Read Sinhala Revised Old Version එසකියෙල් 26 Bible Online

එසකියෙල් 26 - Sinhala Revised Old Version bible

එසකියෙල් 26

¹එකොළොස්වෙනි අවුරුද්දේ මාසයේ පළමුවෙනි දවසේදී ස්වාමීන්වහන්සේගේ වචනය මා වෙතට පැමිණ කියනුයේ:

²මනුෂ්‍ය පුත්‍රය, තීර් යෙරුසලමට විරුද්ධව කථාකොට-ඔහෝ, ජනයන්ගේ දොරටුව වන ඈ කඩා දමනු ලැබුවාය. එය[8] මා දෙසට ඇරී තිබෙයි. ඈ පාළුකරනු ලැබ සිටින නිසා මට පූර්ණකම ඇතිවන්නේයයි කී බැවින්,

³ස්වාමිවූ දෙවියන්වහන්සේ මෙසේ කියනසේක: එම්බා තීර්, මම ඔබට විරුද්ධව සිටිමි, මුහුදේ රැළ නැගී එන්නාක් මෙන් බොහෝ ජාතීන් ඔබට විරුද්ධව පමුණුවන්නෙමි.

⁴ඔව්හු තීර්හි පවුරු නාස්තිකොට එහි කොත් බිඳදමන්නෝය. මම එහි ධූලි එතනින් අතුගාදමා එය මුඩු පර්වතයක් කරන්නෙමි.

⁵එය මුහුද මැද දැල් අතුරන ස්ථානයක් වන්නේය; මක්නිසාද මමම ඒක කීයෙමියි ස්වාමිවූ දෙවියන්වහන්සේ කියනසේක. එය ජාතීන්ට කොල්ලයක් වන්නේය.

⁶කෙතේ සිටින ඇගේ දූවරු කඩුවෙන් මැරුම්කන්නෝය. මෙසේ මා ස්වාමීන්වහන්සේ බව ඔවුන්[9] දැනගන්නවා ඇත.

⁷මක්නිසාද ස්වාමිවූ දෙවියන්වහන්සේ මෙසේ කියනසේක: මෙන්න, මම රජවරුන්ගේ රජ වන බබිලෝනියේ රජවූ නෙබුකද්රෙශර් අසුන් සහ රථද අසරුවන් සහ සමූහයක්ද බොහෝ සෙනඟද ඇතුව උතුරෙන් තීර්ට විරුද්ධව පමුණුවන්නෙමි.

⁸කෙතේ සිටින ඔබේ දූවරුන් ඔහු කඩුවෙන් මරා, ඔබට විරුද්ධව කොටු බැඳ, ඔබට විරුද්ධව ගොඩැල්ලක් සාදා, ඔබට විරුද්ධව පලිහ ඔසවනවා ඇත.

⁹ඔබේ පවුරුවලට විරුද්ධව තමාගේ යුද්ධ යන්ත්‍ර තබා, තමාගේ පොරෝවලින් ඔබේ කොත් කඩාදමනවා ඇත.

¹⁰ඔහුගේ අශ්වයන්ගේ වැඩිකම නිසා උන්ගේ දූවිල්ලට ඔබ වැසීයනවා ඇත. කපල්ලක් කර තිබෙන නුවරකට මිනිසුන් ඇතුල්වෙන්නාක්මෙන් ඔහු ඔබේ දොරටුවලින් ඇතුල්වෙන කල, අසරුවන්ගෙත් ගැල්වලත් රථවලත් ශබ්දයට පවුරු සෙලවෙන්නේය.

¹¹ඔහු තමාගේ අශ්වයන්ගේ කුරවලින් ඔබේ වීථි පාගා, ඔබේ සෙනඟ කඩුවෙන් මරනවා ඇත, ඔබේ බලවත් කුළුනුද බිමට වැටෙනවා ඇත.

