Read Sinhala Revised Old Version ආමොස් 5 Bible Online

ආමොස් 5 - Sinhala Revised Old Version bible

ආමොස් 5

¹එම්බා ඉශ්‍රායෙල් වංශය, මා විසින් ඔබ සැම ගැන පවත්වන විලාපයවන මේ වචනය අසන්න.

²ඉශ්‍රායෙල් කන්‍යාව වැටුණාය; ඈ තවත් නොනැගිටින්නීය. ඈ නැගුටුවන්ට කිසිවෙක් නැතුව ඇගේ භූමිය පිට ඈ වැටී ඉන්නවාය.

³මක්නිසාද: යම් නුවරකින් දහසක් පිටත්ව ගියෝද ඔවුන්ගෙන් සිය දෙනෙක්ද, යම් නුවරකින් සියයක් පිටත්ව ගියෝද ඔවුන්ගෙන් දසදෙනෙක්ද ඉශ්‍රායෙල් වංශයට ඉතුරුවන්නෝයයි ස්වාමිවූ දෙවියන්වහන්සේ කියනසේක.

⁴එසේය, ස්වාමීන්වහන්සේ ඉශ්‍රායෙල් වංශයට මෙසේ කියනසේක:

⁵මා සොයන්න, එවිට ඔබ සැම ජීවත්වන්නහුය. නුමුත් බෙතෙල් නොසොයන්න, ගිල්ගාල්ට ඇතුල් නොවෙන්න, බෙයර්-ෂෙබාට නොයන්න. මක්නිසාද ගිල්ගාල් සැබවින් වහල්කමට යනවා ඇත, බෙතෙල්ද හිස්කමට පැමිණෙවා ඇත.

⁶යුක්තිය කොසඹවලට හරවන්නාවූ, ධර්මිෂ්ඨකම බිම හෙළන්නාවූ තැනැත්තෙනි,

⁷ස්වාමීන්වහන්සේ සොයන්න, එවිට ඔබ සැම ජීවත්වන්නහුය; නැත්නම් උන්වහන්සේ ගින්නක් මෙන් යෝසෙප් වංශය පිටට පැමිණෙනවා ඇත, බෙතෙල්හි නිවන්ට කෙනෙක් නැතුව එය ඇවිළෙනවා ඇත.

⁸උන්වහන්සේ නම් හත්දින්නද මුවසිරසද සෑදුවාවූ, මරණ සෙවණ උදයේ එළියට හරවන්නාවූ, දවාල රාත්‍රිය මෙන් අන්ධකාරකරන්නාවූ, මුහුදේ ජලයට අඬගසා ඒවා පොළෝ තලයෙහි වත්කරන්නාවූ, යෙහෝවා යන නාමය ඇත්තාවූ තැනන්වහන්සේය.

⁹උන්වහන්සේ බලය ඇත්තා පිටට විනාශය හදිසියෙන් පමුණුවනසේක, විනාශය බලකොටුව පිටට පැමිණෙනවා ඇත.

¹⁰දොරටුවෙහි අවවාදකරන්නාට ඔව්හු වෛරවෙති, අවංකලෙස කථාකරන්නාටද පිළිකුල්කරති.

¹¹එබැවින් ඔබ සැම දුප්පතා පාගා, ඔහුගෙන් ධාන්‍ය-ඔතු ගන්න නිසා, ඔබ සැම කැපූ ගල්වලින් ගෙවල් ගොඩනගාගන සිටින නුමුත් ඔබ සැම ඒවායේ වාසය නොකරන්නහුය; ඔබ සැම ප්‍රියවූ මිදිවතු වවාගන සිටින නුමුත් එයින් මුද්‍රිකපානය නොබොන්නහුය.

¹²මක්නිසාද ඔබ සැමගේ වරදවල් කොපමණ වැඩිව, ඔබ සැමගේ පාපවල් කොපමණ තදබලව තිබෙනවාද කියාදනිමි; ඔබ සැම ධර්මිෂ්ඨයාට පීඩාකරන්නහුය, අල්ලසක් ගෙන, යුක්තිය නොකොට දිළිඳුන් දොරටුවෙහි අහක්කරන්නහුය.

