Read Sinhala Revised Old Version යෙරෙමියා 30 Bible Online

යෙරෙමියා 30 - Sinhala Revised Old Version bible

යෙරෙමියා 30

¹ස්වාමීන්වහන්සේගෙන් යෙරෙමියා වෙතට පැමිණි වචනය මේය.

²ඉශ්‍රායෙල්ගේ දෙවිවූ ස්වාමීන්වහන්සේ මෙසේ කියනසේක: මා විසින් ඔබට කී සියලුම වචන පොතක ලියන්න.

³මක්නිසාද මා විසින් මාගේ සෙනඟවූ ඉශ්‍රායෙල්වරුන්ගෙත් යූදාවරුන්ගෙත් වාල්කම පහකරන දවස් පැමිණෙන්නේයයි ස්වාමීන්වහන්සේ කියනසේක. මම ඔවුන්ගේ පියවරුන්ට දුන් දේශයට ඔවුන් නැවත ගෙනෙන්නෙමි, ඔව්හුද ඒක භුක්තිවිඳින්නෝයයි ස්වාමීන්වහන්සේ කියනසේක.

⁴තවද ඉශ්‍රායෙල්වරුන් සහ යූදාවරුන් ගැන ස්වාමීන්වහන්සේ කී වචන මේවාය.

⁵ස්වාමීන්වහන්සේ මෙසේ කියනසේක: වෙවුලවීමේ හඬක් අපට ඇසුණේය; එය සමාදානයේ නොව භීතියේ හඬක් ය.

⁶පුරුෂයෙක් බිහිකරන වේදනා විඳින්නේද කියා අසා බලන්න. බිහිකරන ස්ත්‍රියෙකු මෙන් සියලු පුරුෂයන් ඉඟටියේ අත් තබාගන ඉන්නවාත් සියලු මුහුණු සුදුමැළිව තිබෙනවාත් මට පෙනෙන්නේ මක්නිසාද?

⁷අහෝ! ඒ දවස මහත්ය, ඊට සමානවූ දවසක් නැත. ඒක යාකොබ්ගේ විපත්ති කාලයය; එහෙත් ඔවුන් එයින් ගළවනු ලබනවා ඇත.

⁸මක්නිසාද ඒ දවසේදී ඔහුගේ වියගහ ඔබේ බෙල්ලෙන් බිඳදමා, ඔබේ බැඳුම් කඩාදමන්නෙමියි සේනාවල ස්වාමීන්වහන්සේ කියනසේක. විදේශියෝ තවත් ඔවුන් යටත්කර නොගන්නෝය.

⁹ඔව්හුද තමුන්ගේ දෙවිවූ ස්වාමීන්වහන්සේට ත් මා විසින් ඔවුන්ට නැගුටුවාදෙන තමුන්ගේ රජවූ දාවිත්ටත් සේවයකරන්නෝය.

¹⁰ඒ නිසා: මාගේ මෙහෙකරුවාවූ යාකොබ්, ඔබ භය නොවන්න; ඉශ්‍රායෙල්, නොකැලඹෙන්නැයි ස්වාමීන්වහන්සේ කියනසේක. මක්නිසාද, බලව, මම ඔබ දුරස්තරයෙන්ද ඔබේ වංශය ඔවුන්ගේ වාල්කමේ දේශයෙන්ද ගළවමි; යාකොබ් හැරී ඇවිත් කිසිවෙකුගෙන් භයක් නොලැබ, නිශ්චලව සුවසේ සිටිනවා ඇත.

¹¹මක්නිසාද ඔබ ගළවන්ට මම ඔබ සමඟ සිටිමියි ස්වාමීන්වහන්සේ කියනසේක. මා විසින් ඔබ විසුරුවාදැමූ තැන්වල සියලු ජාතීන් තීන්දුවටම නැතිකරන නුමුත්, ඔබ තීන්දුවටම නැතිනොකර, නිසි ප්‍රමාණයෙන් ඔබට දඬුවම්කරන්නෙමි, නුමුත් ඔබට අච්චුනොකර නොසිටින්නෙමි.

¹²මක්නිසාද ස්වාමීන්වහන්සේ මෙසේ කියනසේක: ඔබේ තුවාලය අසාධ්‍යව ඔබේ පහර ඉතා තදව තිබේ.

