Read Sinhala Revised Old Version එසකියෙල් 16 Bible Online

එසකියෙල් 16 - Sinhala Revised Old Version bible

එසකියෙල් 16

¹නැවතත් ස්වාමීන්වහන්සේගේ වචනය මා වෙතට පැමිණ කියනුයේ:

²මනුෂ්‍ය පුත්‍රය, යෙරුසලමට ඇගේ පිළිකුල්කම් දන්වමින්,

³මෙසේ කියන්න-ස්වාමිවූ දෙවියන්වහන්සේ යෙරුසලමට මෙසේ කියනසේක: ඔබේ පිළිසිදීම සහ ඔබේ ඉපදීමද කානානිවරුන්ගේ දේශයේදී සිද්ධවිය; ඔබේ පියා අමෝරියයාය, ඔබේ මවු හිත්තිය ස්ත්‍රියෙක්ය.

⁴ඔබ උපන් දවසේදී, ඔබ උපන් කල ඔබේ පෙකනිවැළ කැපුවේවත් පිරිසිදුකිරීමට ඔබ වතුරෙන් නෑවුවේවත් ඔබට ලුණු කොහෙත්ම ගෑවේවත් රෙදි එතුවේවත් නැත.

⁵ඔබට අනුකම්පාකොට මේවායින් එකක්වත් ඔබට කරන ලෙස කිසි ඇසක් ඔබ සැමට දයා නොවීය; ඔබ උපන් දවසේදී ඔබේ ප්‍රාණය පිළිකුල් එකක් ලෙස සලකා ඔබ කෙතේ දමනු ලැබුවෙහිය.

⁶මම ඔබ ළඟින් යන විට ඔබ ලේවල වැතිර ඉන්නවා දැක: ඔබ ඔබේ ලේවල වැතිර ඉන්දදී ජීවත්වෙයන්නැයි ඔබට කීවෙමි; එසේය, ජීවත්වෙයන්නැයි ඔබේ ලේවල වැතිර ඉන්දැද්දී ඔබට කීවෙමි.

⁷කෙතේ දළුව මෙන් ඔබ රාශි ගණන් වැඩිකෙළෙමි, ඔබ වැඩ මහත්වී, ඉතා ලක්ෂණ ස්වභාවකට පැමිණියෙහිය; ඔබේ පියයුරු සෑදුණේය, ඔබේ ඉසකේද වැඩුණේය; නුමුත් ඔබ නිර්වස්ත්‍රව නග්නව සිටියෙහිය.

⁸මම ඔබ ළඟින් ගොස් බැලූ කල, ඔබේ කාලය වන ප්‍රේමයේ කාලය පැමිණී තිබෙන බව දැක, මාගේ වස්ත්‍රය ඔබ පිට අතුරා, ඔබේ නිර්වස්ත්‍රකම වසා, ඔබට දිවුරුම්දී, ඔබ සමඟ ගිවිසුමක් කරගත්තෙමි, ඔබද මට අයිතිවූයෙහියයි ස්වාමිවූ දෙවියන්වහන්සේ කියනසේක.

⁹තවද මම ඔබ වතුරෙන් නාවා, ඔබෙන් හොඳාකාරයෙන් ලේ සෝදා හැර, තෙලින් ආලේපකෙළෙමි.

¹⁰විසිතුරු වස්ත්‍ර මම ඔබට හඳවා, තහෂ් හම්වලින්වූ වහන් ඔබට දමා, සිහින් හණ රෙදි පිළියෙන් කටිය බැඳ, පටරෙදිවලින් ඔබ වැසුවෙමි.

¹¹මම ආභරණවලින් ඔබ සරසමින්, ඔබේ අත්වල වළලුද ඔබේ බෙල්ලේ මාලයක්ද දැමුවෙමි.

¹²ඔබේ නාසයේ ආභරණයක්ද ඔබේ කන්වල කුණ්ඩලාභරණද ඔබේ හිසේ අලංකාර ඔටුන්නක්ද තැබුවෙමි.

¹³මෙසේ ඔබ රන් රිදීවලින් සැරසී සිටියෙහිය; ඔබේ වස්ත්‍රද සිහින් හණ රෙදිත් පට සහ විසිතුරු රෙදිත්ය; ඔබ සිහින් පිටිද මීපැණිද තෙල්ද කෑවෙහිය. ඔබ අතිශයින්ම ලක්ෂණවී, රාජ්‍යයක් වෙන හැටියට වර්ධනයවූවෙහිය.

