Read Sinhala Revised Old Version ශු. යොහන් 15 Bible Online

ශු. යොහන් 15 - Sinhala Revised Old Version bible

ශු. යොහන් 15

¹මම සැබෑවූ මිදිවැලය, මාගේ පියාණන්වහන්සේ ගොවියාය.

²මා තුළෙහි තිබී ඵල නොදරන සියලු අතු උන්වහන්සේ පහකරනසේක. ඵල දරන සියලු අතු වඩා ඵල දරන පිණිස උන්වහන්සේ පවිත්‍රකරනසේක.

³මා විසින් ඔබ සැමට කී වචනය කරණකොටගෙන ඔබ සැම දැන් පවිත්‍රය.

⁴මා තුළ පැවතෙන්න, මමත් ඔබ සැම තුළ පවතින්නෙමි. අත්ත මිදිවැලෙහි නොපවතී නම් තනියම ඵල දරන්ට බැරුවාක්මෙන්, ඔබ සැම මා තුළෙහි නොපවතිවු නම්, ඵල දරන්ට ඔබ සැමට බැරිය.

⁵මිදිවැල මමය, ඔබ සැම අතුය. යමෙක් මා තුළෙහි පවතින්නේද, මම ඔහු තුළෙහි පවතිම්ද, ඒ තැනැත්තේ බොහෝ ඵල දරයි. මක්නිසාද මාගෙන් වෙන්ව කිසිවක් කරන්ට ඔබ සැමට බැරිය.

⁶යමෙක් මා තුළෙහි නොපවතී නම්, ඔහු අත්තක් මෙන් පිටත දමනු ලැබ වියළීයයි; ඒවා එක්කොට ගින්නට දමනු ලැබේ, ඒවා දාලායන්නේය.

⁷ඔබ සැම මා තුළෙහි පවතින්නෝ නම්, මාගේ වචනය ඔබ සැම තුළෙහි පවතී නම්, ඔබ සැම කැමති දෙයක් ඉල්ලන්න, එවිට ඔබ සැමට ලැබේ.

⁸මාගේ පියාණන්වහන්සේට ගෞරව ලැබෙන්නේ ඔබ සැම විසින් බොහෝ ඵල දැරීමෙන්ය; මෙසේ ඔබ සැම මාගේ ගෝලයෝ වන්නෝය.

⁹පියාණන්වහන්සේ මට ප්‍රේමකළාක්මෙන්ම මමත් ඔබ සැමට ප්‍රේමකෙළෙමි. මාගේ ප්‍රේමයෙහි පවතින්න.

¹⁰මම මාගේ පියාණන්වහන්සේගේ ආඥා රක්ෂාකොට උන්වහන්සේගේ ප්‍රේමයෙහි යම්සේ පවතිම්ද, එසේම ඔබ සැමත් මාගේ ආඥා රක්ෂාකරවුනම් මාගේ ප්‍රේමයෙහි පවතින්නහුය.

¹¹මාගේ ප්‍රීතිය ඔබ සැම තුළෙහි පවතින පිණිසද ඔබ සැමගේ ප්‍රීතිය සම්පූර්ණවන පිණිසද මේ දේවල් ඔබ සැමට කීවෙමි.

¹²මාගේ ආඥාව නම් මා ඔබ සැමට ප්‍රේමකළාක්මෙන් ඔබ සැමත් එකිනෙකාට ප්‍රේමකරන්නය යනුය.

¹³යමෙක් තමාගේ මිත්‍රයන් උදෙසා තමාගේ ජීවිතය දීමට වඩා මහත් ප්‍රේමයක් කිසිවෙකුට නැත.

¹⁴මා ඔබ සැමට ආඥාකරන දේ ඔබ සැම කරනවානම්, ඔබ සැම මාගේ මිත්‍රයෝය.

