Read Sinhala Revised Old Version ද්වීතීය කථාව 9 Bible Online

ද්වීතීය කථාව 9 - Sinhala Revised Old Version bible

ද්වීතීය කථාව 9

¹(ඉහත හා සම්බන්ධයි.) එම්බා, ඉශ්‍රායෙල්, අසන්න. දැන් ඔබ යොර්දානෙන් එතරවී, ඔබට වඩා මහත්වූ බලවත්වූ ජාතීන් පන්නා දමන්ටත්, අහස දක්වා පවුරු ඇති මහත් නුවරවල් අල්ලාගන්ටත්,

²ඔබ දන්නාවූ අනාක්වරුන්ගේ පුත්‍රයන් වන මහත්වූ උස ඇත්තාවූ සෙනඟක් පන්නා දමන්ටත් යන්නෙහිය. අනාක්ගේ පුත්‍රයන් ඉදිරියෙහි සිටින්ට පුළුවන් කාටදැයි යන කීම ඔබ අසා තිබේ.

³එබැවින් ඔබේ දෙවිවූ ස්වාමීන්වහන්සේම විනාශකරන ගින්නක්ව ඔබට පෙරටුව යන බව අද දැනගන්න; උන්වහන්සේම ඔවුන් විනාශකරනවා ඇත, උන්වහන්සේම ඔවුන් ඔබ ඉදිරියෙහි යටත්කරදෙනවා ඇත. මෙසේ ස්වාමීන්වහන්සේ ඔබට කී ලෙස ඔබ ඔවුන් පන්නා ඉක්මනින් නැතිකර දමනවා ඇත.

⁴ඔබේ දෙවිවූ ස්වාමීන්වහන්සේ ඔබ ඉදිරියෙන් ඔවුන් පහකළ පසු: මේ දේශය හිමිකරගැනීමට ස්වාමීන්වහන්සේ මා ගෙනාවේ මාගේ ධර්මිෂ්ඨකම නිසායයි ඔබේ සිතින් නොකියන්න. නුමුත් ස්වාමීන්වහන්සේ ඒ ජාතීන් ඔබ ඉදිරියෙන් පන්නාදමන්නේ ඔවුන්ගේ දුෂ්ටකම නිසාය.

⁵ඔවුන්ගේ දේශය හිමිකරගැනීමට ඔබ ඇතුල්වෙන්නේ ඔබේ ධර්මිෂ්ඨකම නිසාවත් ඔබේ සිතේ අවංකකම නිසාවත් නොවේ. ඔබේ දෙවිවූ ස්වාමීන්වහන්සේ ඒ ජාතීන් ඔබ ඉදිරියෙන් පන්නාදමන්නේ ඔවුන්ගේ දුෂ්ටකම නිසාත් ඔබේ පියවරුන් වන ආබ්‍රහම්ටද ඊසාක්ටද යාකොබ්ටද ස්වාමීන්වහන්සේ දිවුළ වචනය ඉෂ්ටකරන පිණිසත්ය.

⁶එබැවින් ඒ හොඳ දේශය හිමිකරගැනීමට ස්වාමීන්වහන්සේ එය ඔබට දෙන්නේ ඔබේ ධර්මිෂ්ඨකම නිසා නොවන බව දැනගන්න; මක්නිසාද ඔබ තද කුළල් ඇති සෙනඟක්ය.

⁷ඔබ කාන්තාරයේදී ඔබේ දෙවිවූ ස්වාමීන්වහන්සේ උදහස් කළ හැටි සිහිකරන්න, මතක නැති නොකරන්න. ඔබ මිසර දේශයෙන් පිටත්වුණ දා පටන් මේ ස්ථානයට පැමිණෙන තෙක් ඔබ සැම ස්වාමීන්වහන්සේට විරුද්ධව කැරළිකාරව සිටියහුය.

