Read Sinhala Revised Old Version නාහුම් 3 Bible Online

නාහුම් 3 - Sinhala Revised Old Version bible

නාහුම් 3

¹ලේ වගුරුවන නුවරට දුක්වේ! ඒක මුළුල්ලම වංචාවෙන්ද බලාත්කාරයෙන්ද පිරී තිබේ; කොල්ලකෑම නොනවතියි.

²කස ශබ්දයත් චක්‍ර කරකැවෙන ශබ්දයත් ඇත්තේය; අශ්වයෝ වේගයෙන් දුවති, රථද පැනයති;

³අසරුවෝ නගිති, කඩුව දිලිහෙන්නේය, හෙල්ලයද බැබළෙන්නේය; සමූහයක් මැරුම්කන්නේය, මළකඳන් ගොඩගැසී තිබේ. මළකඳන් නිමක් නැත; ඔවුන්ගේ මළකඳන්වල හැපී ඔව්හු පැකිලෙති.

⁴මෙසේ වෙන්නේ මන්ත්‍රකාරීවූ ඉතා ශෝභමාන වේශ්‍යාවීගේ වේශ්‍යාකම් රාශිය නිසාය; ඇගේ වේශ්‍යාකම්වලින් ඈ ජාතීන්ද ඇගේ මන්ත්‍රවලින් පවුල්ද විකුණන්නීය.

⁵බලව, මම ඔබට විරුද්ධයයි සේනාවල ස්වාමීන්වහන්සේ කියනසේක; මම ඔබේ කඩ ඔබේ මුහුණ පිට හෙළා, ජාතීන්ට ඔබේ නග්නකමද රාජ්‍යවලට ඔබේ ලජ්ජාවද පෙන්වන්නෙමි.

⁶පිළිකුල් දේවල් ඔබ පිට හෙළා, ඔබට අගෞරව කර, ඔබ කෝලමක් කරන්නෙමි.

⁷ඔබව දකින සියල්ලෝද ඔබ වෙතින් පලාගොස් කථාකොට: නිනිවය නාස්තිවිය, ඈට අනුකම්පාව පෙන්වන්නේ කවුද? සනසන්නන් මම කොතනින් ඔබට සොයාදෙන්නෙම්දැයි කියන්නෝය.

⁸ඔබ නෝ-ආමොන්ට වඩා හොඳද? ඈ ගංගා අතරේ පිහිටා, ඈ වටකරින් ජල ඇතුව තිබුණාය; ඇගේ අගළ මුහුද[4] විය, ඇගේ ප්‍රාකාරය මුහුදේ[5] පිහිටුවා තිබුණේය.

⁹කූෂ් සහ මිසරය ඇගේ බලයය, නිමක්ද නැත; පූට් සහ ලූබ්වරු ඔබේ උපකාරකාරයෝ වූවෝය.

¹⁰නුමුත් ඈ පවා අසුවී වහල්කමට ගියාය. ඇගේ දරුවෝද සියලු වීථි සන්ධිවල බිමගසා මරනු ලැබුවෝය. ඇගේ නම්බුකාරයන් ගැන පසඇට දැමුවෝය, ඇගේ සියලු උත්තමයෝ දම්වැල්වලින් බඳිනු ලැබුවෝය.

¹¹ඔබත් මත්වී සැඟවෙන්නෙහිය; ඔබත් සතුරාගෙන් ගැළවෙන්ට රක්ෂස්ථානයක් සොයන්නෙහිය.

¹²ඔබේ සියලු බලකොටු ප්‍රථම ඵල ඇති අත්තික්කා ගස් වාගේය. ඒවා සෙලවුවොත් කන්නාගේ කටට වැටෙනවා ඇත.

¹³ඔබ තුළ සිටින ඔබේ සෙනඟ ගැහැනුය; ඔබේ දේශයේ දොරවල් ඔබේ සතුරන්ට සම්පූර්ණයෙන් ඇරලා තිබේ. ඔබේ අගුල් ගින්නෙන් දාලාගියේය.

¹⁴වටලෑම නිසා වතුර ඇද තබාගන්න, ඔබේ බලකොටු සවිකරන්න. මැටි පිටට පැමිණ, බදාම පාගා, ගඩොල් වැඩ සවිකරන්න.

¹⁵එහි ගින්න ඔබ දවාදමන්නේය; කඩුවද ඔබව සිඳදමන්නේය, කෙඳි-පළඟැටියන් වාගේ එය ඔබ කාදමන්නේය. කෙඳි-පළඟැටියන් මෙන් වැඩිවෙන්න, පළඟැටියන් මෙන් වැඩිවෙන්න.

¹⁶ඔබ ඔබේ වෙළඳුන් අහසේ තාරකාවලට වඩා වැඩිකරගත්තෙහිය. කෙඳි-පළඟැටියෝ පැතිර ඉගිලීගියෝය.

¹⁷ඔබේ උත්තමයෝ පළඟැටියන් මෙන්ය, ඔබේ සේනාපතියෝ පළඟැටි රාශියක් මෙන්ය, උන් ශීතල දවසේදී තාප්පවල රැස්වී ඉඳ, ඉර පායන කල පලායති, උන් ඉන්න ඉඩමද කිසිවෙක් දන්නේ නැත.

¹⁸අෂූර් රජ්ජුරුවෙනි, ඔබේ එඬේරු නිදාහිඳිති. ඔබේ උත්තමයෝ සැතපෙති. ඔබේ සෙනඟ කඳුවල විසිරී ගියෝය, ඔවුන් එකතුකරන්ට කිසිවෙක්ද නැත.

¹⁹ඔබේ තුවාලයට සහනයක් නැත; ඔබට වැදුණු පහර තදය. ඔබේ ප්‍රවෘත්තිය අසන සියල්ලෝ ඔබට විරුද්ධව අත්පොළසන්දෙති; මක්නිසාද ඔබේ දුෂ්ටකම නිතරම නොපැමුණුණේ කා පිටටද?