබ සැම මාගේ සාක්ෂිකාරයෝය, මම දෙවියන්වහන්සේයයි ස්වාමීන්වහන්සේ කියනසේක.

¹³එසේය, දවස ඇතිවූ තැන් පටන් මම උන්වහන්සේය; මාගේ අතින් මුදන්ට පොහොසත්වූ කිසිවෙක් නැත. මම ක්‍රියාකරන්නෙමි, වලක්වන්නේ කවුද?

¹⁴ඔබ සැමගේ මිදුම්කාරයාණෝද ඉශ්‍රායෙල්ගේ ශුද්ධ තැනන්වහන්සේද වන ස්වාමීන්වහන්සේ මෙසේ කියනසේක: මම ඔබ සැම උදෙසා බබිලෝනියට යවා, ඔවුන් සියල්ලන්, එනම් කල්දිවරුන්, ඔවුන්ගේ ප්‍රීතිඝෝෂා සහිත නැව්වලම හිරකරුවන් කොට ගෙනෙන්නෙමි.

¹⁵මම ඔබ සැමගේ ශුද්ධ තැනන්වහන්සේද ඉශ්‍රායෙල්ගේ මැවුම්කාරයාද ඔබ සැමගේ රජද වන ස්වාමීන්වහන්සේය.

¹⁶මුහුදෙහි මාර්ගයක්ද මහ ජලයන් මැදින් පාරක්ද සාදන්නාවූ,

¹⁷රථද අශ්වයන්ද සේනාවද බලවන්තයන්ද පිටතට පමුණවා, ඔවුන් නොනැගිටින ලෙස එක්ව වැටීමට සහ සිදීයාමටද පහන්තිරය මෙන් නිවීයාමටද සලස්වන්නාවූ ස්වාමීන්වහන්සේ මෙසේ කියනසේක:

¹⁸පළමු කාරණ සිහි නොකරන්න, පුරාණ දේවල්ද කල්පනා නොකරන්න.

¹⁹බලව, මම අමුතු දෙයක් කරන්නෙමි; දැන් ඒක අටගන්නවා ඇත; ඔබ සැම ඒක නොදන්නහුද? මම කාන්තාරයෙහි පවා මාර්ගයක්ද වනයෙහි ගංගාද සාදන්නෙමි.

²⁰මා විසින් තෝරාගත් මාගේ සෙනඟට වතුර දෙන්ට මම කාන්තාරයෙහි වතුරද වනයෙහි ගංගාද දෙන නිසා, සිවලුන්ද පැස්බරුන්ද ඇතුළුව වනයේ සත්වයෝ මට ගෞරවකරන්නෝය.

²¹මා විසින් මටම උපදවාගත් ඒ සෙනඟ මාගේ ප්‍රශංසාව දක්වනවා ඇත.

²²එහෙත්, යාකොබ්, ඔබ මට යාච්ඤා නොකෙළෙහිය; ඉශ්‍රායෙල්, ඔබ මා ගැන කලකිරුණෙහිය.

²³ඔබේ දවන පූජාවල එළු බැටළුවන් ඔබ මට ගෙනාවේවත් ඔබේ යාගවලින් මට ගෞරව කළේවත් නැත. මම ආහාර පූජාවලින් ඔබට බරක් නොවීමි, දුම් පූජාවලින් ඔබ නොවෙහෙසීමි.

²⁴ඔබ මට සුවඳ දඬු මිලේට-ගත්තේවත් ඔබේ පූජාවල තෙලෙන් මා තෘප්තියට පැමිණෙවුවේවත් නැත. ඔබේ පාපවලින් ඔබ මට බරක්වී, ඔබේ අයුතුකම්වලින් මා වෙහෙසෙවුවා පමණක්ය.

²⁵මම, මමම, මා නිසා ඔබේ පාපවල් සිහි නොකොට, ඔබේ වරද මකාදමන තැනන්වහන්සේය.

²⁶මට මතක්කරන්න; අපි එක්ව කාරණා කියාගනිමු. ඔබ ධර්මිෂ්ඨ බව පෙනෙන පිණිස ඔබම ඔබේ විත්තිය කියන්න.

²⁷ඔබේ මුල් පියා පව් කෙළේය, ඔබේ තානාපතියෝද මට විරුද්ධව වරදකළෝය.

²⁸එබැවින් මම ශුද්ධස්ථානයේ අධිපතීන් කෙලහා, යාකොබ් ශාපයටත් ඉශ්‍රායෙල් නින්දාවටත් පාවාදුන්නෙමි.