¹²ඔවුන් ඔබේ වස්තු කොල්ලකා, ඔබේ වෙළඳාම් බඩු උදුරාගන්නවා ඇත. ඔබේ පවුරු බිඳදමා, ඔබේ ප්‍රිය ගෙවල් හෙළාදමා, ඔබේ ගල්ද ලීද පස්ද ජල මැදට දමනවා ඇත.

¹³ඔබේ ගීතිකාවල ඝෝෂාව නවත්වන්නෙමි; ඔබේ වීණාවල ශබ්දයද තවත් නොඇසෙන්නේය.

¹⁴මම ඔබ මුඩු පර්වතයක් කරන්නෙමි. ඔබ වනාහි දැල් ඇතිරීම පිණිස ස්ථානයක් වන්නෙහිය; ඔබ තවත් ගොඩනගනු නොලබන්නෙහිය. මක්නිසාද ස්වාමීන්වහන්සේ වන මම ඒක කීයෙමියි ස්වාමිවූ දෙවියන්වහන්සේ කියනසේක.

¹⁵ස්වාමිවූ දෙවියන්වහන්සේ තීර්ට මෙසේ කියනසේක: ඔබේ වැටීමේ ශබ්දයටත් ඔබ තුළෙහි තුවාලවූවන්ගේ කෙඳිරිගෑමටත් මිනිසුන් මරා දැමීමටත් ද්වීපයෝ නොසෙල්වන්නෝද?

¹⁶එකල මුහුදේ සියලුම අධිපතීහුද තමුන්ගේ සිංහාසනවලින් බැස, තමුන්ගේ සළු අහක තබා, තමුන්ගේ විසිතුරු වස්ත්‍ර ගළවාදමා, වෙවුලුම් [නමැති වස්ත්‍ර] ඇඳ බිම හිඳගෙන, මොහොතින් මොහොත වෙවුලමින්, ඔබ ගැන විස්මපත් වන්නෝය.

¹⁷ඔව්හු ඔබ ගැන විලාපයක් කියමින්: මුහුදේ යාත්‍රාකරන්නන් විසුවාවූ ප්‍රශංසා ලැබූ නුවරව, මුහුදෙහි බලවත්ව සිටියාවූ ඔබ විනාශවූ හැටි! ඈ සහ එහි වැසියෝ තමුන්ගේ භයානකකම එහි විසූ සියල්ලන් කෙරෙහි තැබුවෝය.

¹⁸දැන් ද්වීපයෝ ඔබේ වැටීමේ දවසේදී වෙවුලන්නෝය; එසේය, මුහුදේ පිහිටි ද්වීපයෝ ඔබේ තුරන්වීමට තැතිගන්නෝයයි ඔබ ගැන කියනවා ඇත.

¹⁹මක්නිසාද ස්වාමිවූ දෙවියන්වහන්සේ මෙසේ කියනසේක: වැසියන් නැති නුවරවල් මෙන් මා විසින් ඔබ පාළු නුවරක් කර, මහත් ජලවලින් ඔබ වැසී යන ලෙස ගැඹුර ඔබ පිටට පමුණුවන කල,

²⁰මිනීවළට බැස්ස පුරාණ ළඟට බසින්ට මම ඔබට සලස්වන්නෙමි, ඔබ තුළ වැසියන් නොසිටින පිණිසද ජීවත්ව සිටින්නන්ගේ දේශයෙහි මා විසින් මහිමය තබන පිණිසද මිනීවළට බසින අය සමඟ පොළොවේ පහත් තැන්වල එනම් පුරාතන සිට පාළුවූ තැන්හි ඔබ වාසයකරවන්නෙමි.

²¹මම ඔබ භීතියක් කරන්නෙමි, ඔබ තවත් නොසිටින්නෙහිය. ඔබව සොයා ආවත් කිසි කලක ඔබ සම්බවෙන්නේ නැතැයි ස්වාමිවූ දෙවියන්වහන්සේ කියනසේකැයි කීය.