Read Sinhala Revised Old Version එසකියෙල් 4 Bible Online

එසකියෙල් 4 - Sinhala Revised Old Version bible

එසකියෙල් 4

¹තවද මනුෂ්‍ය පුත්‍රය, පැතලි ගඩොළක් ගෙන ඒක ඔබ ඉදිරියෙහි තබාගන නුවරක්, එනම් යෙරුසලම, ඒකේ සිතියම් කරන්න.

²ඊට විරුද්ධව වටලාගැනීමක් පිහිටුවා, ඊට විරුද්ධව බලකොටු ගොඩනගා, ඊට විරුද්ධව ගොඩැල්ලක් සාදා, ඊට විරුද්ධව අන්දායම් තබා, වටකරින් ඊට විරුද්ධව යුද්ධ යන්ත්‍ර තබන්න.

³තවද යකඩ තැටියක් ගෙන යකඩ පවුරක් මෙන් කොට ඒක ඔබටත් නුවරටත් අතරේ තබා, ඒක වටලනු ලබන පිණිස ඊට විරුද්ධව ඔබේ මුහුණ පිහිටුවා, ඒක වටලාගන්න. මෙය ඉශ්‍රායෙල් වංශයට ලකුණක්ය.

⁴තවද ඔබේ වම් අංශයට හාන්සිවී, ඉශ්‍රායෙල් වංශයේ අයුතුකම ඊ පිට තබාගන හිඳින්න. ඔබ ඊ පිට හාන්සිවී ඉන්න දවස් ගණන මුළුල්ලෙහි ඔබ ඔවුන්ගේ අයුතුකම දරන්නෙහිය.

⁵මක්නිසාද මම ඔවුන්ගේ අයුතුකමේ අවුරුදු ඔබට දවස් ගණනක් කොට එනම් තුන්සිය අනූ දවසක් නියමකෙළෙමි. මෙලෙස ඔබ ඉශ්‍රායෙල් වංශයේ අයුතුකම දරන්නෙහිය.

⁶ඔබ ඒවා ඉෂ්ටකළ පසු, ඔබේ දකුණු අංශයට නැවත හාන්සිවී, යූදා වංශයේ අයුතුකම සතළිස් දවසක් දරාගන හිඳින්න. අවුරුද්දකට දවසක් බැගින් ඔබට නියමකෙළෙමි.

⁷ඔබේ මුහුණද යෙරුසලම වටලෑමට පිහිටුවාගන හිඳ, ඔබේ හස්තය නග්නකර, ඊට විරුද්ධව අනාගතවාක්‍ය කියන්න.

⁸බලව, ඔබේ වටලෑමේ දවස් ඔබ තීන්දුකරන තුරු ඔබේ එක අංශයකින් අනික් අංශයට නොහැරෙන පිණිස මම ඔබ පිට බැඳුම් තබමි.

⁹තවද ඔබ තිරිඟුද යවද මෑද කොල්ලුද කුරක්කන්ද තණහාල්ද රැගෙන එක භාජනයක තබා, එයින් රොටි සාදාගන්න; ඔබේ අංශයට ඔබ හාන්සිවෙන දවස් ගණන වන තුන්සිය අනූ දවසක් ඒවා කන්න.

¹⁰ඔබ කන්නාවූ ඔබේ කෑමද දවසට බර ගණනින් ෂෙකෙල්[1] විස්සක්ව තිබෙන්ට ඕනෑය. වරින් වර ඒවා කන්න.

¹¹වතුරත් දවසට නැළියෙන් සතරෙන් තුන් පංගුවක් මැන බොන්ට ඕනෑය. වරින් වර බොන්න.

¹²යව රොටි වාගේ ඒ කෑම කන්න, මනුෂ්‍යයා පහරන අශූචිවලින් ඔවුන්ගේ ඇස් හමුයෙහි ඒවා පිසින්න.

¹³මා විසින් ඉශ්‍රායෙල් පුත්‍රයන් ජාතීන් අතරට පන්නා දැමූ කල්හි ඔවුන් එසේ එහිදී තමුන්ගේ අපවිත්‍රවූ කෑම කනවා ඇතැයි ස්වාමීන්වහන්සේ කීසේක.

¹⁴එවිට මම: අහෝ ස්වාමීවූ දෙවියන්වහන්ස! මාගේ ප්‍රාණය අපවිත්‍ර නොවීය. මාගේ බාල වයසේ පටන් දැන් දක්වාම කුණපවත් මෘගයන් විසින් ඉරාදැමූ සතෙක්වත් නොකෑවෙමි; පිළිකුල් මාංස මාගේ කටට ඇතුල් නොවීයයි කීමි.

¹⁵එවිට උන්වහන්සේ: මෙන්න, මනුෂ්‍ය අශූචි වෙනුවට ගවයින්ගේ ගොම ඔබට නියමකෙළෙමි, ඒවායින් ඔබේ රොටි පිසින්නැයි මට කීසේක.

¹⁶තවද උන්වහන්සේ මට කියනසේක්: මනුෂ්‍ය පුත්‍රය, ඔවුන්ට කෑමද වතුරද නැතුව ගොස්; එකිනෙකා සමඟ විස්මයට පත්ව, තමුන්ගේ අයුතුකම නිසා ක්ෂයවී යන පිණිස,

¹⁷මම යෙරුසලමේ කෑම නමැති යෂ්ටියද නැතිකරන්නෙමි. මෙසේ ඔව්හු කෑම කිරා පිරිමසාගන කන්නෝය; කනස්සලු‍කමින් වතුර මැන බොන්නෝයයි කීසේක.