Read Sinhala Revised Old Version යෙසායා 57 Bible Online

යෙසායා 57 - Sinhala Revised Old Version bible

යෙසායා 57

¹ධර්මිෂ්ඨයා පහවයන්නේය, නුමුත් කිසිවෙක් එය සිතට නොගන්නේය; භක්තිවන්ත මනුෂ්‍යයෝද පහකරනු ලබති, නුමුත් ධර්මිෂ්ඨයා විපත්තිය ඉදිරියෙන් ගෙනයනු ලබන බව කිසිවෙක් කල්පනාකරන්නේ නැත.

²ඔහු සමාදානයට පැමිණෙයි; තමුන්ගේ අවංකකමින් හැසිරෙන්නෝ තමුන්ගේ යහන්වල නිශ්චලව සිටින්නෝය.

³එහෙත් මායාකාරීගේ පුත්‍රයෙනි, පරදාරිකයාගෙත් වේශ්‍යාවගෙත් වංශය, මෙහි ළංවෙන්න.

⁴ඔබ සැම කාට විරුද්ධව කවටකම්කරන්නහුද? ඔබ සැම කාට විරුද්ධව කට අයා දිව දික්කරන්නහුද?

⁵අලෝන ගස් අතරෙන් සියලුම ගස් යටත් රාගයෙන් දැවෙන්නාවූ, මිටියාවත්වල පර්වත විවර යට දරුවන් මරන්නාවූ ඔබ සැම කැරළිකාරකමේ දරුවොත් බොරුකාර වංශයකුත් නොවන්නහුද?

⁶ඔබේ කොටස තිබෙන්නේ මිටියාවතේ සිනිඳු ගල් අතරෙහිය; ඒවාම ඔබේ කොටසය. ඒවාට ඔබ පාන පූජාවක් වගුරුවා ආහාර පූජාවක්ද ඔප්පුකෙළෙහිය. මේ දේවල් තිබියදී මා නිශ්චලව සිටින්නේ කොහොමද?

⁷උස්වූ උසස්වූ කන්දක් උඩ ඔබේ යහන ඔබ තබාගත්තෙහිය. එතැනද පූජා ඔප්පුකිරීමට ඔබ නැගී ගියෙහිය.

⁸දොරටත් උළුවස්සටත් එහායින් ඔබේ සලකුණ ඔබ තබා තිබේ. මක්නිසාද ඔබ මට නොව අනිකෙකුට ඔබම ප්‍රකාශවී නැගී ගියෙහිය; ඔබේ යහන පළල්කොට ඔවුන්ගෙන් පොරොන්දු ලබාගත්තෙහිය; ඔවුන්ගේ යහන දුටු තැනදී ඊට ආලය වූයෙහිය.

⁹ඔබ රජු වෙතට තෛල රැගෙන පැමුණුනෙහිය, ඔබේ සුවඳ දේද වැඩිකරගත්තෙහිය, ඔබේ තානාපතීන් ඔබ දුරු රටවලට ඇර, පාතාලය දක්වා පහතට බැස්සෙහිය.

¹⁰ඔබේ මාර්ගයේ දීර්ඝකම නිසා ඔබ වෙහෙසවූවෙහිය; එසේ වුවත්: එය නිෂ්ඵලයයි ඔබ නොකීවෙහිය. ඔබේ අතේ ප්‍රාණවත්කම සම්බවූ බැවින් ඔබ දුර්වල නූණෙහිය.

¹¹ඔබ මා සිහි නොකොට, ඒක සිතට නොගෙන, බොරුකීවේ කාට තැතිගෙන භයවෙලාද? මම බොහෝ කලක්ම නිශ්ශබ්දව නොසිටියෙම්ද? නුමුත් ඔබ මා කෙරෙහි භයක් නැත.

¹²මම ඔබේ ධර්මිෂ්ඨකම දන්වන්නෙමි; ඔබේ ක්‍රියාවලින් නම් ඔබට ප්‍රයෝජන නොලැබේ.

¹³ඔබ මොරගසන විට ඔබ විසින් රැස්කරගත් ඒ දේවල් ඔබ ගළවා ගනීවා; ඒ සියල්ලම හුළඟට ගහගන යන්නේය, හුස්මකට පහවන්නේය. නුමුත් මා කෙරෙහි විශ්වාසකරන්නා දේශය අත්කරගෙන, මාගේ ශුද්ධවූ කන්ද උරුමකරගන්නේය.

¹⁴කෙනෙක් කථාකොට: සමතලාකරන්න. සමතලාකර, මාර්ගය පහදා පැකිලවන දේ මාගේ සෙනඟගේ මාර්ගයෙන් අහක්කරන්නැයි කියනවා ඇත.

¹⁵මක්නිසාද උසස්වූ, උත්කෘෂ්ටවූ, සදාකාලයෙහි වසන්නාවූ ශුද්ධය යන නාමය ඇති තැනන්වහන්සේ මෙසේ කියනසේක. මම උසස්වූ ශුද්ධවූ ස්ථානයෙහිද යටහතුන්ගේ ආත්මය ප්‍රාණවත් කරන්ටත් පොඩිවී සිටින්නන්ගේ සිත ප්‍රාණවත්කරන්ටත් තැළුණවූ යටහත් ආත්මයක් ඇත්තා සමඟ වාසයකරමි.

¹⁶මම සදාකල්ම විවාද නොකරන්නෙමි, සෑම කල්ම උදහස්ව නොසිටින්නෙමි. එසේ සිටියොත් මා ඉදිරියෙහි ආත්මයද මා විසින් මැවූ ප්‍රාණද ක්ලාන්තවී යන්නෝය.

¹⁷ඔහුගේ තණ්හාවේ වරද නිසා මම උදහස්වී ඔහුට පහරදී, සැඟවී උදහස්ව සිටියෙමි. එහෙත් ඔහු හිතුවක්කාරව තමාගේ සිතේ මාර්ගයෙහිම ගියේය.

¹⁸මම ඔහුගේ මාර්ග දුටිමි, ඔහු සුවකරන්නෙමි. මම ඔහුට මගපෙන්වා, ඔහුටත් ඔහු සමඟ වැලපෙන්නන්ටත් නැවත සැනසීම දෙන්නෙමි.

¹⁹මම තොල්වල ඵල උපදවමි. දුර සිටින්නාටත් ළඟ සිටින්නාටත් සමාදානය වේවා, සමාදානය වේවා; මම ඔහු සුවකරන්නෙමියි ස්වාමීන්වහන්සේ කියනසේක.

²⁰නුමුත් දුෂ්ටයෝ කැලඹී තිබෙන මුහුදට සමානය; මක්නිසාද ඊට නිශ්චලවන්ට නුපුළුවන, එහි ජලය මඩ හා කුණු මතුකරයි.

²¹දුෂ්ටයන්ට සමාදානය නැතැයි මාගේ දෙවියන්වහන්සේ කියනසේක.