Read Sinhala Revised Old Version ශු. මතෙව් 5 Bible Online

ශු. මතෙව් 5 - Sinhala Revised Old Version bible

ශු. මතෙව් 5

¹(පරි: 5-7) උන්වහන්සේ සමූහයන් දැක කන්දට නැගුණසේක. උන්වහන්සේ හිඳගත් කල්හි උන්වහන්සේගේ ගෝලයෝ උන්වහන්සේ වෙතට ආවෝය.

²එවිට උන්වහන්සේ මුඛය හැර ඔවුන්ට උගන්වමින් මෙසේ කීසේක-

³සිතින් දිළින්දෝ ආශීර්වාදලද්දෝය;[8] මක්නිසාද ස්වර්ගරාජ්‍යය ඔවුන්ගේය.

⁴ශෝකවන්නෝ ආශීර්වාදලද්දෝය;[9] මක්නිසාද ඔව්හු සනසනු ලබන්නෝය.

⁵මොළොක් ගුණ ඇත්තෝ ආශීර්වාදලද්දෝය;[10] මක්නිසාද ඔව්හු පොළොව උරුමකරගන්නෝය.

⁶ධර්මිෂ්ඨකමට සාපිපාසා ඇත්තෝ ආශීර්වාදලද්දෝය;[11] මක්නිසාද ඔව්හු තෘප්තියට පැමිණෙන්නෝය.

⁷දයාවන්තයෝ ආශීර්වාදලද්දෝය;[12] මක්නිසාද ඔව්හු දයාව ලබන්නෝය.

⁸සිතින් පවිත්‍රව සිටින්නෝ ආශීර්වාදලද්දෝය;[13] මක්නිසාද ඔව්හු දෙවියන්වහන්සේ දකින්නෝය.

⁹සමාදානයකරන්නෝ ආශීර්වාදලද්දෝය;[14] මක්නිසාද ඔව්හු දෙවියන්වහන්සේගේ පුත්‍රයෝයයි කියනු ලබන්නෝය.

¹⁰ධර්මිෂ්ඨකම නිසා පීඩා වින්ද තැනැත්තෝ ආශීර්වාදලද්දෝය; මක්නිසාද ස්වර්ගරාජ්‍යය ඔවුන්ගේය.

¹¹මනුෂ්‍යයන් මා නිසා ඔබ සැමට නින්දා පීඩාකොට ඔබ සැමට විරුද්ධව සියලු ආකාර අගුණ බොරුවෙන් කියන කල ඔබ සැම ආශීර්වාදලද්දෝය.[15]

¹²ප්‍රීතිවෙන්න, ඉතා සන්තෝෂවෙන්න; මක්නිසාද ස්වර්ගයෙහි ඔබ සැමගේ විපාකය මහත්ය. ඔබ සැමට පළමුවෙන් සිටි අනාගතවක්තෘවරුන්ටත් ඔව්හු එලෙසම පීඩාකළෝය.

¹³ඔබ සැම පොළොවේ ලුණුය. නුමුත් ලුණුවල රස නැතිවුණොත් ඒවා කුමකින් රසකරනු ලබන්නේද? එතැන් පටන් ඒවා පිටත දමනු ලබන්ටද මනුෂ්‍යයන්ගේ පයින් පාගනු ලබන්ටද මිස අන් කිසිවකට නොවටනේය.

¹⁴ඔබ සැම ලෝකයේ ආලෝකයය. කන්දක් මුදුනෙහි තිබෙන නුවරක් සඟවන්ට නොහැකිය.

¹⁵මනුෂ්‍යයෝ පහනක් දල්වා කුරුණිය යට නොව පහන්රුක උඩ තබති; එවිට එයින් ගෙයි සිටින සියල්ලන් කෙරෙහි ආලෝකය බබළයි.

¹⁶එසේම මනුෂ්‍යයන් විසින් ඔබ සැමගේ යහපත් ක්‍රියා දැක ස්වර්ගයෙහි සිටින ඔබ සැමගේ පියාණන්වහන්සේට ගෞරවකරන පිණිස ඔබ සැමගේ ආලෝකය ඔවුන් ඉදිරියේ බබළාවා.

¹⁷ව්‍යවස්ථාව හෝ අනාගතවාක්‍යය හෝ අවලංගුකරන පිණිස මම ආවෙමියි නොසිතන්න. සම්පූර්ණකරන්ට මිස අවලංගුකරන්ට නාවෙමි.