¹⁴ඔබේ ශෝභනකම නිසා ඔබේ කීර්තිය ජාතීන් අතරේ පැතිරගියේය; මක්නිසාද මා විසින් ඔබ කෙරෙහි තැබූ මාගේ තේජස නිසා ඒක සම්පූර්ණව තිබුණේයයි ස්වාමිවූ දෙවියන්වහන්සේ කියනසේක

¹⁵නුමුත් ඔබේ ශෝභනකම කෙරේ ඔබ විශ්වාසකොට, ඔබේ කීර්තිය නිසා වේශ්‍යාකම්කරමින්, ළඟින් යන එකිනෙකාටම ඔබේ වේශ්‍යාකම් වැගිරෙවුවෙහිය; එය ඔහුට වුණේය.

¹⁶ඔබේ වස්ත්‍රවලින් සමහරක් ඔබ රැගෙන, විසිතුරු වර්ණවත් උස් තැන් සාදාගෙන, පළමු සිදුවුණේවත් මතු සිදුවන්නේවත් නැති ආකාරයකට ඒවා උඩ වේශ්‍යාකම්කෙළෙහිය.

¹⁷මා ඔබට දුන්නාවූ මාගේ රන් රිදීවලින් සෑදූ ඔබේ ලක්ෂණ ආභරණ රැගෙන පුරුෂයන්ගේ රූප සාදාගෙන, ඒවා සමඟ වේශ්‍යාකම්කෙළෙහිය;

¹⁸ඔබේ විසිතුරු වස්ත්‍රවලින් ඔබ ඒවා වසා, මාගේ තෙල්ද මාගේ සුගන්ධ ද්‍රව්‍යයද ඒවා ඉදිරියෙහි තැබුවෙහිය.

¹⁹කන්ට මා විසින් ඔබට දුන්නාවූ මාගේ කෑම වන සිහින් පිටිද තෙල්ද මීපැණිද ඔබ මිහිරි සුවඳ පිණිස ඒවා ඉදිරියෙහි තැබුවෙහිය, මෙසේ වුණායයි ස්වාමිවූ දෙවියන්වහන්සේ කියනසේක.

²⁰තවද මා නිසා ඔබ වැදූ ඔබේ පුත්‍රයන්ද ඔබේ දූවරුන්ද ඔබ රැගෙන විනාශවීමට ඔවුන් ඒවාට පූජාකෙළෙහිය.

²¹ඔබ මාගේ දරුවන් ගින්නට කැපකොට ඔවුන් ඒවාට මරාදුන්නේ ඔබේ වේශ්‍යාකම් සුළු කාරණයක්වූ නිසාද?

²²ඔබේ සියලු පිළිකුල්කම්වලදීද වේශ්‍යාකම්වලදීද ඔබ නිර්වස්ත්‍රව, නග්නව, ඔබේ ලේවල වැතිර උන්නාවූ ඔබේ බාල කාලය ඔබ සිහි නොකෙළෙහිය.

²³තවද ඔබට දුක්වේ! දුක්වේයයි ස්වාමිවූ දෙවියන්වහන්සේ කියනසේක. මක්නිසාද ඔබේ සියලු දුෂ්ටකම්වලට පසු,

²⁴ඔබ සියලු වීථිවල [වේශ්‍යා] මහලක් තනාගෙන උස්තැනක්ද සාදාගත්තෙහිය.

²⁵ඔබ සියලු මංසන්ධිවල ඔබේ උස්තැන් ගොඩනඟා, ඔබේ ශෝභනකම පිළිකුල්කමට පමුණුවා, ළඟින් යන සියල්ලන්ට ඔබේ කකුල් විදහා, ඔබේ වේශ්‍යාකම් වැඩිකරගත්තෙහිය.

²⁶තවද ශරීරයෙන් තරව සිටින ඔබේ අසල්වාසීන් වන මිසරයන් සමඟ ඔබ වේශ්‍යාකම්කොට, මා කෝපකරවන ලෙස ඔබේ වේශ්‍යාකම් වැඩිකරගත්තෙහිය.

