Read Sinhala Revised Old Version එසකියෙල් 24 Bible Online

එසකියෙල් 24 - Sinhala Revised Old Version bible

එසකියෙල් 24

¹නවවෙනි අවුරුද්දේ දසවෙනි මාසයේ දසවෙනිදා ස්වාමීන්වහන්සේගේ වචනය මා වෙතට පැමිණ කියනුයේ:

²මනුෂ්‍ය පුත්‍රය, දවසේ, එනම් මේ අද දවසේම නම ලියාගන්න. බබිලෝනියේ රජ මේ අද දවසේදීම යෙරුසලමට ළංවී සිටියේය.

³කැරළිකාර වංශයට උපමාවක් කියමින්: ස්වාමිවූ දෙවියන්වහන්සේ මෙසේ කියනසේකැයි ඔවුන්ට කියන්නහැළිය ලිපේ තබන්න; ඒක තබා වතුරත් එහි වත්කරන්න.

⁴ඊට අයිති කෑලි වන සියලු හොඳ කෑලි පස්සා ගාතයද ඉස්සරහ ගාතයද ඇතුව එහි එකතුකර, ඉතා හොඳ ඇට ඇති ඒවායෙන් පුරවන්න.

⁵එළු බැටළු රැළෙන් හොඳ එවුන් ගන්න, ඒක යට ඇට ගොඩක් තබන්න. ඒක හොඳට උතුරවා, එහි තුළ තිබෙන ඇටත් තම්බන්න.

⁶එබැවින් ස්වාමිවූ දෙවියන්වහන්සේ මෙසේ කියනසේක: ලේ වගුරුවන නුවරට දුක්වේ! ඒක මලකඩ ඇති හැළියක්ය, ඒකේ මලකඩ ඒකෙන් ඇරිලා නැත; ඒකේ සෑම කෑලි පිටින්ම එය ඇර දමන්න. ඊට කිසි පසඇටයක් වැටුණේ නැත.

⁷මක්නිසාද ඇගේ ලේ ඈ ඇතුළෙහි ඇත්තේය; ඈ ඒවා පස්වලින් වැසීයන්ට පොළොව පිට වගුරුවන්නේ නැතුව පස් නැති පර්වතය උඩ තැබුවාය.

⁸ඇගේ ලේ වැසී නොයන හැටියට, පළිගන්න පිණිස කෝපය ඇවිස්සවීමට, මම ඒවා පස් නැති පර්වතය උඩ තැබීමි.

⁹එබැවින් ස්වාමිවූ දෙවියන්වහන්සේ මෙසේ කියනසේක: ලේ වගුරුවන නුවරට දුක්වේ! මමත් දර සෑය මහත්කරන්නෙමි.

¹⁰බොහෝ දර දමා, ගින්දර අවුළවා, මස් තම්බාදමා, කලවමක් කර, ඇටත් පුළුස්සා දමන්න.

¹¹එවිට ඒකේ පිත්තල රත්වී ගිනියම්වී, ඒකේ අපවිත්‍රකම ඒක ඇතුළෙහි උණුවී, ඒකේ මලකඩ නැතිවී යන පිණිස, ඒක ගිනිඅඟුරු පිට හිස්ව තබන්න.

¹²ඈ වීර්යකිරීමෙන් වෙහෙසුණු නුමුත්, ඇඟේ බොහෝ මලකඩ ඇඟෙන් පහව නොයයි; ඇගේ මලකඩ ගින්නෙන් පවා පහව නොයයි.

¹³ඔබේ අපවිත්‍රකම දූෂිතය. මක්නිසාද මා විසින් ඔබ පිරිසිදුකරමින් සිටි නුමුත් ඔබේ අපවිත්‍රකමෙන් ඔබ පිරිසිදුවුණේ නැත; මාගේ කෝපය ඔබ කෙරෙහි සංසිඳුවාගන්න තුරු ඔබ තවත් පිරිසිදුකරනු නොලබන්නෙහිය.

¹⁴ස්වාමීන්වහන්සේ වන මම ඒක කීයෙමි. ඒක සිදුවන්නේය, මම ඒක කරන්නෙමි; මා පසුබටවෙන්නේවත් දයාවෙන්නේවත් තැවෙන්නේවත් නැත; ඔබේ මාර්ගවලද ක්‍රියාවලද හැටියට ඔව්හු ඔබ විනිශ්චයකරන්නෝයයි ස්වාමිවූ දෙවියන්වහන්සේ කියනසේකැයි කීය.