¹⁸සැබවක් ඔබ සැමට කියමි: අහසත් පොළොවත් පහව යන තෙක්, සියල්ල සිදුවන තුරු, ව්‍යවස්ථාවෙන් එක අකුරක්වත් බින්දුවක්වත් කිසිසේත් පහව නොයන්නේය.

¹⁹එබැවින් මේ ආඥාවලින් ඉතා සුළු එකක්වත් කඩකරන්නාවූ, කඩකරන ලෙස මනුෂ්‍යයන්ට උගන්වන්නාවූ කවරෙක් නුමුත් ස්වර්ගරාජ්‍යයෙහි ඉතා සුළුයයි කියනු ලබන්නේය. නුමුත් ඒවා පවත්වන්නාවූ, උගන්වන්නාවූ කවරෙක් නුමුත් ස්වර්ගරාජ්‍යයෙහි උතුම්යයි කියනු ලබන්නේය.

²⁰මක්නිසාද ඔබ සැමගේ ධර්මිෂ්ඨකම ලියන්නන්ගේද පරිසිවරුන්ගේද ධර්මිෂ්ඨකමට වැඩි නොවීනම්, ඔබ සැම කිසිසේත් ස්වර්ගරාජ්‍යයට ඇතුල් නොවන්නහුයයි ඔබ සැමට කියමි.

²¹මිනී නොමරව, මිනීමරන කවරෙක් නුමුත් විනිශ්චයට සුදුස්සෙකැයි පුරාතනයන්ට කී බව ඔබ සැම අසා තිබේ.

²²නුමුත් මම ඔබ සැමට කියමි: තමාගේ සහෝදරයාට කෝපවෙන කවරෙක් නුමුත් විනිශ්චයට සුදුස්සෙක් වන්නේය. තමාගේ සහෝදරයාට රකායයි[16] කියන කවරෙක් නුමුත් මන්ත්‍රණ සභාවෙන් දඬුවම් ලබන්ට සුදුස්සෙක් වන්නේය, ඔබ ජඩයායයි කියන කවරෙක් නුමුත් නිරාගින්නට සුදුස්සෙක් වන්නේය.

²³එබැවින් ඔබේ පඬුර පූජාසනය ළඟ පුදන කල්හි, ඔබේ සහෝදරයා ඔබ කෙරෙහි යම් විරුද්ධයක් ඇති බව එහිදී ඔබ සැමට සිහිවී නම්,

²⁴ඔබේ පඬුර පූජාසනය ඉදිරියෙහි තබා ගොස්, පළමුකොට ඔබේ සහෝදරයා හා සමඟිවී, පසුව ඇවිත් ඔබේ පඬුර පුදන්න.

²⁵ඔබේ විරුද්ධකාරයා සමඟ පාරේ යන කල්හිම ඉක්මනින් ඔහු හා සමඟිවෙන්න; නැත්නම් විරුද්ධකාරයා ඔබ විනිශ්චයකාරයාට භාරදෙන්නේය, විනිශ්චයකාරයා ඔබ සේවකයාට භාරදෙන්නේය, ඔබද හිරගෙයි දමනු ලබන්නෙහිය.

²⁶සැබවක් ඔබ සැමට කියමි: අන්තිම සල්ලිය ගෙවනතුරු ඔබ කිසිසේත් එයින් පිටවී නොඑන්නෙහිය.

²⁷කාමමිථ්‍යාචාරය නොකරවයි කී බව ඔබ සැම අසා තිබේ.

²⁸නුමුත් මම ඔබ සැමට කියමි: ස්ත්‍රියෙකු දෙස රාගයෙන් බලන කවරෙක් නුමුත් එවේලේම ඈ සමඟ සිතින් කාමමිථ්‍යාචාරය කෙළේය.

²⁹ඔබේ දකුණු ඇස ඔබ සැමට බාධාකෙරේ නම්, ඒක උගුළා අහකට දමන්න. මක්නිසාද ඔබේ මුළු ශරීරය නිරයෙහි හෙළනු ලැබීමට වඩා, ඔබේ අවයවවලින් එකක් නැතිවීම ඔබ සැමට යහපත.

³⁰ඔබේ දකුණු අත ඔබ සැමට බාධාකෙරේ නම්, ඒක කපා අහකදමන්න. මක්නිසාද ඔබේ මුළු ශරීරය නිරයට යාමට වඩා, ඔබේ අවයවවලින් එකක් නැතිවීම ඔබ සැමට යහපත.