⁸හොරේබ්හිදීත් ඔබ සැම ස්වාමීන්වහන්සේ උදහස් කළහුය, ස්වාමීන්වහන්සේද ඔබ සැම විනාශකරන තරමට ඔබ සැමට කෝපවූසේක.

⁹එසේ වුණේ ස්වාමීන්වහන්සේ ඔබ සැම සමඟ කළ ගිවිසුමේ ලෑලි වන ගල්ලෑලි ලබාගන්ට මා කන්දට නැගී, කෑම නොකා වතුර නොබී දවල් සතළිසක් හා රෑ සතළිසක් කන්දේ සිටියාවූද,

¹⁰දෙවියන්වහන්සේගේ ඇඟිල්ලෙන් ලියනලද ගල්ලෑලි දෙක ස්වාමීන්වහන්සේ මට භාරදුන්නාවූද ප්‍රස්තාවේදීය; රැස්වීමේ දවසේ ස්වාමීන්වහන්සේ කන්දෙහිදී ගිනි මැද සිට ඔබ සැමට කථාකළ සියලු වචනවල ප්‍රකාරයට ඒවායේ ලියා තිබුණේය.

¹¹දවල් සතළිසක්ද රෑ සතළිසක්ද ගතවූ කල ස්වාමීන්වහන්සේ ගිවිසුමේ ලෑලි වන ගල්ලෑලි දෙක මටදී කථාකොට:

¹²ඔබ නැගිට මෙතනින් ඉක්මනට බැස යන්න; මක්නිසාද ඔබ මිසරයෙන් ගෙනාවාවූ ඔබේ සෙනඟ දුෂ්ටකම් කළෝය; මා ඔවුන්ට අණකළ මාර්ගයෙන් ඔව්හු අහක්වී තමුන්ට පිළිමයක් වාත්තුකරගන සිටිතියි කීසේක.

¹³ස්වාමීන්වහන්සේ තව දුරටත් මට කථාකොට: මේ සෙනඟ බැලුවෙමි, ඔව්හු තද කුළල් ඇති සෙනඟක්ය.

¹⁴මා විසින් ඔවුන් විනාශ කොට ඔවුන්ගේ නාමය අහස යටින් මකාදමන පිණිස මට ඉඩ අරින්න. මම ඔබ ඔවුන්ට වඩා බලවත්වූ මහත්වූ සෙනඟක් වෙන්ට සලස්වන්නෙමියි කීසේක.

¹⁵එවිට මම හැරී කන්දෙන් බැස්සෙමි, කන්ද ගින්නෙන් ඇවුළුණේය. ගිවිසුමේ ලෑලි දෙක මාගේ දෑතෙහි තිබුණේය.

¹⁶මම බැලීමි, ඔබ සැමගේ දෙවිවූ ස්වාමීන්වහන්සේට විරුද්ධව ඔබ සැම පව්කොට, වහු රූපයක් ඔබ සැමට වාත්තුකරගෙන, ස්වාමීන්වහන්සේ ඔබ සැමට අණකළ මාර්ගයෙන් ඔබ සැම ඉක්මනින් අහක්ව ගිය බව දැක,

¹⁷මම ලෑලි දෙක ගෙන මාගේ දෑතින් වීසිකොට ඔබ සැමගේ ඇස් හමුයෙහි ඒවා බින්දෙමි.

¹⁸ස්වාමීන්වහන්සේ කෝපකරන හැටියට උන්වහන්සේගේ ඇස් හමුයෙහි නපුරුවූ දේ කරමින් ඔබ සැම කළාවූ ඔබ සැමගේ සියලුම පාපවල් නිසා මම පළමු වතාවේ මෙන් ස්වාමීන්වහන්සේ ඉදිරියෙහි වැටී දවල් සතළිසක්ද රෑ සතළිසක්ද කෑම නොකා වතුර නොබී සිටියෙමි.

