Read Sinhala Revised Old Version ආමොස් 4 Bible Online

ආමොස් 4 - Sinhala Revised Old Version bible

ආමොස් 4

¹සමාරියේ කඳුකරයෙහි සිටින බාෂාන්හි එළදෙන්නුනි, මේ වචනය අසන්න; ඔබ සැම දුප්පතුන්ට පීඩාකර දිළිඳුන්ට බලාත්කාරකරන්නහුය; අපට බොන්ට ගෙනෙන්නැයි ඔබ සැමගේ ස්වාමිවරුන්ට කියන්නහුය.

²ස්වාමිවූ දෙවියන්වහන්සේ තමන්ගේ ශුද්ධකම ගැන මෙසේ දිවුරා තිබේ: ඔබ සැමව කොකුවලින්ද ඔබ සැමගෙන් පැවත එන්නන් බිලිකටුවලින්ද අහකට ගෙනයන දවස් ඔබ සැම පිටට පැමිණෙන්නේය.

³ඔබ සැම කපොලුවලින් එක එකා තම තමා ඉදිරිපිටින් පිටත්ව යන්නහුය; ඔබ සැම හාර්මොන්ට විසිකරනු ලබන්නහුයයි ස්වාමීන්වහන්සේ කියනසේක.

⁴බෙතෙල්ට ඇවිත් වරදකරන්න; ගිල්ගාල්හි බොහෝසෙයින් වරදකොට, හැම උදයම ඔබ සැමගේ පූජාද තුන් දවසකට වරක් ඔබ සැමගේ ඔතුද ගෙනෙන්න;

⁵මුහුන් මිශ්‍රවූ ස්තුති පූජාවකුත් ඔප්පුකර, ස්වේච්ඡා පූජා ගැනත් මොරගසා ප්‍රකාශකරන්න. මක්නිසාද ඉශ්‍රායෙල් පුත්‍රයෙනි, ඔබ සැම ඊට ප්‍රියයයි ස්වාමිවූ දෙවියන්වහන්සේ කියනසේක.

⁶තවද මා විසින් ඔබ සැමගේ සියලු නුවරවල දත්[3] ශුද්ධකමද ඔබ සැමගේ සියලුම ස්ථානවල කෑම හිඟකමද දුන් නුමුත්, ඔබ සැම මා වෙතට හැරීනාවහුයයි ස්වාමීන්වහන්සේ කියනසේක:

⁷තවද කපන කාලයට තුන් මසක් තිබෙද්දී මම වැස්ස ඔබ සැමගෙන් වලක්වාගතිමි. එක නුවරකට වහින්ට සලස්වද්දී තවත් නුවරකට වැස්ස නොදී ඇරියෙමි. එක බිම් කොටසකට වැස්සේය, වැස්ස නොලැබූ කොටස වියළී ගියේය.

⁸ඒ නිසා නුවරවල් දෙකක් තුනක් වතුර බීමට වෙන නුවරකට ගමන්කළෝය, නුමුත් සෑහීමට නොපැමුණුණෝය. එහෙත් ඔබ සැම මා වෙතට හැරී නාවහුයයි ස්වාමීන්වහන්සේ කියනසේක.

⁹මම ගොයම් වියළවීමෙන්ද ගොයම් රෝගයෙන්ද ඔබ සැමට පහරදුනිමි. ඔබ සැමගේ බොහෝවූ වතුද මිදිවතුද ඔබ සැමගේ අත්තික්කා ගස්ද ඔලීව ගස්ද පළඟැටි පණුවෝ කෑවෝය. එහෙත් ඔබ සැම මා වෙතට හැරී නාවහුයයි ස්වාමීන්වහන්සේ කියනසේක.

¹⁰මිසරයට ඇරියාක්මෙන් ඔබ සැම අතරට වසංගතය එවීමි. ඔබ සැමගේ තරුණයන් කඩුවෙන් මරාදැමීමි, ඔබ සැමගේ අශ්වයන්ද අල්ලාගෙනගියෙමි; ඔබ සැමගේ කඳවුරේ සේනාවල දුර්ගන්ධය ඔබ සැමගේ නාස්වලට වදින්ටත් සැලැස්වීමි. එහෙත් ඔබ සැම මා වෙතට හැරී නාවහුයයි ස්වාමීන්වහන්සේ කියනසේක.

¹¹දෙවියන්වහන්සේ සොදොම සහ ගොමොරාව පෙරළාදැමුවාක්මෙන් ඔබ සැම අතරෙන් සමහරෙකු පෙරළා දැමුවෙමි, ඔබ සැම ගින්නෙන් ඇදගත් පෙනෙල්ලක් මෙන් වූවහුය. එහෙත් ඔබ සැම මා වෙතට හැරී නාවහුයයිස්වාමීන්වහන්සේ කියනසේක.

¹²එබැවින්, ඉශ්‍රායෙල් මෙසේ ඔබට කරන්නෙමි. මා ඔබට මෙසේ කරන්ට යන බැවින්, එම්බා ඉශ්‍රායෙල්, ඔබේ දෙවියන්වහන්සේ සම්මුඛවෙන්ට සූදානම්වෙන්න.

¹³මක්නිසාද උන්වහන්සේ කඳු සාදන්නාවූ, හුළඟ මවන්නාවූ, මනුෂ්‍යයාට තමාගේ කල්පනාව මොකද කියා දන්වන්නාවූ, පහන් වේලාව අන්ධකාරකරන්නාවූ, පොළොවේ උස්තැන් පිට යන්නාවූ තැනන්වහන්සේය; උන්වහන්සේගේ නාමය සේනාවල දෙවිවූ ස්වාමීන්වහන්සේය.