²⁷එබැවින් මම මාගේ අත ඔබට විරුද්ධව දිඟුකොට, ඔබේ කෑම කොටස අඩුකර, ඔබට වෛරවෙන්නන්වූ ඔබේ සල්ලාල මාර්ගය ගැන ලජ්ජාවෙන් සිටින පිලිස්තිවරුන්ගේ දූවරුන්ගේ කැමැත්තට ඔබ භාරදුනිමි.

²⁸ඔබේ ආශාව සංසිඳිමක් නොවූ නිසා, ඔබ අෂූරියයන් සමඟද වේශ්‍යාකම්කෙළෙහිය; ඔබ ඔවුන් සමඟ වේශ්‍යාකම්කළ නුමුත් සෑහීමට නොපැමිණියෙහිය.

²⁹ඔබ කානාන් දේශයේදී කල්දියාව දක්වාත් ඔබේ වේශ්‍යාකම් වැඩිකරගත්තෙහිය; එහෙත් එයිනුත් සෑහීමට නොපැමිණියෙහිය.

³⁰නොහික්මෙන වේශ්‍යා ස්ත්‍රියෙකුගේ ක්‍රියා වන මේ සියල්ල කරන්නාවූ ඔබේ සිත කොපමණ දුර්වලව තිබෙනවා නොවේදැයි ස්වාමිවූ දෙවියන්වහන්සේ කියනසේක.

³¹එසේය, ඔබේ සියලු මාර්ග කොන්වල ඔබේ (වේශ්‍යා) මහල ගොඩනගා, සියලු වීථිවල ඔබේ උස්තැනක් සාදාගත්තෙහිය; පණයම් එපාකරන හෙයින් වේශ්‍යාවට ඔබ සමාන නූමණෙහිය.

³²කාමමිථ්‍යාචාරය කරන භාර්යාවක්ය! තමාගේ පුරුෂයා වෙනුවට අන්‍යයන් ගන්න ස්ත්‍රියෙක්ය!

³³සියලු වේශ්‍යාවන්ට යම් තෑග්ගක් දෙනු ලැබේ. නුමුත් ඔබ ඔබේ සියලු ප්‍රේමවන්තයන්ට ඔබේ තෑගිදී, ඔබ සමඟ වේශ්‍යාකම්කිරීමට හැම අතින්ම ඔබ ළඟට එන්ට ඔවුන්ට තෑගි දුන්නෙහිය.

³⁴ඔබේ වේශ්‍යාකම්වලදී ඔබේ අන්දම අන් ස්ත්‍රීන්ට වෙනස්ය, මක්නිසාද වේශ්‍යාකමට කිසිවෙක් ඔබ පස්සේ එන්නේ නැත. ඔබ පණයම් දෙනවා මිස ඔබට පණයම් දෙන්නේ නැත, මෙසේ ඔබ වෙනස්ය.

³⁵එබැවින් වේශ්‍යාවිය, ස්වාමීන්වහන්සේගේ වචනය අසන්න.

³⁶ස්වාමිවූ දෙවියන්වහන්සේ මෙසේ කියනසේක: ඔබේ ප්‍රේමවන්තයන් සමඟද ඔබේ සියලු පිළිකුල්වල රූප සමඟද ඔබ කළ වේශ්‍යාකම්වලිනුත් ඔබ ඒවාට දුන් ඔබේ දරුවන්ගේ ලේවලිනුත් ඔබේ මුදල් වියදම්වී ඔබේ නග්නභාවය පෙනුණු බැවින්,

³⁷ඔබ කෙරෙහි ආලයවුණ ඔබේ සියලු ප්‍රේමවන්තයන්ද ඔබ ප්‍රේමවුණ සියල්ලන්ද ඔබ වෛරකළ සියල්ලන්ද රැස්කරමි; මම ඔවුන් ඔබට විරුද්ධව වටේට රැස්කොට, ඔවුන් ඔබේ මුළු නිර්වස්ත්‍රකම දකින පිණිස ඔබේ නිර්වස්ත්‍රකම ඔවුන්ට ප්‍රකාශකරන්නෙමි.

³⁸පතීවතාව කඩකරන්නාවූ ලේ වගුරුවන්නාවූ තැනැත්තියන් විනිශ්චයකරන්නාක්මෙන් මම ඔබ විනිශ්චය කොට, උදහස හා ජ්වලිත ලේ ඔබ පිටට පමුණුවන්නෙමි.

