Read Sinhala Revised Old Version යෙසායා 60 Bible Online

යෙසායා 60 - Sinhala Revised Old Version bible

යෙසායා 60

¹නැගිට බැබළියන්න, මක්නිසාද ඔබේ ආලෝකය පැමුණුණේය, ස්වාමීන්වහන්සේගේ තේජසද ඔබ කෙරෙහි උදාවිය.

²එසේය, පොළොව අන්ධකාරයෙන්ද ජනයෝ තද අන්ධකාරයෙන්ද වසනු ලබන්නෝය. නුමුත් ඔබ කෙරෙහි ස්වාමීන්වහන්සේ උදාවනසේක, උන්වහන්සේගේ තේජසද ඔබ කෙරෙහි පෙනෙන්නේය.

³ජාතීන් ඔබේ ආලෝකයටද රජවරුන් ඔබේ උදාවීමේ දීප්තියටද එනවා ඇත.

⁴ඔබේ ඇස් ඔසවා වටකර බලන්න. ඔවුන් සියල්ලෝම රැස්වී ඔබ ළඟට එති. ඔබේ පුත්‍රයන් දුර සිට එනවා ඇත, ඔබේ දූවරුන්ද උකුළේ වඩාගන එන්ට යෙදෙනවා ඇත.

⁵එකල ඔබ දැක ප්‍රීතිවන්නෙහිය, ඔබේ සිතද පිනාගොස් විශාලවන්නේය; මක්නිසාද මුහුදේ සම්පත් ඔබ වෙත හැරීඑන්නේය, ජාතීන්ගේ වස්තුද ඔබ ළඟට පැමිණෙන්නේය.

⁶ඔටු සමූහයකින්ද මිදියන් සහ ඒපාහි තරුණ ඔටුවන්ගෙන්ද ඔබේ ස්ථානය පිරෙන්නේය; ෂෙබායෙන් ඔවුන් සියල්ලන් එනවා ඇත. ඔවුන් රන්ද කට්ටකුමංචල්ද ගෙනවුත් ස්වාමීන්වහන්සේගේ ප්‍රශංසා ප්‍රකාශකරනවා ඇත.

⁷කේදාර්හි සියලු එළු බැටළු රැළවල් ඔබ වෙතට රැස්කරනු ලැබෙත්, නෙබායොත්හි බැටළුවෝ ඔබට සේවයකරත්. උන් මාගේ පූජාසනය පිටට පැමිණ පිළිගනු ලැබෙත්. මමද මාගේ තේජසේ ගෘහය අලංකාරකරන්නෙමි.

⁸වලාකුළක් මෙන්ද පරෙවියන් උන්ගේ කවුළුවලට ඉගිලෙන්නාක්මෙන්ද අර ඉගිලී එන අය කවුරුද?

⁹සැබවින් ද්වීපයෝද පළමුකොට තර්ෂිෂ්හි නැව්ද මා ගැන බලාසිටින්නෝය. බලාසිටින්නේ දුරින් ඔබේ පුත්‍රයන්ද ඔවුන් සමඟ ඔවුන්ගේ රන්රිදීද ඔබේ දෙවිවූ ස්වාමීන්වහන්සේගේ නාමයත් ඉශ්‍රායෙල්ගේ ශුද්ධ තැනන්වහන්සෙත් නිසා ගෙනෙන පිණිසය; මක්නිසාද උන්වහන්සේ ඔබට ගෞරවකර තිබේ.

¹⁰විදේශීහු ඔබේ පවුරු ගොඩනගන්නෝය, ඔවුන්ගේ රජවරුද ඔබට සේවයකරන්නෝය. මක්නිසාද මම මාගේ උදහසෙන් ඔබට පහරදුන් නුමුත් මාගේ කරුණාවෙන් ඔබට අනුකම්පාකෙළෙමි.

¹¹ජාතීන්ගේ වස්තු ඔබ ළඟට ගෙනෙන පිණිසද ඔවුන්ගේ රජුන් පෙරටුව එන පිණිසද ඔබේ දොරටු රෑ දාවල් නොවසා නිතරම ඇරී තිබේ.

