Read Sinhala Revised Old Version යෙසායා 58 Bible Online

යෙසායා 58 - Sinhala Revised Old Version bible

යෙසායා 58

¹නොනැවතී හයියෙන් මොරගසා, හොරණෑවක් මෙන් ඔබේ හඬ නගා, මාගේ සෙනඟට ඔවුන්ගේ වරදවල්ද යාකොබ්ගේ වංශයට ඔවුන්ගේ පව්ද දන්වන්න.

²ඔව්හු දවස් පතා මා සොයති, මාගේ මාර්ගයන් දැනගන්ට ප්‍රසන්නවෙති. ධර්මිෂ්ඨකම්කොට තමුන්ගේ දෙවියන්වහන්සේගේ නියෝගය අත්නෑර සිටින ජාතියක්මෙන් ඔව්හු ධර්මිෂ්ඨ නියෝග මාගෙන් ඉල්ලති, දෙවියන්වහන්සේ වෙතට ළංවීමට ප්‍රසන්නවෙති.

³අප නිරාහාරයෙන් සිටිය නුමුත් ඔබ නොබැලුවෙත් අපේ ප්‍රාණවලට පීඩාකරගත් නුමුත් ඔබ නොසලකා සිටින්නෙත් මක්නිසාදැයි කියති. බලව, ඔබ සැමගේ උපවාස දවසේදී ඔබ සැම සැප ගනිති, ඔබ සැමගේ සියලුම වැඩද කරවාගනිති.

⁴ඔබ සැම නිරාහාරව සිටින්නේ විවාදයටත් තරඟයටත් දුෂ්ටකමේ මිටින් ගසන්ටත්ය. ඔබ සැමගේ හඬ උසස්ථානයේ ඇසෙන්ට සැලසෙන පරිද්දෙන් ඔබ සැම අද නිරාහාරව සිටින්නේ නැත.

⁵මනුෂ්‍යයෙක් තමාගේ ප්‍රාණය යටත්කරගන්න දවසක් වන මා විසින් තෝරාගත් උපවාසය එයාකාරද? එය තමාගේ හිස පන් ගසක් මෙන් නමාගෙන, ගෝණිරෙදි සහ අළු අතුරාගන හිදීමද? මීට උපවාසයක් සහ ස්වාමීන්වහන්සේට ප්‍රසන්නවූ දවසක්යයි ඔබ කියනවාද?

⁶මා විසින් තෝරාගත් උපවාසය නම් දුෂ්ටකමේ විලංගු මුදාහැරීමත්, වියගහේ බැඳුම් ලිහීමත්, බලාත්කාරය විඳින්නන් නිදහස්කර හැරීමත්, සියලුම වියගස් ඔබ සැම විසින් කඩාදැමීමත් නොවේද?

⁷බඩගිනි ඇත්තන්ට ඔබේ කෑම බෙදාදීමත්, ගෙයක් දොරක් නැති අසරණයන් ඔබ විසින් ඔබේ ගෙදරට පැමිණවීමත්, නිර්වස්ත්‍ර කෙනෙක් දුටුවිට ඔහුට ඇඳුම් දීමත්, ඔබේම නෑසියන්ගෙන් නොසැඟවී සිටීමත් නොවේද?

⁸එවිට ඔබේ එළිය පහන්වේලාව මෙන් උදාවන්නේය, ඔබේ සුවයද ඉක්මනින් හටගන්නේය. ඔබේ ධර්මිෂ්ඨකම ඔබට පෙරටුවෙන් යන්නේය; ස්වාමීන්වහන්සේගේ තේජසද ඔබට පස්සෙන් එන්නේය.

⁹එවිට ඔබ යාච්ඤාකරන්නෙහිය, ස්වාමීන්වහන්සේ උත්තරදෙනසේක; ඔබ මොරගසන කල්හි: මම මෙහියයි උන්වහන්සේ කියනසේක. ඔබ වියගහද[31] ඇඟිල්ල දික්කිරීමද දුෂ්ටලෙස කථා කිරීමද ඔබ වෙතින් පහකරන්නෙහි නම්,

¹⁰බඩගිනි ඇත්තා කෙරෙහි කරුණාව පෙන්වා, අසරණ ප්‍රාණය තෘප්තියට පමුණුවන්නෙහි නම්, අඳුරේදී ඔබේ එළිය නැගී එන්නේය, ඔබේ කළුවරකම ඉරමුදුන් වේලාව මෙන් වන්නේය.

¹¹ස්වාමීන්වහන්සේ නිතරම ඔබට මගපෙන්වා, වියළි තැන්වලදී ඔබේ ප්‍රාණය තෘප්තියට පමුණුවා, ඔබේ ඇටද ශක්තිමත්කරනසේක; ඔබ වතුර ඇති උයනක් මෙන්ද දිය සිදී නොයන උල්පතක් මෙන්ද වන්නෙහිය.

¹²ඔබෙන් පැවතඑන්නෝ පරණ නටබුන් තැන් ගොඩනගන්නෝය. ඔබ බොහෝ පරම්පරාවල අත්තිවාරම් ගොඩනගන්නෙහිය; කැඩුම් හරිගස්සන්නාය, වාසය පිණිස මාවත් අලුත්වැඩියාකරන්නායයි ඔබට කියනු ලැබේ

¹³ඔබ මාගේ ශුද්ධ දවසේදී ඔබේම කැමැත්ත නොකරන හැටියට ඔබේ පාද සබත් දවසේදී නවත්වාගන, සබත් දවස ප්‍රිය එකක්ය කියාද ස්වාමීන්වහන්සේගේ ශුද්ධ දවස ගෞරවණීය එකක්ය කියාද කියන්නෙහි නම්, ඔබේම මාර්ගවල නොහැසිර ඔබේම කැමැත්ත නොසොයා, හිස් වචන කථා නොකර, ඊට ගෞරවකරන්නෙහි නම්,

¹⁴ඔබ ස්වාමීන්වහන්සේ කෙරෙහි ප්‍රීතිමත්වන්නෙහිය; මමද පොළොවේ උසස්ථාන මතුයෙහි නැගීයන්ට ඔබට සලස්වා, ඔබේ පියවූ යාකොබ්ගේ උරුමයෙන් ඔබ පෝෂණයකරන්නෙමි. මක්නිසාද ස්වාමීන්වහන්සේගේ මුඛය ඒක වදාළේය.