Read Sinhala Revised Old Version එසකියෙල් 28 Bible Online

එසකියෙල් 28 - Sinhala Revised Old Version bible

එසකියෙල් 28

¹ස්වාමීන්වහන්සේගේ වචනය නැවත මා වෙතට පැමිණ කියනුයේ:

²මනුෂ්‍ය පුත්‍රය, ස්වාමිවූ දෙවියන්වහන්සේ මෙසේ කියනසේකැයි තීර්හි අධිපතියාට කියන්න: ඔබ දෙවිකෙනෙක් නොව මනුෂ්‍යයෙක් නුමුත් ඔබේ සිත උඩඟුවී-මම දෙවිකෙනෙක්මි; මුහුද මැද මම දෙවිකෙනෙකුගේ ආසනයේ වැඩහිඳිමියි ඔබ කියමින්, ඔබේ සිත දෙවිකෙනෙකුගේ සිත මෙන් සැලකුවෙහිය.

³ඔන්න, ඔබ දානියෙල්ට වඩා ප්‍රඥාවන්තය; ඔබෙන් කිසි රහසක් සඟවන්ට බැරිය.

⁴ඔබේ ප්‍රඥාවෙන්ද ඔබේ නුවණින්ද ඔබ සම්පත් උපදවාගෙන, රන්ද රිදීද ලබා ඔබේ ගබඩාවල තබාගත්තෙහිය.

⁵ඔබේ ප්‍රඥාවේ මහත්කමින් ඔබේ වෙළඳාම කරණකොටගෙන ඔබේ සම්පත් ඔබ වැඩිකරගෙන සිටින බැවින්, ඔබේ සම්පත්වලින් ඔබේ සිත උඩඟුවී තිබේ.

⁶එබැවින් ස්වාමිවූ දෙවියන්වහන්සේ මෙසේ කියනසේක: ඔබේ සිත දෙවිකෙනෙකුගේ සිත මෙන් ඔබ සලකන බැවින්,

⁷බලව, මම ජාතීන් අතරෙන් ඉතා භයානක විදේශීන් ඔබට විරුද්ධව පමුණුවන්නෙමි. ඔව්හු ඔබේ ප්‍රඥාවේ ලක්ෂණකමට විරුද්ධව තමුන්ගේ කඩු ඇද, ඔබේ දීප්තිය කිලුටුකරන්නෝය.

⁸ඔව්හු ඔබ මිනීවළට පමුණුවන්නෝය; මැරුම්කන අය විඳින මරණවලින් ඔබ මුහුද මැදදී මැරෙනවා ඇත.

⁹ඔබ දෙවි කෙනෙක් නොව ඔබට තුවාලකරන්නාගේ අතේ මනුෂ්‍යයෙක්ව සිටින නුමුත්-මම දෙවිකෙනෙක්යයි ඔබව මරාදමන්නා ඉදිරියෙහි ඇත්තටම ඔබ කියන්නෙහිද?

¹⁰අචර්මඡේදිතයන් විඳින මරණවලින් ඔබ විදේශීන් අතින් මැරුම්කන්නෙහිය. මක්නිසාද මම එසේ කීයෙමියි ස්වාමිවූ දෙවියන්වහන්සේ කියනසේකැයි කීය.

¹¹තවද ස්වාමීන්වහන්සේගේ වචනය මා වෙතට පැමිණ කියනුයේ:

¹²මනුෂ්‍ය පුත්‍රය, තීර්හි රජු ගැන විලාපයක් පවත්වමින්- ස්වාමිවූ දෙවියන්වහන්සේ මෙසේ කියනසේකැයි ඔහුට කියන්න. ඔබ සම්පූර්ණකම මුද්‍රාකරන්නාව ප්‍රඥාවෙන් පිරී, අලංකාරකමෙන් සම්පූර්ණව සිටිනෙහිය.

¹³ඔබ දෙවියන්වහන්සේගේ උයන වන ඒදන්හි සිටියෙහිය; සියලු අනර්ඝ ගල් වන ලෝහිතංකද පුෂ්පරාගද වජ්‍රද රන්කාන්තිද නඛමාණික්‍යද සූර්යකාන්තිද නීලමාණික්‍යද රතු කැටද මරකතද රන්ද ඔබේ වැස්මව තිබුණේය. ඔබේ රබන්වලද ඔබේ නළාවලද මෙහෙවර ඔබ තුළෙහි විය; ඔබ මවනු ලැබූ දවසේදී ඒවා සූදානම් කරනලද්දේය.

¹⁴ඔබ පියාපත් විදහාගෙන සිටින අභිෂේකලත් කෙරුබයෙක් වූයෙහිය. මම ඔබ දෙවියන්වහන්සේගේ ශුද්ධවූ කන්දෙහි සිටෙවුවෙමි; ඔබ ගිනි ඇවිළෙන ගල් අතරෙහි ඇවිද්දෙහිය.

¹⁵ඔබ මවනු ලැබූ දා පටන් ඔබ තුළ අධර්මිෂ්ඨකම සම්බවෙන තුරු ඔබේ මාර්ගවල ඔබ සම්පූර්ණව සිටියෙහිය.

