Read Sinhala Revised Old Version යෙරෙමියා 13 Bible Online

යෙරෙමියා 13 - Sinhala Revised Old Version bible

යෙරෙමියා 13

¹ස්වාමීන්වහන්සේ මට කථාකොට: ඔබ ගොස් හණ පටියක් මිලේටගෙන ඔබේ ඉඟටියෙහි බැඳගන්න, ඒක වතුරේ නොදමන්නැයි කීසේක.

²මමද ස්වාන්වහන්සේගේ වචනය ලෙස පටියක් මිලේටගෙන මාගේ ඉඟටියෙහි බැඳගත්තෙමි.

³දෙවෙනි වර ස්වාමීන්වහන්සේගේ වචනය මා වෙතට පැමිණ:

⁴ඔබ මිලේටගත්තාවූ ඔබේ ඉඟටියෙහි තිබෙන පටිය අරගෙන පිටත්වී, ප්‍රාත්[8] ගංගාව ළඟට ගොස් එහි පර්වතයේ විවරයක ඒක සඟවා තබන්නැයි කීය.

⁵මමද ස්වාමීන්වහන්සේ මට අණකළ ලෙස ගොස් ප්‍රාත්[9] ගංගාව ළඟ ඒක සඟවා තැබීමි.

⁶බොහෝ දවසකට පසු ස්වාමීන්වහන්සේ මට කථාකොට: ඔබ පිටත්වී ප්‍රාත්[10] ගංගාව ළඟට ගොස්, එහි සඟවා තබන්ට මා විසින් ඔබට අණකළ පටිය එතැනින් ගන්නැයි කීසේක.

⁷මමද ප්‍රාත්[11] ගංගාව ළඟට ගොස්, හාරා, මා විසින් පටිය සඟවා තැබූ තැනින් ඒක ගතිමි. එවිට පටිය නරක්ව වැදගැන්මකට නැතුව තිබුණේය.

⁸ස්වාමීන්වහන්සේගේ වචනයද මා වෙතට පැමිණ මෙසේ කීය:

⁹ස්වාමීන්වහන්සේ මෙසේ කියනසේක- මෙයාකාරයෙන් මම යූදා රටේ උඩඟුකමද යෙරුසලමේ මහත් උඩඟුකමද නරක්කරන්නෙමි.

¹⁰මාගේ වචන අසන්ට අකමැතිවූ, තමුන්ගේ සිත්වල මුරණ්ඩුකම ලෙස හැසිර අන් දෙවිවරුන්ට සේවයකරන්ටත් නමස්කාරකරන්ටත් ඔවුන් පස්සේ යන්නාවූ මේ නපුරු සෙනඟ වැදගැන්මකට නැති මේ පටිය මෙන් වෙනවා ඇත.

¹¹පටිය මනුෂ්‍යයෙකුගේ ඉඟට ඇලෙන්නාක්මෙන් මට සෙනඟක්ද නාමයක්ද ප්‍රශංසාවක්ද තේජසක්ද වන පිණිස මුළු ඉශ්‍රායෙල් වංශයද මුළු යූදා වංශයද මට ඇලුම්වෙන්ට සැලැස්වීමි. නුමුත් ඔව්හු අසන්ට අකමැතිවූවෝයයි ස්වාමීන්වහන්සේ කියනසේක.

¹²තවද සියලු භාජන මුද්‍රිකපානයෙන් පිරී තිබෙන්නේයයි ඉශ්‍රායෙල්ගේ දෙවිවූ ස්වාමීන්වහන්සේ කියනසේක යන මේ වචනය ඔවුන්ට කියන්න. ඔවුන්ද: සියලු භාජන මුද්‍රිකපානයෙන් පිරී තිබෙන්නේය යන බව අපි නොදනිමෝදැයි ඔබට කියනවා ඇත.

¹³එවිට: ස්වාමීන්වහන්සේ මෙසේ කියනසේකැයි ඔවුන්ට කියන්න එනම්,--මේ දේශයේ සියලු වැසියන්ද දාවිත්ගේ සිංහාසනයෙහි ඉන්න රජවරුන්ද පූජකයන්ද ප්‍රොපේතවරුන්ද යෙරුසලමේ සියලු වැසියන්ද මත් ගතියකින් පුරවා,

¹⁴මනුෂ්‍යයෙකු හා ඔහුගේ සහෝදරයාද පියවරුන් හා පුත්‍රයන්ද එකට ගසන්නෙමි; ඔවුන් විනාශ නොකරන හැටියට මා දයාවෙන්නේවත් කරුණාකරන්නේවත් අනුකම්පාකරන්නේවත් නැතැයි ස්වාමීන්වහන්සේ කියනසේක.