¹³ඒවා බැදීමට ඔබේ කාරණය භාරගන්න කෙනෙක් නැත. ඔබ සුවකරන්ට කිසි ඖෂධයක් නැත.

¹⁴ඔබේ සියලුම ප්‍රේමවන්තයෝ ඔබ මතකනැතිකළෝය; ඔවුන් ඔබ ගැන විභාගකරන්නේ නැත. ඔබේ අයුතුකමේ මහත්කම නිසාද ඔබේ පව් වැඩිවූ නිසාද සතුරෙකුගේ පහරවලින්, කෲර කෙනෙකුගේ දඬුවමකින් ඔබට පහරදුනිමි.

¹⁵ඔබේ තුවාලය නිසා ඔබ කෑගසන්නේ මක්නිසාද? ඔබේ වේදනාව අසාධ්‍යව තිබේ. ඔබේ අපරාධයේ මහත්කම නිසාද ඔබේ පව් වැඩිවූ නිසාද මේ දේවල් ඔබට කෙළෙමි.

¹⁶එහෙත් ඔබව නාස්තිකරන සියල්ලෝම නාස්තිවන්නෝය; ඔබේ එදිරිකාරයන් සියල්ලෝම වාලට යන්නෝය; ඔබෙන් කොල්ලකන්නෝ කොල්ලයක් වන්නෝය, ඔබෙන් උදුරා ගන්න සියල්ලන්ද කොල්ලයක් කොට පාවාදෙන්නෙමි.

¹⁷පිටදමනු ලැබූ තැනැත්තිය, මෑ කිසිවෙකු විසින් නොසලකන සියොන්ය කියා ඔබට කියනලද බැවින්, මම ඔබට සනීප ලබාදී, ඔබේ පහර සුවකරන්නෙමියි ස්වාමීන්වහන්සේ කියනසේක.

¹⁸ස්වාමීන්වහන්සේ මෙසේ කියනසේක: බලව, මම යාකොබ්ගේ කූඩාරම්වල වහල්කම පහකොට, ඔහුගේ වාසස්ථානවලට අනුකම්පාකරන්නෙමි; නුවරද එහි හෙලපිට ගොඩනගනු ලැබ, මාළිගාව තිබුණු හැටියට පවතින්නේය.

¹⁹ඒවායින් ස්තුති කිරීමද සන්තෝෂවන්නන්ගේ හඬද නික්මෙන්නේය. මම ඔවුන් ස්වල්පව නොසිටින හැටියට ඔවුන් වැඩිකර, ඔවුන් සුළුව නොසිටින හැටියට ඔවුන්ට ගෞරවකරන්නෙමි.

²⁰ඔවුන්ගේ දරුවෝ පළමු සිටියාක් මෙන් වන්නෝය, ඔවුන්ගේ සභාවද මා ඉදිරියෙහි පිහිටෙනවා ඇත, ඔවුන්ට පීඩාකරන සියල්ලන්ට දඬුවම්කරන්නෙමි.

²¹ඔවුන්ගේ අධිපතියා ඔවුන්ගෙන්ම කෙනෙක් වන්නේය, ඔවුන්ගේ ආණ්ඩුකාරයාද ඔවුන් අතරෙන්ම නික්ම එන්නේය; ඔහු[24] මා වෙතට ළංවන පිණිස ඔහු[25] ළඟට පමුණුවා ගනිමි. මක්නිසාද මා වෙතට ළං වීමට නිර්භීතකම[26] ඇති තැනැත්තා කවුදැයි ස්වාමීන්වහන්සේ කියනසේක.

²²ඔබ සැම මාගේ සෙනඟ වන්නහුය, මමද ඔබ සැමගේ දෙවියන්වහන්සේ වන්නෙමි.

²³බලව, ස්වාමීන්වහන්සේගේ කෝපය සහිත කුණාටුවක් වන ගසාගන යන කුණාටුවක් නික්ම ගියේය. එය දුෂ්ටයන්ගේ හිස් පිට වදිනවා ඇත.

²⁴ස්වාමීන්වහන්සේ තමන්ගේ සිතේ අදහස් ඉෂ්ටකරන තෙක්ද සම්පූර්ණ කරන තෙක්ද උන්වහන්සේගේ බලවත් උදහස නොහැරෙන්නේය. මතු දවස්වලදී ඔබ සැම එය තේරුම්ගන්නවා ඇත.