Read Sinhala Revised Old Version එසකියෙල් 22 Bible Online

එසකියෙල් 22 - Sinhala Revised Old Version bible

එසකියෙල් 22

¹තවද ස්වාමීන්වහන්සේගේ වචනය මා වෙතට පැමිණ කියනුයේ

²මනුෂ්‍ය පුත්‍රය, ඔබ විනිශ්චය කරන්නෙහිද? ලේ වගුරුවන නුවර විනිශ්චයකරන්නෙහිද? එසේවී නම් ඇගේ සෑම පිළිකුල්කම් ඈට දන්වමින් මෙසේ කියන්න:

³ස්වාමිවූ දෙවියන්වහන්සේ මෙසේ කියනසේක: ඒ වනාහි එහි කාලය පැමිණෙන පිණිස එහි මැද ලේ වගුරුවන්නාවූද එය අපවිත්‍රවන පිණිස තමාටම විරුද්ධව දේවරූප සාදාගන්නාවූද නුවරක්ය!

⁴ඔබ වැගිරෙවු ඔබේ ලේ වලින් ඔබ වරදකාරයෙක්වී, ඔබ සෑදූ ඔබේ රූපවලින් ඔබ අපවිත්‍රවී, මෙසේ ඔබේ දවස් ළංවෙන්ට සලස්වා, ඔබේ අවුරුදුවලට ඔබ පැමින්ණෙහිය. එබැවින් මම ඔබ ජාතීන්ට නින්දාවක්ද සියලුම දේශවලට කවටකමක්ද කෙළෙමි.

⁵ඔබට ළංව සිටින්නෝද දුරව සිටින්නෝද අපකීර්තියත් බොහෝ කැලඹීමත් ඇතුව සිටින කෙනෙක් කොට ඔබට කවටකම්කරන්නෝය.

⁶ඉශ්‍රායෙල් අධිපතීන් ඔබ තුළ සිටියේ එක එකා තම තමාගේ බලය ලෙස ලේ වගුරුවන පිණිසය.

⁷ඔබ තුළ ඔව්හු පියාත් මවුත් සුළුකළෝය; ඔබ ඇතුළෙහි විදේශියාට බලාත්කාරයෙන් ක්‍රියාකළෝය. ඔබ තුළ පියා නැත්තාට සහ වැන්දඹුවටත් පීඩාකළෝය.

⁸ඔබ මාගේ ශුද්ධ දේ හෙළාදැක, මාගේ සබත් කෙලහුවෙහිය.

⁹ලේ වගුරුවන පිණිස කේලාම්කියන මනුෂ්‍යයෝ ඔබ තුළ සිටියෝය. ඔබ තුළ කඳු පිට කෑවෝය. ඔබ ඇතුළෙහි සල්ලාලකම්කළෝය.

¹⁰ඔබ තුළ පියාගේ නග්නකම ප්‍රකාශකළෝය. ඔබ තුළ ඔසප්ව සිටි තැනැත්තීට අගෞරවකළෝය.

¹¹එකෙක් තමාගේ අසල්වාසියාගේ භාර්යාව සමඟ පිළිකුල්කම්කෙළේය; අනිකෙක් තමාගේ ලේලී සල්ලාලකමින් අපවිත්‍රකෙළේ ඔබ තුළ තවත් කෙනෙක් තම පියාගේ දුවවූ තමාගේ සහෝදරියට අවනම්බු කළේය.

¹²ලේ වගුරුවන පිණිස ඔව්හු ඔබ තුළ අල්ලස් ගත්තෝය; ඔබ පොළී සහ ලාභ ගෙන, ඔබේ අසල්වාසීන්ගෙන් අයුක්තියෙන් ලාභ උපදවාගෙන, මා සිහිනැතිකෙළෙහියයි ස්වාමිවූ දෙවියන්වහන්සේ කියනසේක.

¹³එබැවින් බලව, ඔබ ලබාගත් අයුතු ලාභ ගැනත් ඔබ ඇතුළෙහිවූ ඔබේ ලේ වැගිරීම් ගැනත් මාගේ අත් එකට ගසාගතිමි.

¹⁴මා විසින් ඔබ සමඟ ක්‍රියාකරන දවස්වලදී ඔබේ සිත ස්ථිරව නොහොත් ඔබේ අත් බලවත්ව තිබේද? ස්වාමීන්වහන්සේ වන මම ඒ දේ කීමි, එලෙසම කරන්නෙමි.

¹⁵මම ඔබ ජාතීන් අතරට පන්වා, ඔබ දේශවල විසුරුවා, ඔබේ අපවිත්‍රකම ඔබෙන් නැතිකරදමන්නෙමි.

¹⁶ඔබද ජාතීන් ඉදිරියෙහි ඔබ කරණකොටගෙනම කෙලහෙන්නෙහිය; මා ස්වාමීන්වහන්සේ බව ඔබ දැනගන්නෙහියයි කීය.