¹³එබැවින් ඒ කාලය නපුරු නිසා නුවණ ඇත්තා ඒ කාලයෙහි නිශ්ශබ්දව සිටින්නේය.

¹⁴ඔබ සැම ජීවත්වන පිණිස නපුර නොව යහපත සොයන්න. එවිට සේනාවල දෙවිවූ ස්වාමීන්වහන්සේ ඔබ සැම කියන ලෙස ඔබ සැම සමඟ සිටිනසේක.

¹⁵නපුරට ද්වේෂකර, යහපතට ප්‍රේමවී, දොරටුවෙහි යුක්තිය පිහිටුවන්න. සමහරවිට සේනාවල දෙවිවූ ස්වාමීන්වහන්සේ යෝසෙප්ගේ ඉතිරි අයට දයාවෙනවා ඇත.

¹⁶එබැවින් ස්වාමිවූ සේනාවල දෙවිවූ ස්වාමීන්වහන්සේ මෙසේ කියනසේක: සියලු පළල් මාවත්වල වැලපීමවන්නේය; සියලු වීථිවල ඔව්හු-අනේ, අනේයයි කියන්නෝය; වැලපෙන පිණිස ගොවියාටත් විලාප කියන පිණිස ළතෝනි කීමෙහි දක්ෂ අයටත් අඬගසන්නෝය.

¹⁷සියලු මිදිවතුවලත් වැලපීම වන්නේය. මක්නිසාද ඔබ මැදින් යන්නෙමියි ස්වාමීන්වහන්සේ කියනසේක.

¹⁸ස්වාමීන්වහන්සේගේ දවසට ආශාවන්නෙනි, ඔබ සැමට දුක්වේ! ස්වාමීන්වහන්සේගේ දවස ඔබ සැමට ඕනෑකරන්නේ මක්නිසාද? එය ආලෝකය නොව අන්ධකාරයය.

¹⁹එය සිංහයෙකු ඉදිරියෙන් මනුෂ්‍යයෙක් පලායද්දී වලසෙකුට අසුවෙන්නාක්මෙන්ය; නොහොත් ගෙට ඇතුල්වී තමාගේ අත බිත්තියේ තබන විට සර්පයෙක් ඔහුට දෂ්ටකරන්නාක්මෙන්ය.

²⁰ස්වාමීන්වහන්සේගේ දවස එළිය නොව අඳුර නොවන්නේද? දීප්තියක් නැතිව ඉතා කළුවරව නොතිබෙන්නේද?

²¹ඔබ සැමගේ මංගල්‍යවලට ද්වේෂකර ඒවා සුළුකොට සිතමි, ඔබ සැමගේ මංගල්‍ය රැස්වීම්වලටද මම ප්‍රසන්න නොවෙමි.

²²ඔබ සැම දවන පූජාද ඔබ සැමගේ ආහාර පූජාද මට ඔප්පුකරන නුමුත් ඒවා පිළිනොගන්නෙමි. ඔබ සැමගේ තර සතුන්ගෙන් ඔප්පුකරන ශාන්ති පූජාවන්ද නොසලකන්නෙමි.

²³ඔබේ ගීතිකා ඝෝෂාව මා වෙතින් අහක්කරගන්න; ඔබේ වීණා නාදයත් නාසන්නෙමි.

²⁴නුමුත් යුක්තිය ජලය මෙන්ද ධර්මිෂ්ඨකම බලවත් දියපාරක් මෙන්ද ගලායාවා.

²⁵එම්බා ඉශ්‍රායෙල් වංශය, ඔබ සැම යාගද ආහාර පූජාද කාන්තාරයේදී සතළිස් අවුරුද්දක් මට ඔප්පු කළහුද?

²⁶එසේය, ඔබ සැමගේ රජුගේ මණ්ඩපයත් ඔබ සැම සාදාගත්තාවූ ඔබ සැමගේ දේවරූපවූ කීයුන් වන ඔබ සැමගේ දෙවියන්ගේ තාරකාවත් ඔබ සැම ගෙනගියහුය.

²⁷ඒ නිසා දමස්කයෙන් එපිටට වහල්කමට ඔබ සැම යවන්නෙමියි සේනාවල දෙවියන්වහන්සේ නම්වූ ස්වාමීන්වහන්සේ කියනසේක.