¹⁵ඔබ සැම උඩඟු නොවී අසා කන්යොමුකරන්න. මක්නිසාද ස්වාමීන්වහන්සේ කථාකළසේක.

¹⁶උන්වහන්සේ අන්ධකාරකරන්ට පළමුවෙන්ද ඔබ සැමගේ පාද අඳුරු කඳුවල පැකිලෙන්ටත් ඔබ සැම එළිය ගැන බලා සිටිද්දී උන්වහන්සේ එය මරණයේ සෙවණට හරවා කළුවරකරන්ටත් පළමුවෙන්ද ඔබ සැමගේ දෙවිවූ ස්වාමීන්වහන්සේට ගෞරව දීපල්ලා.

¹⁷නුමුත් ඔබ සැම ඒක අසන්නේ නැත්නම්, මාගේ ආත්මය රහස් තැන්වලදී ඔබ සැමගේ උඩඟුකම ගැන අඬා, බොහෝසෙයින් කඳුළු වගුරුවනවා ඇත; ස්වාමීන්වහන්සේගේ රැළද වාලට ගෙනයනු ලැබූ නිසා මාගේ ඇස්වලින් කඳුළු ගලනවා ඇත.

¹⁸ඔබ සැම පහත ඉඳගන්න. මක්නිසාද ඔබ සැමගේ තේජවන්ත ඔටුන්න ඔබ සැමගේ හිස්වලින් වැටුණේයයි රජුටත් මවු බිසවටත් කියන්න.

¹⁹දකුණු දිශාවේ නුවරවල් වසා තිබේ, ඒවා අරින්ට කෙනෙක් නැත. මුළු යූදා රට වාලට ගෙනයනු ලැබීය; සහමුලින්ම ගෙනයනු ලැබීය.

²⁰යෙරුසලම, ඔබේ ඇස් ඔසවා, උතුරුදිගින් එන්නන් බලන්න. ඔබට දුන් රැළ වන ඔබේ අලංකාර රැළ කොයිද?

²¹ඔබට යහළුවන් වෙන්ට ඔබම ඉගැන්වූ අයවලුන් උන්වහන්සේ ඔබ කෙරෙහි ප්‍රධානකමට පත්කරන විට ඔබ මක්කියන්නෙහිද? බිහිකරන ස්ත්‍රියෙකුට මෙන් ඔබට වේදනා අල්ලන්නේ නැද්ද?

²²මේවා මම සිද්ධවුණේ මක්නිසාදැයි ඔබේ සිත තුළ ඔබ ඇසුවාම, ඔබේ අයුතුකමේ ඇඳුම් අහක්කරනු ලැබ, ඔබේ වහන්ද උදුරනු ලැබූ බව දැනගන්න.

²³කූෂ් වැසියාට තමාගේ හමවත් අඳුන් දිවියාට උගේ තිත්වත් වෙනස්කරන්ට පුළුවන්ද? පුළුවන් නම්, නපුර කරන්ට පුරුදුව සිටින ඔබ සැමටත් යහපත කරන්ට පුළුවන්වේ.

²⁴ඒ නිසා කාන්තාරයේ සුළඟට ගසාගන යන ඉපනැලි මෙන් ඔවුන් විසුරුවා දමන්නෙමි.

²⁵ඔබ මා මතක නැතිකොට බොරුවක් කෙරෙහි විශ්වාසකළ නිසා මේක ඔබේ කොටසත් මා විසින් ඔබට මැනදෙන පංගුවත්යයි ස්වාමීන්වහන්සේ කියනසේක.

²⁶එබැවින් මමත් ඔබේ ලජ්ජාව පෙනෙන පිණිස ඔබේ ඇඳුම ඔබේ මුහුණ පිට දැමුවෙමි.

²⁷ඔබේ මිථ්‍යාචාරකම්ද ඔබේ හේෂාරවය කිරීම්ද පිටත හෙල් පිට ඔබ කරන ඔබේ දූෂ්‍ය වේශ්‍යාකම්ද යන ඔබේ පිළිකුල්කම් මම දුටිමි. යෙරුසලම, ඔබට දුක්වේ! ඔබ පිරිසිදුවෙන්ට අකමැතිය; තව කොපමණ කලකින් එය සිදුවන්නේද?