¹⁷තවද ස්වාමීන්වහන්සේගේ වචනය මා වෙතට පැමිණ කියනුයේ: මනුෂ්‍ය පුත්‍රය,

¹⁸ඉශ්‍රායෙල් වංශය මට බොර මෙන් වී සිටිති. ඔවුන් සියල්ලෝ උඳුන මැද තිබෙන පිත්තලව බෙලෙක්ව යකඩව ඊයම්ව සිටිති; ඔව්හු රිදී-බොරය.

¹⁹එබැවින් ස්වාමිවූ දෙවියන්වහන්සේ මෙසේ කියනසේක-බලව, ඔබ සැම සියල්ලන්ම බොර වී සිටින නිසා ඔබ සැම යෙරුසලම තුළට එකතුකරන් නෙමි.

²⁰රිදීද පිත්තලද යකඩද ඊයම්ද බෙලෙක්ද ගිනි පිඹ උණුකරන පිණිස උඳුන තුළට එකතුකරන්නාක්මෙන් මම ඔබ සැම මාගේ උදහසින්ද කෝපයෙන්ද එකතුකර තබා උණුකරන්නෙමි.

²¹මම ඔබ සැම රැස්කර, මාගේ උදහස් ගින්න ඔබ සැමට පිඹින්නෙමි, ඔබ සැම එහි තුළ උණුවන්නහුය.

²²උඳුන තුළ රිදී උණුවෙන්නාක්මෙන් ඔබ සැම එහි තුළ උණුවන්නහුය; ස්වාමීන්වහන්සේ වන මා විසින් මාගේ කෝපය ඔබ සැම කෙරෙහි වැගිරෙවු බව ඔබ සැම දැනගන්නවා ඇතැයි කීය.

²³ස්වාමීන්වහන්සේගේ වචනය මා වෙතට පැමිණ කියනුයේ:

²⁴මනුෂ්‍ය පුත්‍රය, ඈට මෙසේ කියන්න-ඔබ වනාහි පවිත්‍ර නූණාවූ, උදහස් දවසේදී වැසි නොලබන්නාවූ දේශයක්ය.

²⁵ඇගේ ප්‍රොපේතවරුන්ගේ ද්‍රෝහිකමක් ඈ තුළ ඇත්තේය. ඔව්හු ගොදුර ඉරන්නාවූ ගොරවන සිංහයෙකු මෙන් ප්‍රාණ කාදැමුවෝය. ඔව්හු වස්තු සහ අනර්ඝ දේ ගනිති; ඔව්හු එහි තුළ වැන්දඹුවක් වැඩි-කළෝය.

²⁶ඇගේ පූජකයෝ මාගේ ව්‍යවස්ථාව කඩකොට මාගේ ශුද්ධවූ දේ කෙලහුවෝය. ඔවුන් ශුද්ධ එකද අශුද්ධ එකද අතරේ වෙනසක් කළේවත් අපවිත්‍ර එකද පවිත්‍ර එකද අතරේ තිබෙන වෙනස දැන්නුවේවත් නැත, මාගේ සබත්ද ඔව්හු නොසලකා ඇරියෝය, මෙසේ ඔවුන් අතරෙහි මට අගෞරව පැමුණුණේය.

²⁷එහි තුළ සිටින ඇගේ අධිපතීහු අයුතු ලාභ ලබාගන්නා පිණිස ලේ වැගිරවීමටත් ප්‍රාණ නැතිකිරීමටත් සිටින ගොදුර ඉරන්නාවූ වෘකයන්ට සමානය.

²⁸ඇගේ ප්‍රොපේතවරුද ප්‍රයෝග දර්ශන දැක, ඔවුන්ට බොරු පේන කියා, ස්වාමීන්වහන්සේ කථා නොකළ නුමුත්: ස්වාමිවූ දෙවියන්වහන්සේ මෙසේ කියනසේකැයි කියා පදම් නොකළ බදාම ගෑවෝය.

²⁹දේශයේ සෙනඟ බලාත්කාරකම්කොට කොල්ලකෑවෝය; අසරණයාටද දිළින්දාටද පීඩාකොට, අයුතුලෙස විදේශියාට බලාත්කාර කළෝය.

³⁰මා විසින් දේශය නාස්ති නොකරන පිණිස පවුරක් ගොඩනඟා දේශය උදෙසා මා ඉදිරිපිට කඩුල්ලෙහි සිටීමට ඔවුන් අතරේ මනුෂ්‍යයෙකු සෙවීමි. නුමුත් කිසිවෙක් මට සම්බනූණේය.

³¹එබැවින් මාගේ කෝපය ඔවුන් කෙරෙහි වගුරුවා, මාගේ උදහස් ගින්නෙන් ඔවුන් නාස්තිකරදමා ඔවුන්ගේ මාර්ගය ඔවුන්ගේ හිස් පිටට පැමිණවීමියි ස්වාමිවූ දෙවියන්වහන්සේ කියනසේකැයි කීය