³⁹තවද මම ඔබ ඔවුන් අතට දෙන්නෙමි, ඔවුන් ඔබේ [වේශ්‍යා] මහල කඩාදමා, ඔබේ උස්තැන් හෙළාදමා, ඔබේ වස්ත්‍ර ලිහාදමා, ඔබේ අලංකාර ආභරණ රැගෙන ඔබ නිර්වස්ත්‍ර කොට නග්නකරනවා ඇත.

⁴⁰ඔවුන් ඔබට විරුද්ධව සමුදාවක් පමුණුවා, ඔබට ගල්ගසා, තමුන්ගේ කඩුවලින් ඔබට අනිනවා ඇත.

⁴¹ඔවුන් ඔබේ ගෙවල් ගිනිලා, බොහෝ ස්ත්‍රීන් ඉදිරියෙදී විනිශ්චයන් ඔබ කෙරෙහි ඉෂ්ටකරනවා ඇත; වේශ්‍යාකම්කිරීමෙන්ද ඔබ නවත්වන්නෙමි, පණයම්ද ඔබ තවත් නොදෙන්නෙහිය.

⁴²මෙසේ මාගේ උදහස ඔබ කෙරෙන් නවත්වා, පසුව මාගේ ජ්වලිතය ඔබෙන් පහකොට, නිශ්චලව තවත් උදහස් නොවී සිටින්නෙමි.

⁴³ඔබේ බාල කාලය ඔබ සිහිනැතිකොට, ඒ සියල්ලෙන් මා උදහස්කළ බැවින්, බලව, මමත් ඔබේ මාර්ගය ඔබේ හිස පිටට පමුණුවන්නෙමි. ඔබද ඔබේ සියලු පිළිකුල්කම්වලට වඩා නරකවූ මේ දූෂ්‍යකම නොකරන්නෙහියයි ස්වාමිවූ දෙවියන්වහන්සේ කියනසේක.

⁴⁴උපමා කියන සියල්ලෝ: මවු යම්සේද දුවත් එසේමය යන උපමාව ඔබ ගැන කියනවා ඇත.

⁴⁵ඔබ නම් පුරුෂයාටත් දරුවන්ටත් පිළිකුල්කරන මවගේ දුවය; ඔබ තමුන්ගේ පුරුෂයන්ටද දරුවන්ටද පිළිකුල්කළ ඔබේ සහෝදරියන්ගේ සහෝදරීය. ඔබ සැමගේ මවු හිත්තිය ස්ත්‍රියෙක්ය, ඔබ සැමගේ පියා අමෝරියයෙක්ය.

⁴⁶ඔබේ වැඩිමල් සහෝදරී ඔබට වමින් වාසයකරන සමාරිය සහ ඇගේ දූවරුය. ඔබේ බාල සහෝදරී ඔබට දකුණෙන් වාසයකරන සොදොම සහ ඇගේ දූවරුය.

⁴⁷නුමුත් ඔබ ඔවුන්ගේ මාර්ගවලම නොගොස්, ඔවුන්ගේ පිළිකුල්වල ප්‍රකාරයටම නොකර, ඒවා මදියයි සිතා, ඔවුන්ටත් වඩා ඔබේ සියලු මාර්ගවලින් ඔබ දුෂ්ටකම්කෙළෙහිය.

⁴⁸මා ජීවමාන බව සැබෑවා සේම ඔබ සහ ඔබේ දූවරුන් කළ ලෙස ඔබේ සහෝදරීවූ සොදොම සහ ඇගේ දූවරුන් කළේම නැතැයි ස්වාමිවූ දෙවියන්වහන්සේ කියනසේක.

⁴⁹මෙන්න, ඔබේ සහෝදරීවූ සොදොමේ වරද මෙසේය; උඩඟුකමත් කෑම පූර්ණකමත් නොසැලකිලි නිශ්චලකමත් ඈට සහ ඇගේ දූවරුන්ටත් තිබුණේය; ඈ අසරණයාගේද දිළින්දාගේද අත බලවත් නොකළාය.

⁵⁰ඔවුන් උඩඟුව සිට මා ඉදිරියෙහි පිළිකුල්කම් කළ බැවින්, මට හොඳව පෙනුණු ලෙස ඔවුන් පහකෙළෙමි.