¹⁹මක්නිසාද ඔබ සැම විනාශකිරීමට ස්වාමීන්වහන්සේ ඔබ සැමට විරුද්ධව උදහස්වී සිටිය උදහසද කෝපයද නිසා භයවීමි. නුමුත් ස්වාමීන්වහන්සේ ඒ වතාවේදීත් මට ඇහුම්කන්දුන්සේක.

²⁰ස්වාමීන්වහන්සේ ආරොන්ද විනාශකරන පිණිස ඔහුට විරුද්ධව ඉතා උදහස්ව සිටිසේක. මම ඒ ප්‍රස්තාවේදී ආරොන් උදෙසාත් යාච්ඤා කෙළෙමි.

²¹ඔබ සැමගේ පාපය වන ඔබ සැම සෑදු වස්සා මම අරගන ගින්නෙන් පුලුස්සා දමා, කොටා, ධූලි මෙන් පොඩිවෙන තුරු අඹරා, ඒකේ කුඩු කන්දෙන් ගලාගන ආ ඔයේ හෙළිමි.

²²තවද තාබෙරාහිදීත් මස්සාහිදීත් කිබ්‍රොත්-හත්තාවාහිදීත් ඔබ සැම ස්වාමීන්වහන්සේ උදහස් කළහුය.

²³ඔබ සැම නැගී ගොස් මා ඔබ සැමට දුන් දේශය හිමිකර ගන්නය කියා ස්වාමීන්වහන්සේ කාදේෂ්-බර්නේයේ සිට ඔබ සැම යැවූ විටත් ඔබ සැමගේ දෙවිවූ ස්වාමීන්වහන්සේගේ අණට විරුද්ධව ඔබ සැම කැරළිගැසුවහුය, ඔබ සැම උන්වහන්සේ විශ්වාස කළේවත් උන්වහන්සේගේ හඬ ඇසුවේවත් නැත.

²⁴මා ඔබ සැම දැනගත් දවස පටන් ඔබ සැම ස්වාමීන්වහන්සේට විරුද්ධව කැරළිකාරව සිටියහුය.

²⁵ස්වාමීන්වහන්සේ ඔබ සැම විනාශකරනසේකැයි කී බැවින් මා වැටී සිටිය දවස් ලෙස දවල් සතළිසකුත් රෑ සතළිසකුත් ස්වාමීන්වහන්සේ ඉදිරියේ වැටී,

²⁶උන්වහන්සේට යාච්ඤාකරමින්: ස්වාමිවූ දෙවියන්වහන්ස, ඔබගේ මහන්තත්වයෙන් ඔබ මුදාගත්තාවූ, බලවත් හස්තයකින් මිසරයෙන් පිටතට ගෙනාවාවූ ඔබගේ සෙනඟද උරුමයද විනාශනොකළ මැනව.

²⁷ඔබගේ මෙහෙකරුවන්වූ ආබ්‍රහම්ද ඊසාක්ද යාකොබ්ද සිහිකළ මැනව; මේ සෙනඟගේ මුරණ්ඩුකමවත් දුෂ්ටකමවත් පාපයවත් නොබලා වදාළ මැනව.

²⁸බැලුවොත් ඔබ යම් දේශයකින් අප පිටතට ගෙනාසේක්ද එහි වැසියන් කථාකොට: ස්වාමීන්වහන්සේ ඔවුන්ට පොරොන්දුවුණ දේශයට ඔවුන් පමුණුවන්ට උන්වහන්සේට නොහැකිවූ බැවින්ද උන්වහන්සේ ඔවුන්ට වෛරවුණ බැවින්ද කාන්තාරයේදී ඔවුන් මරණ පිණිස පිටතට ගෙනාසේකැයි කියනවා ඇත.

²⁹නුමුත් මොවුන් ඔබගේ මහත් බලයෙන්ද දිගු කළ ඔබගේ බාහුවෙන්ද ඔබ විසින් පිටතට ගෙනාවාවූ ඔබගේ සෙනඟත් ඔබගේ උරුමයත්යයි කීවෙමි.