³¹ඇරත්, තමාගේ භාර්යාව අත්හරින කවරෙක් නුමුත් ඈට අත්හැරීම් පත්‍රයක් දේවයි කියා තිබුණේය.

³²මම ඔබ සැමට කියමි: වේශ්‍යාකමට මිස වෙන කාරණයකට තමාගේ භාර්යාව අත්හරින කවරෙක් නුමුත් ඇය කාමමිථ්‍යාචාරයට පමුණුවන්නේය. යමෙක් අත්හරිනු ලැබූ ඇය විවාහකරගන්නේ නම් ඔහුත් කාමමිථ්‍යාචාරය කරන්නේය.

³³බොරුවට නොදිවුරව, ස්වාමීන්වහන්සේට ඔබේ දිවුරුම් ඉෂ්ටකරවයි පුරාතනයන්ට කී බවත් ඔබ සැම අසා තිබේ.

³⁴නුමුත් මම ඔබ සැමට කියමි: කිසිසේත් නොදිවුරන්න; ස්වර්ගය දෙවියන්වහන්සේගේ සිංහාසනය බැවින් ඒක ගැනවත්,

³⁵පොළොව දෙවියන්වහන්සේගේ පාපුටුව බැවින් ඒක ගැනවත්, යෙරුසලම මහරජහුගේ නුවර බැවින් ඒක ගැනවත් නොදිවුරන්න.

³⁶එක හිසකෙසක් සුදුකරන්ටවත් කළුකරන්ටවත් ඔබ සැමට නොහැකි බැවින් හිස ගැනත් නොදිවුරන්න.

³⁷ඔබ සැමගේ වචනය: එසේය; එසේය කියාද: නැත, නැත කියාද වේවා. මීට වැඩිවූ යමක් ඇද්ද එය නපුරාගෙන් වේ.

³⁸ඇසකට ඇසක්ය, දතකට දතක්යයි කී බව ඔබ සැම අසා තිබේ.

³⁹නුමුත් මම ඔබ සැමට කියමි: නපුරු අය සමඟ පොරට නොසිටින්න. යමෙක් ඔබේ දකුණු කම්මුලට ගැසී නම් ඔහුට අනික් කම්මුලද හරවන්න.

⁴⁰යමෙක් නඩු කියා ඔබේ අඳනය ගන්ට කැමතිවීනම්, ඔහුට ඔබේ උතුරු සළුවත් ගන්ට ඉඩඅරින්න.

⁴¹යමෙක් එක හැතැප්මක් යන්ට ඔබ සැමට බලාත්කාරකෙරේද, ඔහු සමඟ හැතැප්ම දෙකක් යන්න. ඔබෙන් ඉල්ලන්නාට දෙන්න,

⁴²ඔබෙන් ණය ගන්ට කැමති තැනැත්තාට පිටු නොපාන්න.

⁴³ඔබේ අසල්වාසියාට ප්‍රේමකරව, ඔබේ සතුරාට වෛරකරවයි කී බව ඔබ සැම අසා තිබේ.

⁴⁴නුමුත් මම ඔබ සැමට කියමි: ඔබ සැමගේ සතුරන්ට ප්‍රේමකරන්න, ඔබ සැමට පීඩාකරන්නන් උදෙසා යාච්ඤාකරන්න;

⁴⁵මෙසේ ඔබ සැම ස්වර්ගයෙහි සිටින ඔබ සැමගේ පියාණන්වහන්සේගේ පුත්‍රයෝ වන්නෝය. මක්නිසාද උන්වහන්සේ නපුරන්ටත් යහපතුන්ටත් තමන් ඉර උදාකරවනසේක, ධර්මිෂ්ඨයන්ටත් අධර්මිෂ්ඨයන්ටත් වැසි වස්වනසේක.

⁴⁶ඔබ සැමට ප්‍රේමකරන්නන්ටම ඔබ සැම ප්‍රේමකරනවා නම්, ඔබ සැමට කවර විපාකයක්ද? සුංගම් අයකරන්නෝ පවා එසේ නොකරද්ද?

⁴⁷ඔබ සැමගේ සහෝදරයන්ට පමණක් ආචාරකරනවානම් ඔබ සැම අනුන්ට වඩා කුමක් කරන්නහුද? අන්‍ය ජාතීහු පවා එසේ නොකරද්ද?

⁴⁸එබැවින් ඔබ සැමගේ ස්වර්ගීය පියාණන්වහන්සේ සම්පූර්ණව සිටින්නාක්මෙන් ඔබ සැමත් සම්පූර්ණව සිටින්න.