¹²මක්නිසාද ඔබට සේවය නොකරන ජාතියද රාජ්‍යයද නැතිවන්නේය; එසේය, ඒ ජාතීහු සහමුලින්ම විනාශවන්නෝය.

¹³මාගේ ශුද්ධස්ථානය අලංකාරකිරීමට ලෙබනොන්හි තේජසද දේවදාර ගස්ද හල් ගස්ද තෂ්ෂුර් ගස්ද එක්ව ඔබ ළඟට පැමිණෙනවා ඇත; මමද මාගේ පාදස්ථානය තේජවත්කරන්නෙමි.

¹⁴ඔබට පීඩාකළ අයගේ පුත්‍රයන්ද නැමි නැමී ඔබ වෙතට එනවා ඇත; ඔබව සුළුකළ සියල්ලන්ද ඔබේ පාමුල වැඳවැටෙනවා ඇත; ඔවුන් ඔබට: ස්වාමීන්වහන්සේගේ නුවරය කියාත් ඉශ්‍රායෙල්ගේ ශුද්ධ තැනන්වහන්සේගේ සියොන්ය කියාත් කියනවා ඇත.

¹⁵කිසිවෙක් ඔබ ළඟින් නොයන ලෙස ඔබ අත්හරිනු ලැබ වෛරය විඳිනවා වෙනුවට, මම ඔබ සදාකාල උතුම්කමක්ද පරම්පරාවෙන් පරම්පරාවට ප්‍රීතියක්ද කරන්නෙමි.

¹⁶ඔබ ජාතීන්ගේ කිරි උරා බොන්නෙහිය, රජුන්ගේ තන උරන්නෙහිය. ස්වාමීන්වහන්සේ වන මම ඔබේ ගැළවුම්කාරයා බවත් ඔබේ මිදුම්කාරයා යාකොබ්ගේ බලවන්තයාණන්වහන්සේ බවත් ඔබ දැනගන්නවා ඇත.

¹⁷මම පිත්තල වෙනුවට රත්රන් ගෙනෙන්නෙමි, යකඩ වෙනුවට රිදීද ලී වෙනුවට පිත්තලද ගල් වෙනුවට යකඩද ගෙනෙන්නෙමි. මම ඔබේ මුලාදෑනීන් සමාදානයද ඔබේ ආණ්ඩුකාරයන් ධර්මිෂ්ඨකමද වෙන්ට සලස්වන්නෙමි.

¹⁸ඔබේ දේශයෙහි බලාත්කාරයද ඔබේ සීමා ඇතුළේ නාස්තිය හා විනාශයද ගැන තවත් අසන්ට නොලැබෙන්නේය; ඔබේ පවුරු ගැළවීමය කියාද ඔබේ දොරටු ප්‍රශංසාවය කියාද ඔබ කියන්නෙහිය.

¹⁹ඉර තවත් ඔබේ දවාලේ එළිය නොවන්නේය; දීප්තිය පිණිස සඳද ඔබට එළිය නොදෙන්නේය. නුමුත් ස්වාමීන්වහන්සේ ඔබට සදාකාල එළියක්ද ඔබේ දෙවියන්වහන්සේ ඔබේ තේජසද වනසේක.

²⁰ඔබේ ඉර තවත් බැසයන්නේවත්, ඔබේ සඳ පහව යන්නේවත් නැත. මක්නිසාද ස්වාමීන්වහන්සේ ඔබේ සදාකාල එළිය වනසේක, ඔබේ වැලපීමේ දවස් කෙළවරවන්නේය.

²¹ඔබේ සෙනඟ සියල්ලෝම ධර්මිෂ්ඨව, මා විසින් සිටෙවු පැළයක්ව, මාගේ අත්වල කර්මාන්තයව සිට මා ගෞරවය ලබන පිණිස සදාකාලේටම පොළොව භුක්තිවිඳින්නෝය.

²²කුඩා තැනැත්තා දහසක්ද සුළු තැනැත්තා බලවත් ජාතියක්ද වන්නේය. ස්වාමිවූ මම ඒකේ නියම කලට ඒක ඉක්මන් කරන්නෙමි.