¹⁶ඔබේ වෙළඳාමේ මහත්කමින් මනුෂ්‍යයෝ ඔබ මැද බලාත්කාරකම් පිරෙවුවෝය, ඔබ පව්කෙළෙහිය. එබැවින් ඔබ කෙලහුණු දෙයක් මෙන් දෙවියන්වහන්සේගේ කන්දෙන් අහක්කර දැමුවෙමි; එබැවින් පියාපත් විදහාගන සිටින කෙරුබ්නි, මම ඔබ ගිනි ඇවිළෙන ගල් අතරෙන් නැතිකෙළෙමි.

¹⁷ඔබේ රුව නිසා ඔබේ සිත උඩඟුවී තිබේ. ඔබේ දීප්තිමත්කම නිසා ඔබේ ප්‍රඥාව නරක්කරගත්තෙහිය. මම ඔබ පොළොවට හෙළා, රජවරුන් විසින් ඔබ දකින පිණිස ඔබ ඔවුන් ඉදිරියෙහි තැබුවෙමි.

¹⁸ඔබේ වෙළඳාමේ අධර්මිෂ්ඨකමෙන් කළ ඔබේ අපරාධ රාශියෙන් ඔබ ඔබේ ශුද්ධස්ථාන කෙලහුවෙහිය; එහෙයින් මම ඔබ ඇතුළෙන් ගින්නක් නික්මවීමි, එය ඔබ නාස්තිකෙළේය, ඔබ දකින සියල්ලන්ගේ ඇස් ඉදිරියෙහි පොළොව පිට ඔබ අලුකෙළෙමි.

¹⁹ජනයන් අතරෙහි ඔබව අඳුනන සියල්ලෝ ඔබ ගැන විස්මපත්වන්නෝය. ඔබ භීතියක් වී සිටිනෙහිය, තවත් කවදාවත් ඔබ නොවන්නෙහියයි කීය.

²⁰ස්වාමීන්වහන්සේගේ වචනය මා වෙතට පැමිණ කියනුයේ:

²¹මනුෂ්‍ය පුත්‍රය, ඔබේ මුහුණ ශීදොන් දෙසට හරවා ඊට විරුද්ධව අනාගතවාක්‍ය පවසමින් මෙසේ කියන්න:

²²ස්වාමිවූ දෙවියන්වහන්සේ මෙසේ කියන සේක-එම්බා ශීදොන්, මම ඔබට විරුද්ධවයෙමි; ඔබ ඇතුළෙහි ගෞරව ලබන්නෙමි. මා ඈ කෙරෙහි විනිශ්චයන් ඉෂ්ටකොට, මා පිරිසිදු බව ඇය කරණකොටගෙන පෙන්නූ කල්හි, මා ස්වාමීන්වහන්සේ බව ඔවුන් දැනගන්නවා ඇත.

²³එසේය, මම ඈ තුළට වසංගතයත් ඇගේ වීථි තුළට ලේත් අරින්නෙමි; වටකරින් ඈ පිටට පැමිණෙන කඩුවෙන් ඈ තුළ මනුෂ්‍යයෝ මැරුම්කා වැටෙන්නෝය; මෙසේ මා ස්වාමීන්වහන්සේ බව ඔවුන් දැනගන්නවා ඇත.

²⁴එවිට ඉශ්‍රායෙල් වංශයට ඇනෙන කටුවක්වත් රිදවන උලක්වත් ඔවුන්ව සුළුකළාවූ ඔවුන් අවට සිටින සියල්ලන්ගෙන් තවත් නොපැමිණෙන්නේය; මෙසේ මා ස්වාමිවූ දෙවියන්වහන්සේ බව ඔවුන් දැනගන්නවා ඇත.

²⁵ස්වාමිවූ දෙවියන්වහන්සේ මෙසේ කියනසේක: ඉශ්‍රායෙල් වංශය විසිරී සිටින ජනයන් අතරෙන් ඔවුන් මා විසින් රැස්කර, මා පිරිසිදු බව ඔවුන් කරණකොටගෙන ජාතීන්ගේ ඇස් හමුයෙහි පෙන්නූ කල්හි, මාගේ මෙහෙකරුවාවූ යාකොබ්ට මා විසින් දුන් රටෙහි ඔවුන් වාසයකරනවා ඇත.

²⁶ඔව්හු එහි සුවසේ වාසයකොට, ගෙවල් ගොඩනගන්නෝය, මිදිවතු වවන්නෝය; ඔවුන් අවට සිටින්නාවූ, ඔවුන්ව සුළුකළාවූ සියල්ලන් කෙරෙහි මා විසින් විනිශ්චයන් ඉෂ්ටකළ කල්හි ඔවුන් එසේ සුවසේ වාසයකරනවා ඇත; මෙසේ මා ඔවුන්ගේ දෙවිවූ ස්වාමීන්වහන්සේ බව ඔව්හු දැනගන්නෝයයි කීය.