⁵¹සමාරිය ඔබේ පව්වලින් අර්ධයක්වත් නොකළාය; ඔබ ඔවුන්ට වඩා ඔබේ පිළිකුල් ක්‍රියා වැඩිකර, ඔබ කළ ඔබේ සියලු පිළිකුල් ක්‍රියාවලින් ඔබේ සහෝදරියන් ධර්මිෂ්ඨව පෙනෙන්ට සැලැස්සුවෙහිය.

⁵²ඔබේ සහෝදරියන් විනිශ්චයකළ ඔබ ඔබේ ලජ්ජාව දරාගන්න; ඔවුන්ට වඩා පිළිකුල් ලෙස ඔබ කළාවූ ඔබේ පාප නිසා ඔව්හු ඔබට වඩා ධර්මිෂ්ඨය. මෙසේ ඔබ ඔබේ සහෝදරියන් ධර්මිෂ්ඨව පෙනෙන්ට සැලැස්සූ බැවින් ඔබත් ලජ්ජාවට පැමිණ ඔබේ නින්දාව දරාගන්න.

⁵³ඔවුන්ගේ වහල්කම එනම් සොදොම සහ ඇගේ දූවරුන්ගේ වහල්කමද සමාරිය සහ ඇගේ දූවරුන්ගේ වහල්කමද ඔවුන් අතරේ ඔබේ වාල්වූ අයගේ වහල්කමද පහකරන්නෙමි.

⁵⁴මෙසේ කරන්නේ ඔවුන් ඔබෙන් සැනසෙන හැටියට ඔබ කළ සියල්ල නිසා, ඔබේ ලජ්ජාව ඔබ දරා, නින්දාවට පැමිණෙන පිණිසය.

⁵⁵ඔබේ සහෝදරියන් වන සොදොම සහ ඇගේ දූවරුන්ද තමුන්ගේ පළමු ස්වභාවට පැමිණෙනවා ඇත, සමාරිය සහ ඇගේ දූවරුන්ද තමුන්ගේ පළමු ස්වභාවට පැමිණෙනවා ඇත, ඔබ සහ ඔබේ දූවරුන්ද ඔබ සැමගේ පළමු ස්වභාවට පැමිණෙනවා ඇත.

⁵⁶සිරියේ දූවරුන්ද ඈ වටකර සිටි සියල්ලන් එනම් ඔබව සුළුකරන පිලිස්තිවරුන්ගේ දූවරුන්ද හැම අතින්ම ඔබට නින්දාකළ කාලයේදී මෙන්, ඔබේ දුෂ්ටකම එළිදරව්වෙන්ට පළමුවෙන්,

⁵⁷ඔබේ උඩඟුකමේ දවසේදී ඔබේ සහෝදරීවූ සොදොම ඔබේ මුඛයෙන් සඳහන්කළේවත් නැත.

⁵⁸ඔබේ සල්ලාලකමද ඔබේ පිළිකුල්කම්ද ඔබම දැරුවෙහියයි ස්වාමීන්වහන්සේ කියනසේක.

⁵⁹මක්නිසාද ස්වාමිවූ දෙවියන්වහන්සේ මෙසේ කියනසේක: ගිවිසුම කඩකරන ලෙස දිවුරුම සුළුකළාවූ ඔබ කළ හැටියටම මම ඔබට කරන්නෙමි.

⁶⁰එහෙත් මා විසින් ඔබේ බාල කාලයේදී ඔබ සමඟ කළාවූ මාගේ ගිවිසුම සිහිකොට, සදාකාල ගිවිසුමක් ඔබ සමඟ පිහිටුවන්නෙමි.

⁶¹ඔබේ වැඩිමහල්වූද බාලවූද සහෝදරියන් ඔබ විසින් පිළිගන්න විට ඔබ ඔබේ මාර්ග සිහිකොට ලජ්ජාවන්නෙහිය. ඔවුන් දූවරුන් කොට ඔබට දෙන්නෙමි, නුමුත් එය ඔබේ ගිවිසුමකින් නොවේය.

⁶²ඔබ කළ සියල්ල ගැන මා විසින් ඔබට කමාවෙන විට ඔබ සිහිකොට, වියවුල්ව, ලජ්ජාවෙන් තවත් කට නෑර සිටින පිණිසය,

⁶³මාගේ ගිවිසුම ඔබ සමඟ පිහිටුවන්නෙමි; එවිට මා ස්වාමීන්වහන්සේ බව ඔබ දැනගන්නෙහියයි ස්වාමිවූ දෙවියන්වහන්සේ කියනසේකැයි කීය.