¹⁵ස්වාමීන්වහන්සේගේ වචනය මා වෙතට පැමිණ කියනුයේ:

¹⁶මනුෂ්‍ය පුත්‍රය, මෙන්න, ඔබේ ඇස්වලට ප්‍රියවූ දේ එක පහරකින් ඔබෙන් ගනිමි. එහෙත් ඔබ විලාප නොකිය යුතුය, නොහැඬිය යුතුය, ඔබේ කඳුළුත් නොවැගිරියයුතුය.

¹⁷නිශ්ශබ්දව සුසුම්ලා, මළවුන් ගැන වැලපීමක් නොකර, ඔබේ තොප්පිය හිසේ බැඳගෙන; ඔබේ වහන් පාදවල දමාගන්න, තොල් වසා නොගෙන, මිනිසුන්ගේ රොටිද නොකා සිටින්නැයි කීය.

¹⁸එබැවින් මම උදයේ සෙනඟට කථාකෙළෙමි; සවස මාගේ භාර්යාව මළාය. මට අණකළ ලෙස උදයේදී කෙළෙමි.

¹⁹සෙනඟද: ඔබ කරන මේ දේ අපට අදාළවෙන හැටි ඔබ අපට නොකියන්නෙහිදැයි මාගෙන් ඇසුවෝය.

²⁰එවිට මම ඔවුන්ට කථාකොට: ස්වාමීන්වහන්සේගේ වචනය මා වෙතට පැමිණ මෙසේ කීයේය ස්වාමිවූ දෙවියන්වහන්සේ මෙසේ කියනසේකැයි ඉශ්‍රායෙල් වංශයට කියන්න.

²¹බලව, මම ඔබ සැමගේ බලයේ පාරට්ටුව වූ, ඔබ සැමගේ ඇස්වලට ප්‍රියව තිබෙන්නාවූ, ඔබ සැමගේ ආත්ම ආශාවෙන්නාවූ මාගේ ශුද්ධස්ථානය කෙලහන්නෙමි; ඔබ සැම විසින් අත්හැර ආවාවූ ඔබ සැමගේ පුත්‍රයෝද ඔබ සැමගේ දූවරුද කඩුවෙන් වැටෙන්නෝය.

²²මා කළාක්මෙන් ඔබ සැමත් කරනවා ඇත. ඔබ සැම තොල් වසා නොගෙන, මිනිසුන්ගේ රොටිද නොකා සිටිනවා ඇත.

²³ඔබ සැමගේ තොප්පි ඔබ සැමගේ හිස්වලද ඔබ සැමගේ වහන් ඔබ සැමගේ පාදවලද වන්නේය. ඔබ සැම විලාප කියන්නේවත් අඬන්නේවත් නැත; ඔබ සැමගේ අයුතුකම්වලින් ඔබ සැම ෂයවී ගොස්, එකිනෙකා දෙස බලා සුසුම්ලනවා ඇත.

²⁴මෙසේ එසකියෙල් ඔබ සැමට සලකුණක් වන්නේය; ඔහු කළ සියල්ල ලෙස ඔබ සැම කරනවා ඇත. මේක පැමිණි කළ මා ස්වාමිවූ දෙවියන්වහන්සේ බව ඔබ සැම දැනගන්නවා ඇත.

²⁵ඉතින් මනුෂ්‍ය පුත්‍රය, ඔවුන්ගේ බලයද ඔවුන්ගේ තේජසේ ප්‍රීතියද ඔවුන්ගේ ඇස්වලට ප්‍රියව තිබෙන්නාවූ, ඔවුන්ගේ ආත්ම ආශාවෙන්නාවූ දේද ඔවුන්ගේ පුත්‍රයන්ද දූවරුන්ද මා විසින් ඔවුන්ගෙන් පැහැරගන්න දවසේදී,

²⁶මිදෙන තැනැත්තා ඒ බව ඔබේ කන්වලට දන්වන පිණිස ඔබ ළඟට එනවා නොවේද?

²⁷ඒ දවසේදී ඔබේ මුඛය මිදෙන තැනැත්තා කෙරෙහි ඇරී, ඔබ තවත් ගොළුව නොසිට කථාකරන්නෙහිය. මෙසේ ඔබ ඔවුන්ට සලකුණක් වන්නෙහිය; ඔවුන් මා ස්වාමීන්වහන්සේ බව දැනගන්නවා ඇතැයි කීය.