Read Sinhala Revised Old Version යෙසායා 47 Bible Online

යෙසායා 47 - Sinhala Revised Old Version bible

යෙසායා 47

¹කන්‍යාවවූ බබිලොන් දියණිය, බැස ධූලියෙහි හිඳගන්න; කල්දිවරුන්ගේ දියණිය, සිංහාසනයක් නැතුව බිම හිඳගන්න. මක්නිසාද: මෘදුවූ සිව්මැළිවූ තැනැත්තීයයි තවත් ඔබට කියනු නොලැබේ.

²ඇඹරුම් ගල්ගෙන පිටි අඹරන්න. ඔබේ මුහුණු වැස්ම අහක්කොට, පිට ඇඳුම ගළවා දමා, කකුල් නග්නකර, ගංගාවලින් එගොඩවෙන්න.

³ඔබේ නග්න භාවය ප්‍රකාශවන්නේය, ඔබේ ලජ්ජාවත් පෙනෙන්නේය. මම පළිගන්නෙමි, කිසි[25] මනුෂ්‍යයෙකු පිළි නොගන්නෙමි.

⁴අපේ මිදුම්කාරයා නම් සේනාවල ස්වාමීන්වහන්සේ යන නාමය ඇති ඉශ්‍රායෙල්ගේ ශුද්ධ තැනන්වහන්සේය.

⁵කල්දිවරුන්ගේ දියණිය, නිශ්ශබ්දව ඉඳ අන්ධකාරයට ඇතුල්වෙන්න. මක්නිසාද ඔබ: රාජ්‍යවල ස්වාමිදුවයයි තවත් කියනු නොලබන්නීය.

⁶මම මාගේ සෙනඟ කෙරෙහි උදහස්වී, මාගේ උරුමය කෙලහා, ඔවුන් ඔබ අතට දුනිමි. ඔබ ඔවුන්ට අනුකම්පාවක් නොපෙන්වා, මහල්ලන් පිට ඔබේ වියගහ ඉතා බර කෙළෙහිය.

⁷මම සෑම කල්ම ස්වාමිදුවව සිටින්නෙමියි ඔබ කීවෙහිය. මෙසේ ඔබ මේ දේවල් සිතට ගත්තේවත්, එහි අන්තිමය සිහිකළේවත් නැත.

⁸ඉතින් සැප ජීවිකාවට ඇලුම්වූ, නොසැලකිලිකමින් වාසයකරන්නාවූ: තවත් කෙනෙක් නැතුව මමම සිටිමියි කියාද මා වැන්දඹුවක් වෙන්නේවත් දරුවන් නැතිවීමක් අත්දකින්නේවත් නැතැයි කියාද සිත තුළ කියාගන්නාවූ ඔබ මේක අසන්න.

⁹නුමුත් ඒ දෙකම එනම් දරුවන් නැතිවීමද වැන්දඹුකමද එක දවසේම හදිසියෙන් ඔබට පැමිණෙන්නේය. ඔබේ බොහෝ මායම්ද ඔබේ රාශි ගණන් මන්ත්‍රද තිබෙද්දීත් ඒවා සම්පූර්ණයෙන්ම ඔබ පිටට පැමිණෙන්නේය.

¹⁰මක්නිසාද ඔබේ දුෂ්ටකමෙහි ඔබ නොසැලකිලිව සිට: මා දකින කෙනෙක් නැතැයි කීවෙහිය; ඔබේ ප්‍රඥාව හා ඔබේ දැනගැන්ම කරණකොටගෙන ඔබ මුළාවී: තවත් කෙනෙක් නැතුව මමම සිටිමියි ඔබේ සිත තුළ සිතාගත්තෙහිය.

¹¹ඒ නිසා විපත්තිය ඔබ පිටට පැමිණෙන්නේය; ඒක මතුරා හරින්ට ඔබ නොදන්නෙහිය. ඔබට පහකරගන්ට බැරි නාස්තියක් ඔබ පිටට වැටෙන්නේය. ඔබ නොදන්න විනාශයක්ද හදිසියෙන් ඔබ පිටට පැමිණෙන්නේය.

¹²ඉතින් ඔබේ බාල වයසේ පටන් ඔබ විසින් වෙහෙස ඇතුව පුරුදුකළාවූ ඔබේ මන්ත්‍රද බොහෝවූ ඔබේ මායම්ද භාවිතාකරන්න; සමහරවිට ඔබට වාසි ලබාගත හැකිවන්නේය, සමහර විට ඔබ සතුරන්ට භය උපදවන්නෙහිය.

¹³ඔබේ බොහෝ මන්ත්‍රණවලින් ඔබ වෙහෙසවී සිටිනෙහිය. ඉතින් නක්ෂත්‍රකාරයෝද තාරකා බලන්නෝද අමාවක්වලදී කාරණා දන්වන්නෝද නැගිට, ඔබ පිටට පැමිණෙන දේවලින් ඔබ ගළවත්වා.

¹⁴බලව, ඔව්හු ඉපනැලි මෙන් වන්නෝය; ගින්න ඔවුන් දවන්නේය; ඔව්හු ගිනිදැල්ලේ බලයෙන් තමුන්ම ගළවා නොගන්නෝය. එය ගිනි තපින්ට අඟුරක්වත් ළංව ඉන්ට ගින්නක්වත් නොවන්නේය.

¹⁵ඔබ යම් යම් දේ සමඟ වෙහෙසුණෙහිද ඒවා ඔබට එයාකාරවන්නේය. ඔබේ යෞවන වයසේ පටන් ඔබ සමඟ වෙළඳාම්කළ අයවල් තම තමුන්ගේ දිශාවලට අහක්ව යන්නෝය; ඔබ ගළවන්ට කිසිවෙක් නොවන්නේය.