¹⁵දාසයා තමාගේ ස්වාමියා කරන්නේ කුමක්දැයි නොදන්නා බැවින් තවත් ඔබ සැමට දාසයෝයයි නොකියමි; මක්නිසාද මාගේ පියාණන්වහන්සේගෙන් මා ඇසූ සියල්ල ඔබ සැමට දැන්වූ බැවින් ඔබ සැම මිත්‍රයෝයයි කීමි.

¹⁶ඔබ සැම මා තෝරාගත්තා නොව මම ඔබ සැම තෝරාගෙන පත්කෙළෙමි. එසේ කළේ ඔබ සැම ගොස් ඵල දරන පිණිසත් ඔබ සැමගේ ඵල පවතින පිණිසත් මාගේ නාමයෙන් පියාණන්වහන්සේගෙන් ඔබ සැම ඉල්ලන කොයි දෙයක් නුමුත් උන්වහන්සේ ඔබ සැමට දෙන පිණිසත්ය.

¹⁷මේ දේවල් මා ඔබ සැමට අණකරන්නේ ඔබ සැම එක් එක්කෙනාට ප්‍රේමකරන පිණිසය.

¹⁸ලෝකයා ඔබ සැමට වෛරවෙනවා නම්, ඔබ සැමට පළමුවෙන් මට වෛරවුණ බව ඔබ සැම දනිහුය.

¹⁹ඔබ සැම ලෝකයට අයිති නම්, ලෝකයා තමුන්ගේම අයට ආදරේවන්නෝය. නුමුත් ඔබ සැම ලෝකයාගෙන් නොවන නිසාත් මා විසින් ලෝකයෙන් ඔබ සැම තෝරාගත් නිසාත් ලෝකයා ඔබ සැමට වෛරවෙති.

²⁰දාසයෙක් තමාගේ ස්වාමියාට වඩා උතුම් නොවේයයි ඔබ සැමට මා කී වචනය සිහිකරන්න. ඔව්හු මට පීඩාකළෝනම් ඔබ සැමටත් පීඩාකරන්නෝය; මාගේ වචනය රක්ෂාකළෝ නම් ඔබ සැමගේ වචනයත් රක්ෂාකරන්නෝය.

²¹නුමුත් ඔවුන් මා එවූ තැනන්වහන්සේව නාඳුනන බැවින් මාගේ නාමය නිසා මේ සියල්ල ඔබ සැමට කරනවා ඇත.

²²මම ඇවිත් ඔවුන්ට කථා නොකෙළෙම් නම්, ඔවුන්ට පාපයක් නැත. නුමුත් දැන් ඔවුන්ගේ පාපය ගැන ඔව්හු නිරුත්තරව සිටිති.

²³මට වෛරවෙන්නා මාගේ පියාණන්වහන්සේටත් වෛරවෙන්නේය.

²⁴වෙන කිසිවෙකු විසින් නොකළ ක්‍රියා මම ඔවුන් අතරෙහි නොකෙළෙම් නම්, ඔවුන්ට පාපයක් නැත. නුමුත් දැන් ඔව්හු මාද මාගේ පියාණන්වහන්සේද දැක වෛරවූවෝය.

²⁵(මෙසේ වුණේ) ඔව්හු නිෂ්කාරණයේ මට වෛරවුණෝයයි ඔවුන්ගේ ව්‍යවස්ථාවෙහි ලියා තිබෙන වචනය සම්පූර්ණවන පිණිසය.

²⁶නුමුත් පියාණන්වහන්සේ කෙරෙන් මා විසින් ඔබ සැමට එවන සැනසිලිකාරයාණන්වහන්සේ එනම් පියාණන්වහන්සේ වෙතින් නික්මෙන්නාවූ සත්‍යතාවේ ආත්මයාණන්වහන්සේ ආ කල, උන්වහන්සේ මා ගැන සාක්ෂිදෙනසේක.

²⁷පටන්ගැන්මේ සිට ඔබ සැම මා සමඟ සිටි බැවින් ඔබ සැමත් සාක්ෂිදෙන්නහුය.